Biiyaʼ guiraʼ ni nuu lu sitiu riʼ

guyé lu índice

Historia 72: Dios racané Ezequías

Historia 72: Dios racané Ezequías

NANNUʼ xiñee caniʼné hombre riʼ Jiobá la? Xiñee naguíxhebe ca carta ca gaxha de altar ca pue. Hombre riʼ láʼ Ezequías, laabe nga rey stiʼ chupa tribu ni nabeza ladu gueteʼ de guidxi Israel. Ne nuube lu ti guendanagana guizáʼ naxoo. Peru xiñee yaʼ.

Cayuni orara rey Ezequías

Purtiʼ ca hombre ridinde stiʼ guidxi Asiria maʼ binduuxecaʼ chii tribu ni nabeza ladu guiaʼ que. Jiobá bidii lugar gaca ndiʼ purtiʼ nabé malu ca binni que, yanna ca hombre ridinde stiʼ guidxi Asiria maʼ zeedacaʼ luguiáʼ rey stiʼ xhupa tribu que.

Rey stiʼ guidxi Asiria biseenda carta ra nuu rey Ezequías. Ndiʼ nga ca carta ni gulaʼquiʼ rey Ezequías nezalú Dios. Laacani caníʼ cani mal de Jiobá ne rabi cani Ezequías gaca rendir. Nga runi Ezequías riniʼné Jiobá: Jiobá bilá laadu lu naʼ rey stiʼ guidxi Asiria ca. Óraque guiráʼ guidxi zanna de que lii si nga tobi lucha Dios. Zucaadiaga Jiobá laabe la?

Rey Ezequías guizáʼ nachaʼhuiʼ, qué ñácadibe casi xcaadxi rey malu stiʼ chii tribu stiʼ Israel, ne qué ñácadibe casi bixhózebe Acaz. Laabe bizuubabe diidxaʼ guiráʼ ca ley stiʼ Jiobá. Ngue runi, riluxe si Ezequías de guni orar la? Isaías ritidxi laabe xi na Jiobá: Rey stiʼ guidxi Asiria qué ziuu diʼ Jerusalén, ne nin ti soldadu stiʼ qué zadxiña gaxha. Qué zulaacabe nin ti flecha guidxi riʼ.

Biiyadxí lu dibuju riʼ. Nannuʼ tu ca gueʼtuʼ riʼ la? Nga nga ca asiriu. Jiobá biseenda ti ángel stiʼ, ne ti gueelaʼ si ángel riʼ biiti 185.000 soldadu stiʼ Asiria. Pur nga la? rey stiʼ guidxi Asiria ruxooñeʼ.

Guti ca soldadu stiʼ Asiria

Reinu stiʼ chupa tribu que rilá, ne guidxi que riuudxí caadxi dxi. Peru rati si Ezequías la? Manasés xiiñibe reeda gaca rey. Manasés ne xiiñibe Amón nabé malu rácacabe. Nga runi guidxi que nabé ridxá ni de guendaridinde ne guendaruchee. Ora ruuti ca xmozo Amón laa la? xiiñibe Josías reeda gaca rey stiʼ chupa tribu.

2 Reyes 18:1-36; 19:1-37; 21:1-25.



Guendarinabadiidxaʼ

  • Tu hombre cá lu dibuju riʼ, ne xiñee nuube lu ti guendanagana guizáʼ naxoo.
  • Xi carta gulaʼquiʼ Ezequías nezalú Dios, ne xi rinábabe laa lu oración.
  • Ximodo nga rey Ezequías, ne xi diidxaʼ stiʼ Jiobá riné Isaías ra nuube.
  • Casi rihuinni lu dibuju riʼ, xi runi ángel stiʼ Jiobá ca asiriu ca.
  • Nécaxa reinu stiʼ chupa tribu que riuudxicaʼ caadxi dxi, xi raca rati si Ezequías.

Xcaadxi guendarinabadiidxaʼ

  • Biindaʼ 2 Reyes 18:1-36.

    Ximodo racalaʼdxiʼ Rabsaqué, hombre riníʼ pur ca asiriu que, nuniti ca israelita que fe sticaʼ. (2 Rey. 18:19, 21; Éxo. 5:2; Sal. 64:3.)

    Ximodo zinanda ca testigu stiʼ Jiobá ejemplu stiʼ Ezequías ora gudxiilucaʼ xhenemígucaʼ. (2 Rey. 18:36; Sal. 39:1; Pro. 26:4; 2 Tim. 2:24.)

  • Biindaʼ 2 Reyes 19:1-37.

    Ora ridiʼdiʼ xquidxi Dios ra nagana ca dxi stinu riʼ, ximodo rúnicabe casi biʼniʼ Ezequías. (2 Rey. 19:1, 2; Pro. 3:5, 6; Heb. 10:24, 25; Sant. 5:14, 15.)

    Ximodo nga chonna ca biaje biniti rey Senaquerib, ne tu zeeda gaca casi gúcabe que. (2 Rey. 19:32, 35, 37; Apo. 20:2, 3.)

  • Biindaʼ 2 Reyes 21:1-6, 16.

    Xiñee zanda guininu de que Manasés guca tobi de ca rey jma qué iquiiñeʼ ni biʼniʼ mandar Jerusalén. (2 Cró. 33:4-6, 9.)