Biiyaʼ guiraʼ ni nuu lu sitiu riʼ

guyé lu índice

Historia 71: Dios na zuni Guidxilayú riʼ ti paraísu

Historia 71: Dios na zuni Guidxilayú riʼ ti paraísu

NDIʼ nga ti dibuju stiʼ ti paraísu ni zándaca biluíʼ Dios Isaías. Isaías nga ti ni riguixhená stiʼ Jiobá ni bibani despué de Jonás.

Nuu binni ndaaniʼ paraísu

Diidxaʼ paraísu riʼ la? riniʼni «jardín» o «parque». Rusietenalaʼdxiʼ nga lii xiixa ni maʼ biiyaluʼ lu riʼ la? Ya, jardín sicarú ni biʼniʼ Dios para Adán ne Eva que. Peru, ñee raʼbuʼ zaca ndiʼ guidubi naca Guidxilayú la?

Jiobá gúdxibe Isaías gucaa de paraísu cubi ni zeeda para ca xpinni Dios. Sicaríʼ bicaabe: Gueuʼ ne dendxuʼ zabánicaʼ tobi si. Yuzehuiiniʼ ne lionhuiiniʼ zazacaʼ tobi si ne ti baʼduhuiiniʼ si zapa laacame. Nin baʼduhuiiniʼ ni quite gaxha de ti beendaʼ malu qué zaca gastiʼ.

Nécapeʼ stale tu zaníʼ: Qué ziuu dxi gaca nga, guidxilayú riʼ nabé huayuu guendananá ne laacani qué zaree diʼ cani. Peru guníʼ ique si, paraa guluu Dios Adán ne Eva para guibani yaʼ.

Dios guluu laacabe ndaaniʼ ti paraísu. Cumu qué nuzuubacabe stiidxaʼ Dios la? biníticabe paraísu que, bióʼxhocabe ne gúticabe. Dios na de que cani nadxii laabe zudiibe laacaʼ cani biniti Adán ne Eva que.

Ndaaniʼ paraísu ca la? maʼ guirutiʼ tu zuniná nin zunitilú. Ziuu guendariuudxi, ne guiráʼ binni ziuu nazaaca ne nayecheʼ casi gucalaʼdxiʼ Dios ñaca primé que. Despué zazíʼdinu ximodo chiguni Dios ndiʼ.

Isaías 11:6-9; Apocalipsis 21:3, 4.



Guendarinabadiidxaʼ

  • Tuu nga Isaías, padxí bibánibe, ne xi biluíʼ Jiobá laabe.
  • Xi riníʼ diidxaʼ paraísu, ne xi rusietenalaʼdxiʼ ndiʼ laanu.
  • Xi gudxi Jiobá Isaías ni naquiiñeʼ gucaabe de Paraísu cubi ni zeeda ca.
  • Xiñee biniti Adán ne Eva paraísu ra bibánicabe que.
  • Xi riníʼ Dios para cani nadxii laabe.

Xcaadxi guendarinabadiidxaʼ

  • Biindaʼ Isaías 11:6-9.

    Ximodo riníʼ Biblia de guendariuudxi ni ziuu lade binni ne lade ca maniʼ ca ndaaniʼ Guidxilayú cubi zeeda ca. (Sal. 148:10, 13; Isa. 65:25; Eze. 34:25.)

    Ximodo cayaca ca diidxaʼ ni cá lu Isaías lade xquidxi Jiobá ca dxi stinu riʼ. (Rom. 12:2; Efe. 4:23, 24.)

    Tuu nga naquiiñeʼ guisaca pur modo cuchaa binni yanna ne ca dxi chigueeda ca. (Isa. 48:17, 18; Gál. 5:22, 23; Fili. 4:7.)

  • Biindaʼ Apocalipsis 21:3, 4.

    Nécaxa Biblia na de que Dios nabani lade binni, ximodo nánnanu de que ndiʼ qué riníʼ diʼ de que xcuérpube nuu lu Guidxilayú riʼ. (Lev. 26:11, 12; 2 Cró. 6:18; Isa. 66:1; Apo. 21:2, 3, 22-24.)

    Xii ndiʼ ca ni rusiguunaʼ ne rusiuubaʼ binni ni zaree lu Guidxilayú riʼ. (Luc. 8:49-52; Rom. 8:21, 22; Apo. 21:4.)