Biiyaʼ guiraʼ ni nuu lu sitiu riʼ

guyé lu índice

Historia 68: Chupa hombrehuiiniʼ ribiguetaʼ ribani

Historia 68: Chupa hombrehuiiniʼ ribiguetaʼ ribani

PA LII ñátiluʼ, ximodo raʼbuʼ ñuu jñaaluʼ pa nibiguetaʼ nibániluʼ yaʼ. Ñee cadi guizáʼ ñéchebe la? Peru, ñee zanda guibani tobi ni maʼ guti la? Huayaca ndiʼ dxiqué la?

Biiyaʼ hombre cá lu dibuju riʼ, gunaa ne hombrehuiiniʼ ca. Hombre ca labe Elías, ti ni riguixhená stiʼ Dios. Gunaa ca la? ti viuda de guidxi Sarepta laabe, xiiñibe nga hombrehuiiniʼ ca. Cadi xa ti dxi hombrehuiiniʼ ca raca huará, guizáʼ malu riuube dede rátibe. Óraque na Elías rabi jñaabe: Dané naa hombrehuiiniʼ ca.

Elías bisibani xiiñiʼ ti viuda

Elías riné laabe ndaaniʼ sti cuartu nuu luguiáʼ ne raqué ribaʼquiʼ laabe lu ti luunaʼ. Óraque riníʼnebe Jiobá: Jiobá bisibani laʼ hombrehuiiniʼ riʼ. ¡Ne hombrehuiiniʼ que ricaa bi! Óraque Elías rindeteʼ laabe ne rabi jñaabe: ¡Biiyaʼ, xiiñiluʼ nabani! Guizáʼ rusiecheʼ ndiʼ laabe xa.

Sti ni riguixhená risaca stiʼ Jiobá nga Eliseo. Laabe racanebe Elías. Peru despué la? Jiobá laaca biquiiñeʼ Eliseo para guni milagru. Ti dxi, ora Eliseo rie ti guidxi láʼ Sunem la? Ti gunaa nabé raca nachaʼhuiʼ ne laabe. Despué gunaa riʼ rapa ti xiiñiʼ.

Biniisi si hombrehuiiniʼ riʼ la? bireebe ti siadóʼ zebe lu layú ra runi bixhózebe dxiiñaʼ. Málasi bibidxiaabe: ¡Guizáʼ cayuubaʼ ique! Ora rinécabe laabe ralídxibe la? raqué rátibe. ¡Aque triste riuu jñaabe xa! Oraqueca riyubi guxooñebe Eliseo.

Ora reeda Eliseo la? riuube ndaaniʼ cuartu ra nuu hombrehuiiniʼ maʼ guti que. Riníʼnebe Jiobá, ne óraque ráʼtabe luguiáʼ gueʼtuʼ que. Nin qué nindaa ridxaa ladi hombrehuiiniʼ que, ne laabe ruxhiáxibe gadxe tiru. ¡Pabiáʼ riecheʼ jñaabe ora riuu ndaaniʼ cuartu que ne ruuyaʼ laabe nabánibe yaʼ!

Stale binni maʼ guti ne ndiʼ huayuniná ca binnilídxicabe ne xhamígucabe. Laanu qué zanda diʼ gusibáninu gueʼtuʼ, peru Jiobá zanda guni ni. Despué zadúʼyanu de que laabe zandísabe millón binni para guibani sti biaje.

1 Reyes 17:8-24; 2 Reyes 4:8-37.


Guendarinabadiidxaʼ

  • Tu guionnaʼ binni rihuinni lu dibuju riʼ, ne xi raca hombrehuiiniʼ riʼ ti dxi.
  • Xi rinabaʼ Elías lu oración pur hombrehuiiniʼ riʼ, ne xi raca despué.
  • Tu láʼ hombre ni racané Elías.
  • Xiñee rinábacabe Eliseo cheʼ ralidxi ti gunaa ni nabeza guidxi Sunem.
  • Xi runi Eliseo, ne xi raca ne baʼduhuiiniʼ ni maʼ guti ca.
  • Xi poder napa Jiobá, casi modo bisihuínnibeni pur Elías ne Eliseo.

Xcaadxi guendarinabadiidxaʼ

  • Biindaʼ 1 Reyes 17:8-24.

    Ximodo bihuinni pa dxandíʼ bizuubaʼ Elías diidxaʼ ne gúpabe fe. (1 Rey. 17:9; 19:1-4, 10.)

    Xiñee nabé naroʼbaʼ fe gupa viuda de Sarepta que. (1 Rey. 17:12-16; Luc. 4:25, 26.)

    Ni bizaaca viuda de Sarepta que, ximodo bisihuinni ni de que ca diidxaʼ stiʼ Jesús ni cá lu Mateo 10:41, 42 dxandíʼ cani. (1 Rey. 17:10-12, 17, 23, 24.)

  • Biindaʼ 2 Reyes 4:8-37.

    Xi rusiidiʼ gunaa de Sunem que laanu de modo guidxagalunu binni. (2 Rey. 4:8; Luc. 6:38; Rom. 12:13; 1 Juan 3:17.)

    Ximodo zanda gácanu nachaʼhuiʼ ne ca xpinni Dios ca dxi stinu riʼ. (Hech. 20:35; 28:1, 2; Gál. 6:9, 10; Heb. 6:10.)