Biiyaʼ guiraʼ ni nuu lu sitiu riʼ

guyé lu índice

Historia 74: Ti hombre ni qué ridxibi

Historia 74: Ti hombre ni qué ridxibi

BIIYAʼ ca binni cuxidxi de hombrehuiiniʼ ca. Nannuʼ tu hombrehuiiniʼ riʼ la? Laabe nga Jeremías, ti ni riguixhená risaca stiʼ Dios.

Cuxidxi ca binni ca Jeremías

Despué de bizulú rey Josías gundaa ca bidóʼ que la? Jiobá rábibe Jeremías gaca ni riguixhená Stibe. Jeremías riníʼ de que nahuiiniruʼ para gaca ni riguixhená. Peru Jiobá rábibe Jeremías de que zacanebe laa.

Jeremías rábibe ca israelita que gusaanacaʼ de gúnicaʼ ca guendaquéiquiiñeʼ sticaʼ. Ca dios runi adorar ca binni ni nabeza xcaadxi guidxi ca cadi dxandíʼ diʼ laacaʼ na Jeremías. Peru stale de ca israelita que jma nga riuláʼdxicabe guni adorárcabe ca bidóʼ ca que guni adorárcabe Jiobá, ti Dios ni dxandíʼ dxandipeʼ. Ora Jeremías rabi laacabe de que Dios zusabanáʼ laacabe pur ca guendaquéiquiiñeʼ stícabe la? ca binni que laca ruxídxicaʼ de Jeremías.

Ridiʼdiʼ stale iza para reeda gati Josías, ne chonna beeu despué xiiñibe Jehoiaquim reeda gaca rey. Jeremías cadi cayanadxí diʼ de gabi ca binni que: Jerusalén zanitilú pa laatu qué guchaatu. Ca hombre ruzaaquiʼ guʼxhuʼ que rigápicaʼ Jeremías ne rábicabe laabe: Naquiiñeʼ gátiluʼ purtiʼ caniʼluʼ guiráʼ ndiʼ. Óraque rábicabe ca príncipe stiʼ Israel: Jeremías naquiiñeʼ gati purtiʼ caniʼbe mal de xquídxinu.

Xi guni Jeremías yanna pue. ¡Laabe cadi cadxíbidibe! Ngue runi rábibe guiráʼ ca binni que: Jiobá biseenda naa para gabe ca diidxaʼ riʼ laatu. Pa qué guchaatu modo nabánitu la? laabe zunitilube Jerusalén. Peru gábecaʼ laatu: Pa guutitu naa la? gánnacatu de que chiguutitu ti hombre chaʼhuiʼ.

Ca príncipe que la? qué ruutidíʼcabe Jeremías, peru ca binni de Israel qué ruchaadicaʼ. Despué, Nabucodonosor rey stiʼ guidxi Babilonia reeda gucaalú Jerusalén, ne rinebe ca israelita que para gácacaʼ esclavu stibe. Rinebe stale binni Babilonia. ¡Guníʼ ique si xi ñaca pa ñeeda sti binni qué runibiaʼluʼ niné lii sti guidxi!

Jeremías 1:1-8; 10:1-5; 26:1-16; 2 Reyes 24:1-17.



Guendarinabadiidxaʼ

  • Tu hombrehuiiniʼ cá lu dibuju riʼ.
  • Xi riníʼ Jeremías ora rabi Jiobá laabe gácabe ni riguixhená, peru xi rabi Jiobá laabe.
  • Xi diidxaʼ rabi Jeremías ca binni que.
  • Ximodo racalaʼdxiʼ ca ni ruzaaquiʼ guʼxhuʼ que gucueeza Jeremías, ne ximodo rusihuínnibe de que cadi cadxíbibe.
  • Xi rizaaca ca israelita que pur qué gusaanacaʼ guendaquéiquiiñeʼ sticaʼ.

Xcaadxi guendarinabadiidxaʼ

  • Biindaʼ Jeremías 1:1-8.

    Casi rihuinni lu ejemplu stiʼ Jeremías, tu rusiidiʼ binni guni xhiiñaʼ Jiobá. (2 Cor. 3:5, 6.)

    Ximodo racané ejemplu stiʼ Jeremías ca ni nahuiiniʼ zinanda Cristu. (Ecl. 12:1; 1 Tim. 4:12.)

  • Biindaʼ Jeremías 10:1-5.

    Xi ejemplu de guendaridxagayaa biquiiñeʼ Jeremías para guluíʼ pabiáʼ nga qué iquiiñeʼ guni crenu ca bidóʼ ca. (Jer. 10:5; Isa. 46:7; Hab. 2:19.)

  • Biindaʼ Jeremías 26:1-16.

    Ximodo cuzuubaʼ xcaadxiʼ ni bibí para cheʼ guibáʼ diidxaʼ ni bidii Jiobá Jeremías de cadi gusiaadxacabe nin ti diidxaʼ ora quixhenácabe binni. (Jer. 26:2; Deu. 4:2; Hech. 20:27.)

    Xi ejemplu sicarú gulaʼquiʼ Jeremías para ca testigu stiʼ Jiobá ora quixhenácabe binni de ni na Jiobá chiguni. (Jer. 26:8, 12, 14, 15; 2 Tim. 4:1-5.)

  • Biindaʼ 2 Reyes 24:1-17.

    Guendaruchee stiʼ Judá que, ximodo nga guizáʼ feu modo bilúxeni. (2 Rey. 24:2-4, 14.)