Biiyaʼ guiraʼ ni nuu lu sitiu riʼ

guyé lu índice

Historia 73: Últimu rey chaʼhuiʼ stiʼ Israel

Historia 73: Últimu rey chaʼhuiʼ stiʼ Israel

XHONO ruʼ iza napa Josías ora reeda gácabe rey stiʼ chupa tribu ni nabeza ladu gueteʼ de guidxi Israel. Laabe la? nahuiinirube para gácabe rey, nga runi ca binni huaniisi que racané laabe para guni mandarbe guidxi que.

Despué de gadxe iza de naca Josías rey la? laabe ruyúbibe Jiobá. Ne laabe rácabe ti rey nachaʼhuiʼ casi David, Jehosafat ne Ezequías. Neca laabe nahuiinibe peru rúnibe xiixa ni rusihuinni pabiáʼ nadxibalube.

Binidé rey Josías ne ca xpinni ca bidóʼ ca

Maʼ napa dxi, stale de ca israelita que cayúnicaʼ puru si ni qué iquiiñeʼ. Laacabe runi adorárcabe ne rusuxíbicabe lu dios ni cadi dxandíʼ. Nga runi Josías ne ca hombre stiʼ ribeecabe guiráʼ dios ni cadi dxandíʼ ca ndaaniʼ guidxi que. Ndiʼ la? ti dxiiñaʼ guizáʼ naroʼbaʼ ni, purtiʼ stale binni runi adorar dios ni cadi dxandíʼ. Lu dibuju riʼ zanda guʼyuʼ Josías ne ca hombre stiʼ candaacaʼ ca bidóʼ ca.

Despué Josías rábibe chonna hombre guni chaahuiʼ yuʼduʼ stiʼ Jiobá. Ridopa bueltu stiʼ guidxi para guiaxa ca hombre riʼ. Ra cayúnicabe dxiiñaʼ ndaaniʼ yuʼduʼ que la? Hilquías, xaíque stiʼ cani ruzaaquiʼ guʼxhuʼ bidxélabe ti libru ni maʼ napa dxi de biniti ra zeeda ca ley stiʼ Jiobá ni bicaa Moisés dxiqué.

Ora rinécabe libru que ra nuu Josías la? laabe rinábabe guiuundaʼ ni, ne ora runadiágabe xiná ni la? ruuyabe de que ca binni que cadi cayúnidicaʼ ni na ley stiʼ Jiobá. Guizáʼ riuube triste dede richézabe xhábabe casi ruuyuʼ lu dibuju riʼ. Josías riníʼ: Jiobá cadxiichiné laanu, purtiʼ ca bixhózenu qué ñúnidiʼcaʼ ni na ca ley zeeda ndaaniʼ libru riʼ.

Safán ne rey Josías

Josías ruseendabe Hilquías xaíque stiʼ ca ni ruzaaquiʼ guʼxhuʼ chiguuyaʼ xi chiguni Jiobá laacabe. Hilquías rie ra nuu Huldá tobi de ca gunaa riguixhená stiʼ Jiobá ne rinabadiidxabe laa. Huldá rudii laabe ca diidxaʼ riʼ para chinebe ra nuu Josías: Jerusalén ne guiráʼ ca binni stiʼ zaca castigárcabe purtiʼ maʼ biʼniʼ adorárcabe ca dios ni cadi dxandíʼ ca ne maʼ bichácabe ca guidxi ca de guendaquéiquiiñeʼ. Peru cumu lii, Josías, gúcaluʼ nachaʼhuiʼ la? castigu chigueeda luguiácabe ca la? qué zuuyadiluʼ ni purtiʼ zeedaniáʼ ni despué de gátiluʼ.

2 Crónicas 34:1-28.



Guendarinabadiidxaʼ

  • Panda iza napa Josías ora reeda gácabe rey, ne xi rúnibe despué de gadxe iza de cayuni reinarbe.
  • Lu primé dibuju riʼ, xi cayuni Josías.
  • Xi ridxelaʼ xaíque stiʼ ca ni ruzaaquiʼ guʼxhuʼ que ora cayúnibe dxiiñaʼ ndaaniʼ yuʼduʼ que.
  • Xiñee richeza Josías xhaba.
  • Xi diidxaʼ stiʼ Jiobá rudii Huldá Josías.

Xcaadxi guendarinabadiidxaʼ

  • Biindaʼ 2 Crónicas 34:1-28.

    Xi ejemplu gulaʼquiʼ Josías para cani gudiʼdiʼ ra nagana dxi nahuiinicaʼ. (2 Cró. 33:21-25; 34:1, 2; Sal. 27:10.)

    Xi biʼniʼ Josías para gusanírube guendaruni adorar Dios jneza lu iza xhono, doce ne dieciocho dxi biʼniʼ reinarbe. (2 Cró. 34:3, 8.)

    Xi rizíʼdinu de ejemplu stiʼ rey Josías ne xaíque stiʼ ca ni ruzaaʼquiʼ guʼxhuʼ Hilquías de modo naquiiñeʼ gápanu ca yoo ra raca adorar Jiobá. (2 Cró. 34:9-13; Pro. 11:14; 1 Cor. 10:31.)