Biiyaʼ guiraʼ ni nuu lu sitiu riʼ

guyé lu índice

Historia 63: Salomón ti rey guizáʼ nuu xpiaaniʼ

Historia 63: Salomón ti rey guizáʼ nuu xpiaaniʼ

NAHUIINIRUʼ Salomón reeda gaca rey. Nadxiibe Jiobá ne rúnibe guiráʼ ni gudxi bixhózebe laabe. Jiobá riuláʼdxibe modo Salomón, ngue runi ti gueelaʼ rábibe laa lu ti bacaandaʼ: Salomón, xi racalaʼdxuʼ gudiéʼ lii.

Salomón ricabi laabe: Jiobá, Dios stinneʼ, naa nahuiineruáʼ ne qué gannaʼ guneʼ gobernar. Nga runi, dané naa guendananna ti guneʼ gobernar guidxi stiuʼ jneza.

Jiobá guizáʼ riulaʼdxiʼ ni rinabaʼ Salomón. Nga runi nabe: Purtiʼ gunabuʼ guendananna ne qué ninabuʼ nibanu xadxí nin bidxichi la? zudiéʼ lii guendananna jma que ni huayapa tutiica binni ni huabani dede nagasi. Peru cadi ngasi diʼ, naa zudiéʼ lii cani qué ninabuʼ, ya, zudiéʼ lii stale bidxichi ne stale guendanaróʼ.

Gupa dxi chupa gunaa riné ti guendanagana ra nuu Salomón. Naa ne gunaa riʼ la? nabézadu ndaaniʼ ti yoo si, na ti gunaa que. Naa gupa ti baʼduhuiiniʼ ne chupa gubidxa despué la? laabe laaca gúpabe ti baʼduhuiiniʼ. Ti gueelaʼ xiiñibe guti, peru laga nisiaaseʼ la? laabe yendáquibe baʼduhuiiniʼ guti que cueʼ ne zinebe xiiñeʼ. Ora bibaneʼ biiyaʼ baʼduhuiiniʼ guti que la? gúnnacaʼ de que cadi xiiñeʼ diaʼ laabe.

Ora binadiaga sti gunaa que la? na: ¡Coʼ! ¡Ni nabani ca xiiñeʼ ne ni maʼ guti ca xiiñibe! Óraque ricabi primé gunaa que: ¡Coʼ! ¡Ni maʼ guti ca stiuʼ ne ni nabani ca stinneʼ! Zaqué nuu ca gunaa que cadíndecaʼ. Xi guni Salomón yanna pue.

Salomón rinabaʼ ti espada, ne ora redanécabe ni la? riniʼbe: Laugá baʼduhuiiniʼ nabani ca ne lagudii cada tóbicabe galaa galaa.

¡Coʼ! ribidxiaa ni dxandíʼ jñaa baʼduhuiiniʼ que. Cadi guutitu baʼduhuiiniʼ ca. ¡Lagudii laabe gunaa ca! Peru sti gunaa que na: Cadi gudiitu laabe nin tobi de laadu, laugá laabe chupa ndaa.

Biʼniʼ chaahuiʼ rey Salomón ti guendanagana

Óraque na Salomón: ¡Cadi guutitu baʼduhuiiniʼ ca! Lagudii laabe primé gunaa ca. Laabe nga dxandíʼ jñaa baʼduhuiiniʼ ca. Salomón biiyabe de que primé gunaa riʼ guizáʼ nadxii xiiñiʼ dede nuube gudiibe laa sti gunaa que para cadi guuticabe laa. Ora binadiaga ca binni que ximodo guleebe ca gunaa riʼ lu guendanagana stiʼ ca la? biéchecabe stale pur gápacabe ti rey guizáʼ nuu xpiaaniʼ.

Ca dxi biʼniʼ gobernar Salomón que la? Dios ruguu ndaayaʼ guidxi que, ne laxhiúcabe rudii stale trigu, cebada, uva ne duʼgaʼ ne xcaadxi cuananaxhi. Ca binni que ribáʼquicaʼ lari galán ne ribézacaʼ ndaaniʼ yoo sicarú. Ne casi ca ndiʼ nuu stale para guirácabe.

1 Reyes 3:3-28; 4:29-34.



Guendarinabadiidxaʼ

  • Xi rinabadiidxaʼ Jiobá Salomón, ne ximodo ricábibe.
  • Pur guyuulaʼdxiʼ Jiobá ni gunabaʼ Salomón que, xi guniʼbe zudiibe laa.
  • Xi guendanagana riné chupa gunaa ra nuu Salomón.
  • Casi rihuinni lu dibuju riʼ, ximodo ruchiá Salomón guendanagana que.
  • Ximodo guca ca dxi biʼniʼ gobernar Salomón que, ne xiñee.

Xcaadxi guendarinabadiidxaʼ

  • Biindaʼ 1 Reyes 3:3-28.

    Xi riziidiʼ ca ni zaniruʼ ndaaniʼ xquidxi Jiobá de ca stiidxaʼ Salomón ni cá lu 1 Reyes 3:7. (Sal. 119:105; Pro. 3:5, 6.)

    Xiñee naca ni gunabaʼ Salomón que ti ejemplu sicarú de ni zanda guinábanu Dios ora guiníʼnenu laa. (1 Rey. 3:9, 11; Pro. 30:8, 9; 1 Juan 5:14.)

    Ximodo ratadxí ladxidoʼno gánnanu modo zuni mandar Salomón huaniisi Jesucristu, cásica biʼniʼ Salomón ora bichiabe guendanagana gupa ca gunaa que. (1 Rey. 3:28; Isa. 9:6, 7; 11:2-4.)

  • Biindaʼ 1 Reyes 4:29-34.

    Ximodo bicabi Jiobá ora gunabaʼ Salomón laabe ti ladxidóʼ ni ruzuubaʼ diidxaʼ. (1 Rey. 4:29.)

    Ca binni de dxiqué bíʼnicabe stipa pur chigunadiágacabe guendananna stiʼ Salomón, yanna laanu xi ñaquiiñeʼ gúninu ti ganda gúʼndanu Stiidxaʼ Dios. (1 Rey. 4:29, 34; Juan 17:3; 2 Tim. 3:16.)