Biiyaʼ guiraʼ ni nuu lu sitiu riʼ

guyé lu índice

Historia 53: Ni bizabiruaa Jefté

Historia 53: Ni bizabiruaa Jefté
Xiiñidxaapaʼ Jefté

HUAYUU dxi huazabiruaaluʼ xiixa ni despué guca nagana para lii guʼnuʼ la? Zacapeʼ nga guca hombre cá lu dibuju riʼ, ne pur nga nuube triste. Labe Jefté, ti juez nadxibalú de Israel.

Jefté bibani dxi ca israelita que maʼ qué runi adorarcaʼ Jiobá. Laacabe cayúnicabe ni qué iquiiñeʼ sti tiru. Nga runi Jiobá rudii lugar guniná ca xpinni Ammón laacabe. Ca israelita ca rucaacabe ridxi Jiobá: Maʼ bichéʼnedu lii. ¡Bilá laadu!

Jefté ne ca xpinni

Ca binni que guizáʼ feu riuucaʼ pur cani qué iquiiñeʼ bíʼnicaʼ. Rusihuínnicabe ni ra ribiguetaʼ runi adorárcabe Jiobá. Ngue runi, Jiobá racané laacabe sti biaje.

Ca binni guidxi que ribícabe Jefté para gucaalú ca ammonita que. Caquiiñepeʼ Jefté gacané Jiobá laa lu guendaridinde stiʼ. Ngue runi rábibe Jiobá: Pa lii gudiiluʼ lugar guneʼ ganar la? zudiéʼ lii primé binni guiree de ralidxeʼ gueeda guidxagalú naa ora guibiguetaʼ de lu guendaridinde riʼ.

Jiobá runadiaga ni bizabiruaa Jefté, ne laabe racanebe laa guni ganar. Ora Jefté ribiguetaʼ, nannuʼ tu primé binni ridxagalú laabe la? Tobi lucha xiiñibe. ¡Ay xiiñehuiineʼ! ruuna Jefté. ¡Xii nga biʼnuʼ naa pue! Peru naa bizaberuaa Jiobá xiixa, ne yanna qué zándadiʼ cue atrá de ni maʼ guniéʼ ca.

Ora ranna xiiñiʼ Jefté de ni maʼ bizabiruaa bixhoze la? laaca riuube triste pur gusaanabe bixhózebe ne ca xhamígube. Peru zúnibe ni na Jiobá guidubi naca xquendanabánibe ndaaniʼ tabernáculo stiʼ guidxi Siló. Ngue runi rábibe Jefté: Pa maʼ bizabiruaaluʼ xiixa ne Jiobá la? napuʼ xidé guʼnuʼ ni.

Ngue runi xiiñiʼ Jefté riebe guidxi Siló, ne rúnibe ni na Jiobá guidubi naca xquendanabánibe ndaaniʼ tabernáculo que. Ca gunaa de Israel rigánnacaʼ laabe tapa gubidxa lu ti iza ne guirácabe riuucabe nayecheʼ caadxi dxi. Ca binni que nadxiicaʼ xiiñiʼ Jefté purtiʼ rúnibe ni na Dios stibe, Jiobá.

Jueces 10:6-18; 11:1-40.



Guendarinabadiidxaʼ

  • Tuu nga Jefté ne xi dxi bibánibe.
  • Xi ruzabiruaa Jefté Jiobá.
  • Xiñee riuu Jefté triste ora bibiguétabe ralídxibe despué de biʼniʼ ganarbe ca ammonita que pue.
  • Xi riníʼ xiiñiʼ Jefté ora ránnabe de ni maʼ bizabiruaa bixhózebe.
  • Xiñee nadxii ca binni que xiiñiʼ Jefté.

Xcaadxi guendarinabadiidxaʼ

  • Biindaʼ Jueces 10:6-18.

    Xi guendarulidxi naquiiñeʼ gucaadiáganu de ni bizaaca ca israelita que lu xquendanabánicaʼ ora bisaanacaʼ Jiobá. (Jue. 10:6, 15, 16; Rom. 15:4; Apo. 2:10.)

  • Biindaʼ Jueces 11:1-11, 29-40.

    Ximodo nánnanu de que ora bidii Jefté xiiñiʼ casi «ofrenda ni riaʼquiʼ» cadi dxandíʼ diʼ bizaaquicabe laabe. (Jue. 11:31; Lev. 16:24; Deu. 18:10, 12.)

    Ximodo ndiʼ bidii Jefté xiiñiʼ casi ti ofrenda ni riaʼquiʼ.

    Xi rizíʼdinu de modo bicabi Jefté voto bíʼninebe Jiobá. (Jue. 11:35, 39; Ecl. 5:4, 5; Mat. 16:24.)

    Ximodo zanda chinanda cani nahuiiniʼ ni zinanda Cristu, ejemplu stiʼ xiiñiʼ Jefté ora guzulúcabe gúnicabe xhiiñaʼ Jiobá guiráʼ ora. (Jue. 11:36; Mat. 6:33; Fili. 3:8.)