Biiyaʼ guiraʼ ni nuu lu sitiu riʼ

guyé lu índice

Historia 66: Jezabel ti reina qué iquiiñeʼ

Historia 66: Jezabel ti reina qué iquiiñeʼ

DESPUÉ de guti rey Jeroboán la? guiráʼ rey ni guni gobernar lu chii tribu stiʼ Israel rácacaʼ malu. Peru Acab nga pior de guirácabe. Nannuʼ xiñee la? Pur xheelabe Jezabel, ti reina ni qué iquiiñeʼ.

Jezabel cadi israelita diʼ laa. Xiiñiʼ ti rey de Sidón laabe, ne runi adorarbe Baal ti dios ni cadi dxandíʼ, ne rucaabe Acab ne xcaadxi binni Israel guni adorarcaʼ Baal. Laabe nanaláʼdxibe Jiobá ne ruutibe ca ni riguixhená stiʼ. Xcaadxi naquiiñeʼ gucachilucaʼ ndaaniʼ cueva ti cadi guutibe laacaʼ. Ne pa laabe racaláʼdxibe xiixa la? dede ruutibe tuuxa ti ganda guicaabe ni.

Ti dxi rey Acab guizáʼ nuu triste. Ngue runi Jezabel rabi laabe: Xiñee nuuluʼ triste.

Pur ni gudxi Nabot naa, bicabi Acab. Gucalaʼdxeʼ niziéʼ laxhiube, peru qué ninádibe.

Cadi guizalaʼdxuʼ na Jezabel, naa zaziéʼ ni para lii.

Ngue runi Jezabel rucaabe ti guiʼchiʼ ra nuu caadxi hombre risaca de xquidxi Nabot. Rábibe laacaʼ: Laucaa caadxi hombre qué iquiiñeʼ guiniʼcaʼ de que Nabot maʼ guluube diʼ Dios ne rey ca, ne lacuee laabe ndaaniʼ guidxi ca ne laguchá guié laabe dede gátibe.

Cásipeʼ ranna Jezabel de que Nabot maʼ guti la? rábibe Acab: Guyé yanna ne gucuaa laxhiube. Ñee cadi dxandíʼ naquiiñeʼ ñati Jezabel pur guiráʼ ni bíʼnibe riʼ la?

Reina Jezabel

Pur nga runi, qué nindaa diʼ Jiobá biseenda Jehú para guuti laabe. Ora runadiaga Jezabel zeeda Jehú la? rutieeca lú ne racalaʼdxiʼ guihuinni jma galán. Peru ora yendá Jehú ne ruuyaʼ laabe ra ventana que la? rábibe ca hombre nuu ra palaciu que: ¡Lacuee yaande laabe de racá! Ca hombre que bizuubacaʼ diidxaʼ casi ruuyuʼ lu dibuju riʼ. Gulee yaandecabe laabe ne gútibe. Zaqué biluxe reina qué iquiiñeʼ que.

1 Reyes 16:29-33; 18:1-4; 21:1-16; 2 Reyes 9:30-37.



Guendarinabadiidxaʼ

  • Tuu nga Jezabel.
  • Xiñee riuu rey Acab triste.
  • Xi biʼniʼ Jezabel para ganda guicaabe laxhiú Nabot para xheelabe Acab.
  • Tu biseenda Jiobá para guuti Jezabel.
  • Casi rihuinni lu dibuju riʼ, xi raca ora ridxiña Jehú ra palaciu stiʼ Jezabel.

Xcaadxi guendarinabadiidxaʼ

  • Biindaʼ 1 Reyes 16:29-33 ne 18:3, 4.

    Pabiáʼ qué iquiiñeʼ guca ca binni de Israel ca dxi stiʼ rey Acab. (1 Rey. 14:9.)

  • Biindaʼ 1 Reyes 21:1-16.

    Ximodo bisihuinni Nabot de que qué nidxíbidiʼ ne qué nusaanadiʼ Jiobá. (1 Rey. 21:1-3; Lev. 25:23-28.)

    Xi rusiidiʼ ejemplu stiʼ Acab laanu de modo gácanu ora chuuláʼdxinu xiixa ne qué zanda icaanuni. (1 Rey. 21:4; Rom. 5:3-5.)

  • Biindaʼ 2 Reyes 9:30-37.

    Xi rizíʼdinu de guendadxibaguí ni gupa Jehú para bíʼnibe ni na Jiobá. (2 Rey. 9:4-10; 2 Cor. 9:1, 2; 2 Tim. 4:2.)