Biiyaʼ guiraʼ ni nuu lu sitiu riʼ

guyé lu índice

Historia 61: David guca rey

Historia 61: David guca rey

STI BIAJE ca racalaʼdxiʼ Saúl guinaazeʼ David. Rinebe 3.000 soldadu stibe de cani jma nanna para chiyúbicabe David. Ora ranna David ndiʼ la? ruseendabe cani rundaachiʼ stibe para chiguuyacaʼ paraa biaana Saúl gueelaʼ que. Óraque rinabadiidxabe chupa de ca hombre stibe: Tu chiné naa ra biaana Saúl ca.

Cucaa ridxi David Saúl

Naa chaa, na Abisai. Abisai nga xiiñiʼ Zeruyá bizaʼnaʼ David. Laga nisiaasiʼ Saúl ne ca hombre stiʼ la? David ne Abisai riuucaʼ ra nuucabe nagaʼchiʼ ne rinécabe lanza ne rii dxaʼ nisa stiʼ Saúl ni nexheʼ xaíquebe. Guirutiʼ ruuyaʼ laacabe nin runadiaga laacabe purtiʼ guirácabe nisiaasicabe.

Biiyaʼ David ne Abisai yanna. Maʼ bixooñecabe ne nuucabe lu ti dani. David rucaabe ridxi xaíque ca hombre ridinde stiʼ Israel, ne rábibe laa: Abner, xiñee cadi cayápaluʼ xpixuánaluʼ rey ca pue. ¡Biiyaʼ! Paraa nuu lanza ne rii dxaʼ nisa stibe.

Saúl ribani. Runibiaʼbe stidxi David ne rinabadiidxabe: Ñee lii nga la David. Zanda guʼyuʼ Saúl ne Abner gueteʼ ca.

Ya, naa ndiʼ señor stinneʼ, ricabi David. Ne David rinabadiidxaʼ: Xiñee nuuluʼ guinaazuʼ naa pue. Xi bineʼ pue. Raríʼ nuu lansa stiluʼ rey, biseenda tu guedacaani.

Rey saúl ne Abner

Guizáʼ feu ni maʼ bineʼ na Saúl, puru si guendahuati. Óraque David rie ne Saúl ribiguetaʼ ralidxi. Peru David na: Tobi de ca dxi riʼ Saúl zuuti naa, napa xidé chigucaacheluaʼ xquidxi ca filisteu ca. Ne nga nga ni rúnibe. David randa riguítebe ca filisteu ca ne rucaabe laacaʼ guni crecaʼ de que yanna maʼ nuube pur laacaʼ.

Gupa dxi la? ca filisteu ca rigucaalúcabe guidxi Israel. Lu guendaridinde ca la? Saúl ne Jonatán ráticaʼ. David guizáʼ triste riuu, ne laabe rucaabe ti canción ne ruundabe: Guizáʼ triste nuaʼ pur lii biʼcheʼ Jonatán. ¡Guizáʼ gunaxhiee lii!

Biluxe si ca ngue la? David ribiguetaʼ Israel, guidxi Hebrón. Raqué riuu ti guendaridinde lade ca hombre ribí Is-bóset xiiñiʼ Saúl para gaca rey ne xcaadxi hombre ni racalaʼdxiʼ gaca David rey. Peru ca hombre stiʼ David runi ganarcaʼ. David napa 30 iza ora reeda gaca rey. Pur gadxe iza arondaʼ runi gobernarbe guidxi Hebrón. Caadxi de ca xiiñiʼ David ni rale raqué nga Amnón, Absalón ne Adonías.

Despué la? David ne ca hombre stiʼ ricaacaʼ ti guidxi guizáʼ sicarú láʼ Jerusalén. Joab, sti xiiñiʼ Zeruyá bizaʼnaʼ David la? laa rizániruʼ lu guendaridinde que. Ngue runi David biʼniʼ laabe xaíque stiʼ ca hombre ridinde stiʼ. Yanna David ruzulú runi gobernar guidxi Jerusalén.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Crónicas 11:1-9.



Guendarinabadiidxaʼ

  • Xi biʼniʼ David ne Abisai laga nisiaasiʼ Saúl.
  • Xi rinabadiidxaʼ David Saúl.
  • Paraa rie David despué de riníʼnebe Saúl.
  • Xiñee guizáʼ triste riuu David ne rucaabe ti canción sicarú.
  • Panda iza napa David ora rúnicabe laabe rey guidxi Hebrón, ne tu láʼ chupa chonna de ca xiiñibe.
  • Paraa runi gobernar David despué.

Xcaadxi guendarinabadiidxaʼ

  • Biindaʼ 1 Samuel 26:1-25.

    Ximodo naquiiñeʼ gácanu para ne cani zaniruʼ ndaaniʼ xquidxi Jiobá casi na stiidxaʼ David ni cá lu 1 Samuel 26:11. (Sal. 37:7; Rom. 13:2.)

    Ora rúninu stipa pur gácanu nachaʼhuiʼ ne guirutiʼ tu gudii xquíxepeʼ laanu, ximodo racané ca stiidxaʼ David ni cá lu 1 Samuel 26:23 laanu para ganda gúʼyanu ca cosa ca jneza. (1 Rey. 8:32; Sal. 18:20.)

  • Biindaʼ 2 Samuel 1:26.

    Ximodo zanda gudxiibaʼ ca xpinni Cristu ndaaniʼ ladxidoʼcaʼ guendarannaxhiisaa casi gupa David ne Jonatán. (1 Ped. 4:8; Col. 3:14; 1 Juan 4:12.)

  • Biindaʼ 2 Samuel 5:1-10.

    Panda iza biʼniʼ reinar David, ne panda ndaa rilaa reinu stibe. (2 Sam. 5:4, 5.)

    Xiñee guca David ti hombre risaca ne xi rusietenalaʼdxiʼ ni laanu ca dxi stinu riʼ. (2 Sam. 5:10; 1 Sam. 16:13; 1 Cor. 1:31; Fili. 4:13.)