Biiyaʼ guiraʼ ni nuu lu sitiu riʼ

guyé lu índice

Historia 75: Tapa hombrehuiiniʼ nuu Babilonia

Historia 75: Tapa hombrehuiiniʼ nuu Babilonia

REY Nabucodonosor rinebe ca israelita ni jma nanna xquídxibe Babilonia. Despué la? ribibe de lade ca binni que ca hombrehuiiniʼ jma galán ne nuu xpiaaniʼ. Raríʼ ruuyuʼ tapa. Tobi ca láʼ Daniel, ne xhonna hombrehuiiniʼ ca la? ca babiloniu ca gulee lá laacabe, Sadrac, Mesac, ne Abednego.

Nabucodonosor racalaʼdxiʼ gusiidiʼ laacabe para gúnicabe dxiiñaʼ ra palaciu stiʼ. Despué de chonna iza de guiziidíʼcabe la? zabibe cani jma nanna para gacané laabe lu ca guendanagana ni gápabe. Nabucodonosor racalaʼdxiʼ gaca ca hombrehuiiniʼ ca nadipaʼ, ngue runi rábibe ca hombre stibe gudii laacabe ca guendaró ne vinu ni ricaabe ne ca binnilídxibe.

Daniel, Sadrac, Mesac, ne Abednego cusiénecaʼ ni runi crecaʼ

Biiyaʼ Daniel. Ñee nannuʼ xi cayábibe Aspenaz, hombre risaca stiʼ Nabucodonosor la? Cayábibe laa de que qué zódibe de ca guendaró stiʼ rey que. Peru Aspenaz riuu xizaa, ne na rabi laabe: Rey ca maʼ guníʼ xi goto ne xi gueʼtu, yanna pa qué guihuínnitu nazaaca casi xcaadxi hombrehuiiniʼ ca la? zándaca guutibe naa.

Ngue runi Daniel guniʼné hombre guluu Aspenaz gapa laabe ne ca xhamígube ne rábibe laa: Bidii laadu chii gubidxa, ne bidii laadu verdura para guidoʼdo ne nisa si para guideʼdu. Óraque bichaaga laadu ne xcaadxi hombrehuiiniʼ ni cayó guendaró stiʼ rey ca, ne biiyaʼ tu rihuinni jma nazaaca.

Hombre ni cayapa laacabe que runi ni gudxi Daniel laa. Biaʼsi ora rizaa chii gubidxa que la? Daniel ne guionnaʼ xhamigu que jma nazaaca rihuínnicaʼ que xcaadxi hombrehuiiniʼ que, ngue runi maʼ qué ródiʼcabe ca guendaró stiʼ rey que sínuque rócabe puru si verdura.

Bizaa si chonna iza que la? guiráʼ ca hombrehuiiniʼ que rinécabe laacaʼ nezalú rey Nabucodonosor. Despué de riniʼné rey que laacabe la? ruuyabe de que Daniel ne ca guionnaʼ xhamigu nga jma nánnacaʼ, ngue runi, riaanacabe ra palaciu que para gacanécabe laa. Ne ora rey que rapa guendanagana la? riebe rinabadiidxabe Daniel, Sadrac, Mesac, ne Abednego, ne ruuyabe de que laacaʼ nánnacaʼ chii biaje jma que ca hombre ni ruzaaquiʼ guʼxhuʼ que ne ca ni nuu xpiaaniʼ stiʼ rey que.

Daniel 1:1-21.



Guendarinabadiidxaʼ

  • Tu láʼ guidapaʼ hombrehuiiniʼ cá lu dibuju riʼ, ne xiñee nuucabe Babilonia.
  • Xi racalaʼdxiʼ Nabucodonosor para guidapaʼ hombrehuiiniʼ riʼ, ne xi rábibe ca hombre stibe gúnicaʼ.
  • Xi gunabaʼ Daniel goné, gueʼné ca guionnaʼ xhamigu.
  • Ora rizaa chii gubidxa de gudó Daniel verdura ne guionnaʼ xhamigu que, ximodo rihuínnicabe que xcaadxi hombrehuiiniʼ que.
  • Xiñee rinécabe Daniel ne guionnaʼ xhamigu ra palaciu stiʼ rey que, ne ximodo nga jma nánnacabe que ca ni ruzaaquiʼ guʼxhuʼ ne ca ni nuu xpiaaniʼ que.

Xcaadxi guendarinabadiidxaʼ

  • Biindaʼ Daniel 1:1-21.

    Xi stipa naquiiñeʼ gúninu ti ganda gucaananu ca ni ruquiinde laanu gúninu ne gácanu naguidxi para cadi guiabayunu. (Dan. 1:8; Gén. 39:7, 10; Gál. 6:9.)

    Ximodo ndiʼ zanda guquiinde ca hombrehuiiniʼ guiráʼ ca ni na stuudxi galán ni nuu lu guidxilayú riʼ. (Dan. 1:8; Pro. 20:1; 2 Cor. 6:17-7:1.)

    Ximodo racané relatu stiʼ guidapaʼ hebreu que laanu para ganda guiénenu ca guendananna stiʼ guidxilayú riʼ. (Dan. 1:20; Isa. 54:13; 1 Cor. 3:18-20.)