Biiyaʼ guiraʼ ni nuu lu sitiu riʼ

guyé lu índice

Historia 65: Rilaa ti reinu

Historia 65: Rilaa ti reinu

NANNUʼ xiñee cacheza hombre riʼ xhaba la? Jiobá gudxi laabe gúnibe ni. Hombre riʼ láʼ Ahíya, ti ni riguixhená stiʼ Dios. Ñee nannuʼ tuu nga ti ni riguixhená la? Nga nga tuuxa ni rabi Dios laa xi chigaca.

Ahíya ne Jeroboam

Raríʼ la? Ahíya caniʼné Jeroboán. Jeroboán nga tobi de ca hombre biʼniʼ xhiiñaʼ Salomón. Ora Ahíya ridxagalú Jeroboán lu neza riʼ la? rúnibe xiixa ni qué huahuinni. Ribeebe xhaba cúbibe ne richézabe ni doce ndaa ne rábibe Jeroboán: Gucuaa chii ndaa riʼ para lii. Nannuʼ xiñee rudiibe chii ndaa ca Jeroboán la?

Ahíya riníʼ de que Jiobá chigaxha reinu ca Salomón ne chigudiibe chii tribu Jeroboán. Ndiʼ riníʼ de que Rehoboam xiiñiʼ Salomón chiguianané chupa si tribu para guni gobernar.

Ora runadiaga Salomón ni gudxi Ahíya Jeroboán la? ridxiichibe stale ne racaláʼdxibe guutibe Jeroboán, peru Jeroboán ruxooñeʼ rie Egipto. Despué la? rati Salomón. Gúcabe rey pur cuarenta iza, peru yanna xiiñibe Rehoboam nga rey. Ranna si Jeroboán de que Salomón maʼ guti la? ribiguétabe Israel.

Rehoboam cadi ti rey chaʼhuiʼ diʼ laa. Laabe gúcabe jma malu que bixhózebe Salomón. Jeroboán ne xcaadxi hombre risaca la? riguuyacabe Rehoboam ne rábicabe laabe gácabe nachaʼhuiʼ ne ca binni que. Peru laabe qué rucaadiágabe laacaʼ ne rácabe jma malu que ante. Nga runi ca binni que rúnicabe Jeroboán rey lu chii tribu para guni gobernar, peru tribu stiʼ Benjamín ne stiʼ Judá la? laacaʼ rápacaʼ Rehoboam casi rey sticaʼ.

Jeroboán qué nádibe cheʼ ca binni xquídxibe Jerusalén para chiguni adorarcaʼ Jiobá ndaaniʼ yuʼduʼ stiʼ. Ngue runi ruzaʼbe chupa yuzehuiiniʼ de oro ne rucaabe ca binni de chii tribu que guni adorarcaʼ laacame. Qué nindaa diʼ guidxi que bidxani de guendaridinde ne guendaruchee.

Lu reinu stiʼ guiropaʼ tribu que laaca guyuu guendanagana. Biaʼ gaayuʼ iza despué de reeda gaca Rehoboam rey la? rey stiʼ guidxi Egipto reeda gucaalú Jerusalén. Ne rinebe guiráʼ ni risaca nuu ndaaniʼ yuʼduʼ stiʼ Jiobá. Ngue runi cadi tan xadxí diʼ biaana yuʼduʼ que casi modo guyuu ni primé.

1 Reyes 11:26-43; 12:1-33; 14:21-31.



Guendarinabadiidxaʼ

  • Tu láʼ guiropaʼ hombre cá lu dibuju riʼ ne tu laacabe.
  • Xi runi Ahíya xhaba ne xi riníʼ ni rúnibe riʼ.
  • Xi gucalaʼdxiʼ Salomón ñuni ne Jeroboán.
  • Xiñee runi ca binni que Jeroboán rey luguiáʼ ca chii tribu que.
  • Xiñee runi Jeroboán chupa yuzehuiiniʼ de oro, ne xi raca guidxi que despué.
  • Xi raca lu guiropa tribu que ne cani nuu ndaaniʼ yuʼduʼ stiʼ Jiobá ni nuu Jerusalén.

Xcaadxi guendarinabadiidxaʼ

  • Biindaʼ 1 Reyes 11:26-43.

    Tu guca Jeroboán, ne xi bizabiruaa Jiobá laabe pa guzuubabe diidxaʼ ca ley Stiʼ. (1 Rey. 11:28, 38.)

  • Biindaʼ 1 Reyes 12:1-33.

    Xi zanda guiziidiʼ bixhoze binni ne ca binnigola ca de ejemplu qué iquiiñeʼ stiʼ Rehoboam ora tiidisúcabe ne derechu nápacabe de guni mandárcabe. (1 Rey. 12:13; Ecl. 7:7; 1 Ped. 5:2, 3.)

    Tu ra nuu nga naquiiñeʼ cheʼ cani nahuiiniʼ para uguu jneza laacaʼ ora gápacaʼ gana gúnicaʼ xiixa risaca lu xquendanabánicaʼ. (1 Rey. 12:6, 7; Pro. 1:8, 9; 2 Tim. 3:16, 17; Heb. 13:7.)

    Xiñee biʼniʼ Jeroboán chupa lugar para guni adorárcabe yuzehuiiniʼ, ne ximodo bisihuinni ndiʼ de que qué ñápabe fe Jiobá. (1 Rey. 11:37; 12:26-28.)

    Tu guca xaíque stiʼ chii tribu ni bicaalú adoración dxandíʼ stiʼ Jiobá. (1 Rey. 12:32, 33.)