Biiyaʼ guiraʼ ni nuu lu sitiu riʼ

guyé lu índice

Historia 78: Ti naʼ cucaa letra cueʼ yoo

Historia 78: Ti naʼ cucaa letra cueʼ yoo
Ti naʼ ni cucaa cueʼ yoo

XI cayaca raríʼ pue. Ca binni riʼ nápacaʼ ti saa roʼ. Rey stiʼ Babilonia maʼ biʼniʼ invitarbe stale binni risaca. Caquiiñecabe ca copa de oro ne xcaadxi cosa de plata ni guleecabe ndaaniʼ yuʼduʼ stiʼ Jiobá guidxi Jerusalén. Málasi, biree ti naʼ lu bi que ne bizulú cucaa cueʼ yoo. Guirácabe ridxíbicabe.

Belsasar ne ca binni ni biʼniʼ invitar

Ca dxi riʼ la? Belsasar, xhiaga Nabucodonosor nga naca rey. Laabe rucaabe ridxi gueeda ca hombre nuu xpiaaniʼ stibe. Tu guʼndaʼ ni cá cueʼ yoo ca ne gabi naa xi riníʼ cani la? zusigaʼdeʼ laa stale cosa ne zaca guionna ni jma risaca lu reinu stinneʼ, na rey que. Peru nin tobi de ca hombre nuu xpiaaniʼ stibe qué randa ruundacaʼ ni cá cueʼ yoo que, ninla riniʼcaʼ xi riníʼ cani.

Jñaa rey que riuu ra cayoxhícabe. Cadi guidxíbidiluʼ rey na rabi laabe, lu reinu stiuʼ nuu ti hombre ni runibiáʼ stale dios nayá. Ora guca bixhozebídaluʼ rey la? biʼniʼ laabe xaíque stiʼ ca hombre nuu xpiaaniʼ. Hombre ca labe Daniel. Bisendacaa laabe ne laabe zábibe lii xi riníʼ cani.

Ngue runi oraqueca reedanécabe Daniel. Despué de riniʼbe de que qué zacaadibe cani cusigaʼdeʼ rey que la? Daniel rábibe Belsasar xi pur Jiobá gulee bixhozebídabe de gaca rey. Laabe nabé gúcabe naróʼ, ngue runi Jiobá biʼniʼ castigar laabe.

Peru lii nannuʼ guiráʼ ni guca ca, na Daniel rabi Belsasar ne qué ganda gusaanu de gacu naróʼ ne gudxiibaluʼ lii casi guca Nabucodonosor. Maʼ beedaneluʼ ca copa ne ca tazón stiʼ Jiobá ni gucuaaluʼ ndaaniʼ yuʼduʼ que ne cayeʼluʼ ndaaniʼ cani. Maʼ bisisácaluʼ ca dios de yaga ne de guié ne qué gusisácaluʼ Dios stidu ni Jma Nandxóʼ ni Bizáʼ guiráʼ xixé ni nuu. Nga runi laabe biseendabe naʼ ca para gucaa ca diidxaʼ riʼ.

Ni cá raríʼ nga ndiʼ, na Daniel rabi laabe: MENÉ, MENÉ, TEQUEL, PARSÍN.

MENÉ ca la? riníʼ ni de que Dios maʼ bigabaʼ dxi stiʼ reinu stiluʼ ne maʼ chigundúxebe ni. TEQUEL la? riníʼ ni de que maʼ guyuubialuʼ lu balanza ne maʼ bihuinni cadi nacháʼhuidiluʼ. Ne PARSÍN la? riníʼ ni de que reinu stiluʼ maʼ gucuaa ca medo ne ca persa ca ni.

Nin caʼruʼ guiluxe guiníʼ Daniel la? ca medo ne ca persa maʼ bizulú cucaalucaʼ Babilonia. Ricaacabe guidxi que ne rey que ruuticabe laa. Gueelaʼ queca guca cani gucuá cueʼ yoo que. Peru, xi gaca xa de ca israelita ca yanna pue. Despué zadúʼyanu, peru yanna la? chiguidúʼyanu xi rizaaca Daniel.

Daniel 5:1-31.



Guendarinabadiidxaʼ

  • Xi raca ora rey stiʼ Babilonia runi ti saa roʼ, ne riquiiñebe ca copa ne tazón ni guleecabe ndaaniʼ yuʼduʼ stiʼ Jiobá ni nuu Jerusalén que.
  • Xi gudxi Belsasar ca hombre nuu xpiaaniʼ stiʼ, peru xi qué randa rúnicabe.
  • Xi rinabaʼ jñaa Belsasar laa.
  • Casi gudxi Daniel rey que, xiñee biʼniʼ Dios de que ti náʼ gucaa cueʼ yoo que.
  • Ximodo rusiene Daniel xi riníʼ ca diidxaʼ gucuá cueʼ yoo que.
  • Xi raca laga caníʼ Daniel.

Xcaadxi guendarinabadiidxaʼ

  • Biindaʼ Daniel 5:1-31.

    Bichaaga guendaridxibi rápanu Jiobá ne guendaridxibi ni gupa Belsasar ora bíʼyabe cacá letra cueʼ yoo que. (Dan. 5:6, 7; Sal. 19:9; Rom. 8:35-39.)

    Ximodo bisihuinni Daniel guendanadxibalú ora guniʼbe nezalú Belsasar ne ca hombre risaca stiʼ. (Dan. 5:17, 18, 22, 26-28; Hech. 4:29.)

    Ximodo rihuinni derechu ni napa Jiobá de guni mandar lu capítulo 5 stiʼ Daniel. (Dan. 4:17, 25; 5:21.)