Biiyaʼ guiraʼ ni nuu lu sitiu riʼ

guyé lu índice

Historia 69: Ti dxaapahuiiniʼ racané ti xaíque

Historia 69: Ti dxaapahuiiniʼ racané ti xaíque

NANNUʼ xi caníʼ dxaapahuiiniʼ riʼ la? Caníʼnebe gunaa ca de Eliseo ne de ca guendaridxagayaa ni racané Jiobá laa guni. Gunaa ca qué ganna diʼ gastiʼ de Jiobá purtiʼ cadi israelita diʼ laa. Nga runi, guidúʼyanu xiñee nuu dxaapahuiiniʼ riʼ ralidxi gunaa ca.

Gunaa ca la? de guidxi Siria laa. Xheelabe nga Naamán, xaíque stiʼ ca hombre ridinde de Siria. Ca siriu ca gunaazecabe dxaapahuiiniʼ israelita riʼ, ne yanna racanebe xheelaʼ Naamán.

Xheelaʼ Naamán ne criadahuiiniʼ stiʼ

Naamán napa ti guendahuará guizáʼ malu láʼ lepra. Guendahuará riʼ la? rusábani beela ladi binni. Ndiʼ nga ni caníʼ dxaapahuiiniʼ ca: Pa patrón stinneʼ niná ñe ra nuu ni riguixhená stiʼ Jiobá nuu Israel la? laa nusianda laabe de lepra ca. Despué la? rábicabe ni xheelaʼ gunaa ca.

Naamán racalaʼdxiʼ guianda; nga runi riebe guidxi Israel. Ora ridxíñabe raqué la? riebe ralidxi Eliseo. Eliseo rabi xmozo chitidxi Naamán chuʼ ndaaniʼ guiiguʼ Jordán que gadxe tiru. Naamán guizáʼ ridxiichi, ne riníʼ: ¡Ca guiiguʼ nuu xquidxeʼ jma galán cani que guiráʼ guiiguʼ nuu Israel! Guníʼsibe ngue la? ziécabe.

Peru ca xmózobe na rabi laabe: Señor, pa Eliseo ñabi lii ñuʼnuʼ xiixa nagana ñee cadi ñuʼnuʼ ni la? Yanna, ñee qué zanda chuʼluʼ ndaaniʼ nisa ca casi nabe ca la? Naamán rucaadiaga ni na ca xmozo ne riuube ndaaniʼ guiiguʼ que gadxe tiru. Ora bireebe la? biándabe ne biguidxi ládibe.

Naamán guizáʼ riuu nayecheʼ, ngue runi ribiguétabe ra nuu Eliseo ne rábibe laa: Yanna maʼ nannaʼ de que Dios stiʼ Israel nga tobi lucha Dios stiʼ guidubi naca Guidxilayú. Nga runi, gucuaa laʼ ni chigusigaʼdeʼ lii riʼ. Peru Eliseo na: Coʼ, qué zacaadiaʼ ni. Laabe nánnabe de que cadi galán diʼ guicaabe ni cusigaʼdeʼ Naamán laabe purtiʼ Jiobá nga bisianda Naamán. Peru Guehazí mozo stiʼ Eliseo nuu guicaa ni.

Ngue runi, rie si Naamán la? Guehazí riugaanda laabe ne na: Eliseo biseenda naa gabe lii gudiiluʼ laabe caadxi de ni cusigáʼdeluʼ laabe que, para caadxi biuuza ni bedandá. Ni guníʼ Guehazí ca cadi dxandíʼ diʼ ni. Peru Naamán qué ganna diʼ, pur nga runi rudiibe Guehazí caadxi de laacani.

Ora bibiguetaʼ Guehazí la? Eliseo mápeca nanna xi bíʼnibe, purtiʼ Jiobá maʼ gudxi ni laabe. Nga runi nabe: Pur ni bíʼniluʼ riʼ la? lepra gupa Naamán ca, zacá ni lii. Ne qué rindaa diʼ zaquepeʼ raca.

Xi zanda guiziidinu de guiráʼ ndiʼ yaʼ. Primé la? de que naquiiñeʼ gácanu casi dxaapahuiiniʼ que, ne guininu de Jiobá. Ziuunu galán pa gúninu ni. Guiropa la? cadi gudxiibanu laanu casi guca Naamán primé que, sínuque guzuubanu stiidxaʼ cani runi ni na Jiobá. Ne guionna la? cadi gusiguiinu casi bisuguii Guehazí. Dxandíʼ nga zanda guiziidinu stale de ni rusiidiʼ Biblia njaʼ.

2 Reyes 5:1-27.



Guendarinabadiidxaʼ

  • Xi cayabi dxaapahuiiniʼ cá lu dibuju riʼ gunaa ca.
  • Tuu nga gunaa cá lu dibuju riʼ, ne xiñee nuu dxaapahuiiniʼ ca ralídxibe.
  • Xi rabi Eliseo mozo stiʼ chitidxi Naamán, ne xiñee ridxiichi hombre riʼ.
  • Xi raca ora rucaadiaga Naamán ca mozo stiʼ.
  • Xiñee qué niná Eliseo nicaa ni cusigaʼdeʼ Naamán laa, ne xi runi Guehazí.
  • Xi rizaaca Guehazí, ne xi rizíʼdinu de ni gúcabe riʼ.

Xcaadxi guendarinabadiidxaʼ

  • Biindaʼ 2 Reyes 5:1-27.

    Ejemplu stiʼ dxaapahuiiniʼ israelita que, ximodo racaneni cani nahuiiniʼ nuu yanna riʼ. (2 Rey. 5:3; Sal. 8:2; 148:12, 13.)

    Xiñee galán guietenaláʼdxinu ejemplu stiʼ Naamán ora gulídxicabe laanu ne Biblia. (2 Rey. 5:15; Heb. 12:5, 6; Sant. 4:6.)

    Xi rizíʼdinu ora gúʼyanu de que gadxepeʼ nga ejemplu stiʼ Eliseo ne Guehazí. (2 Rey. 5:9, 10, 14-16, 20; Mat. 10:8; Hech. 5:1-5; 2 Cor. 2:17.)