Biiyaʼ guiraʼ ni nuu lu sitiu riʼ

guyé lu índice

Historia 54: Ti hombre ni jma nadipaʼ

Historia 54: Ti hombre ni jma nadipaʼ

NANNUʼ tu láʼ hombre jma nadipaʼ ni huabani la? Labe Sansón ne nácabe juez. Jiobá nga rudii laabe stipa ni nápabe ca. Dede ante gálebe Jiobá na rabi jñaabe: Qué zandaadiʼ zapuʼ ti xiiñuʼ, ne laabe zulabe guidxi Israel de ca filisteu ca.

Cadxelasaa Sansón ti lión

Ca filisteu ca nabézacabe ndaaniʼ guidxi Canaán ne puru binni qué iquiiñeʼ laacabe. Nápacabe stale binni ridinde ne runinácabe ca israelita. Ti dxi ora zeʼ Sansón ra nabeza ca filisteu la? biree ti lión ngola cuguu beedxeʼ laabe. Peru Sansón ruuti lión que ne náʼ si. Laaca ruutibe gayuaa de ca filisteu qué iquiiñeʼ que.

Despué Sansón guyuláʼdxibe stálepeʼ ti gunaa láʼ Dalila. Ca xaíque stiʼ ca filisteu ca guniʼcaʼ gudiicaʼ Dalila 1.100 plata pa laa gabi laacabe xii nga runi de que Sansón gaca nadipaʼ. Dalila racalaʼdxiʼ bueltu ca. Cadi dxandíʼ diʼ xhamígube Sansón, nin xquidxi Dios. Ngue runi laabe gunabadiidxarube Sansón xiñee nabé nadipaʼ.

Dalila ne Sansón

Despué la? Dalila bidxélabe modo gabi Sansón laabe xiñee nadipaʼ. Qué huayuu dxi ugácabe guicha iqueʼ na Sansón rabi laabe. Dede dxi guleʼ, Dios gulí naa para guneʼ ni na ne guiree layaʼ nazareu. Pa nugácabe guicha iqueʼ la? nuniteʼ stipa stinneʼ.

Ora Dalila runadiaga ndiʼ la? ruyúbibe modo gasi Sansón lu ñeebe. Óraque ricaabe ti hombre para ugá guicha ique Sansón. Ora ribani Sansón la? rudii cuenta maʼ cadi nadipaʼ. Oraqueruʼ riuu ca filisteu que rinaazecaʼ laabe. Ráxhacaʼ guiropaʼ bezalube ne rúnicaʼ laabe esclavu sticaʼ.

Cucaanáʼ Sansón ca pilar

Ti dxi cayuni ca filisteu que ti saa roʼ para guni adorárcabe dios stícabe, Dagón. Lu saa que rindeecabe Sansón de ndaaniʼ lidxi guiibaʼ para guxídxicabe de laa. Peru guicha ique Sansón maʼ bigaa sti biaje. Nga runi rábibe xcuidihuiiniʼ ziné laabe que: Bicaa laʼ nayaʼ cueʼ pilar nuaʼ yoo ca. Óraque Sansón rinábabe Jiobá stipa ne despué rigápibe ca pilar que, ne rucaabe ridxi: Bidii lugar gateniáʼ ca filisteu riʼ. Nuu 3.000 filisteu ra cayaca saa que, peru ora bicaanáʼ Sansón ca pilar que la? yoo roʼbaʼ que riaba ni ne ruutini guiráʼ ca binni qué iquiiñeʼ que.

Jueces, capítulo 13 hasta 16.



Guendarinabadiidxaʼ

  • Tu láʼ hombre jma nadipaʼ ni huabani, ne tu bidii laabe stipa nápabe.
  • Xi biʼniʼ Sansón ne lión ni rihuinni lu dibuju riʼ.
  • Xi cayabi Sansón Dalila casi ruuyuʼ lu dibuju riʼ, ne ximodo rinaaze ca filisteu que laabe.
  • Ximodo ruuti Sansón 3.000 filisteu dxi ca rátibe que.

Xcaadxi guendarinabadiidxaʼ

  • Biindaʼ Jueces 13:1-14.

    Xiñee naca Manóah ne xheelaʼ ti ejemplu sicarú para cani cusiniisi xiiñiʼ. (Jue. 13:8; Sal. 127:3; Efe. 6:4.)

  • Biindaʼ Jueces 14:5-9 ne 15:9-16.

    Ximodo bihuinni espíritu santu stiʼ Jiobá luguiáʼ Sansón ra biitibe ti lión, ne ra bichuugube ca doo cubi ni bindibinécabe laabe ne ora biquiiñebe dxita xhaga ti burru para guutibe ti 1.000 hombre.

    Ximodo racané espíritu santu laanu ca dxi stinu riʼ. (Jue. 14:6; 15:14; Zac. 4:6; Hech. 4:31.)

  • Biindaʼ Jueces 16:18-31.

    Ximodo bininá ca binni malu bidxaaga Sansón que laa, ne xi rizíʼdinu de laani. (Jue. 16:18, 19; 1 Cor. 15:33.)