Biiyaʼ guiraʼ ni nuu lu sitiu riʼ

guyé lu índice

Historia 48: Ca gabaonita nuu xpiaaniʼ

Historia 48: Ca gabaonita nuu xpiaaniʼ

STALE de ca guidxi stiʼ Canaán cayuucaʼ listu para tindenecaʼ guidxi Israel. Nacaʼ zanda guni ganarcaʼ, peru ca binni de Gabaón, qué riníʼ íquecaʼ zacá. Laacabe runi crécabe de que Dios nga cayacané ca israelita ca, nga runi qué nacaʼ gucaalucaʼ Dios. Ngue runi, nannuʼ xi runi ca gabaonita ca la?

Guníʼ stiidxacabe gusihuínnicabe de que nabézacabe zítupeʼ. Ngue runi caadxi de laacabe la? ribáʼquicaʼ lari yuxe ne rucaa ñeecaʼ guelaguidi yooxhoʼ, ne ruguáʼcabe sacu yuxe ne pan chonga burru stícabe. Óraque riécabe ra nuu Josué ne rábicabe laa: Ziuupadu de ti guidxi zitu, purtiʼ binadiágadu de Dios nandxóʼ stitu Jiobá, ne guiráʼ ni bíʼnibe para laatu Egipto. Nga runi ca xaíque stidu na rabi laadu lauguu listu guendaró para chinetu ne guedatídxidu laatu: Esclavu stitu laadu. Laguiníʼ de que qué zadindenetu laadu. Laatu cayuuyatu ximodo maʼ biuxe xhábadu purtiʼ zitu ziuupadu, ne ca pan ni nedu maʼ bichonga cani.

Josué ne ca xcaadxi xaíque que runi crécabe ca gabaonita ca. Ngue runi riníʼcabe qué zucaalúdicabe laacaʼ. Peru chonna gubidxa despué gúnnacabe de que ca gabaonita que nabézacaʼ gaxha.

Xiñee gúdxitu laadu de que zeedatu zitu pue, na Josué rabi laacabe.

Ca gabaonita que bicábicaʼ: Purtiʼ gúdxicabe laadu de que Dios stitu maʼ bizabiruaa gudii laatu guidubi guidxi Canaán riʼ. Ngue runi bidxíbidu ñuutitu laadu. Peru ca israelita ca rúnicabe ni maʼ bizabiruaacabe, qué ruutidíʼcabe ca gabaonita ca. Peru rúnicabe laacaʼ esclavu stícabe.

Rey stiʼ Jerusalén ridxiichi purtiʼ ca gabaonita ca maʼ bidaagucabe guidxi Israel. Ngue runi rábicabe xtapa rey: Lataʼ ne lagacané naa tindenenu ca de Gabaón, ne nga nga ni rúnicabe. Yanna maʼ zeeda gaayuʼ rey ca luguiácabe, ñee biuu xpiaanicabe nga la? Guidúʼyanu.

Josué 9:1-27; 10:1-5.

Josué ne ti gabaonita


Guendarinabadiidxaʼ

  • Ximodo nga gadxé ca binni de Gabaón de ca cananeu ni nabeza xcaadxi guidxi nuu gaxha de raqué.
  • Casi ruuyuʼ lu dibuju riʼ, xi runi ca gabaonita que ne xiñee.
  • Xi ruzabiruaa Josué ne ca xaíque guidxi Israel que para ne ca gabaonita, peru xi gúnnacabe despué de chonna gubidxa.
  • Xi raca ora ca rey de sti guidxi que runadiágacaʼ de que ca gabaonita que maʼ bidaagucaʼ guidxi Israel.

Xcaadxi guendarinabadiidxaʼ

  • Biindaʼ Josué 9:1-27.

    Jiobá biʼniʼ mandarbe guidxi Israel «gunduuxeʼ guiráʼ binni de guidxilayú» que, peru xi ca guenda stibe bihuinni ora bitiidiláʼdxibe donda stiʼ ca gabaonita. (Jos. 9:22, 24; Mat. 9:13; Hech. 10:34, 35; 2 Ped. 3:9.)

    Ra biʼniʼ cumplir Josué pactu ni bíʼninebe ca gabaonita que, ximodo guláʼquibe ti ejemplu para ca xpinni Cristu de ca dxi stinu riʼ. (Jos. 9:18, 19; Mat. 5:37; Efe. 4:25.)

  • Biindaʼ Josué 10:1-5.

    Ximodo runi ca binni ni cabeza guibani lu guidxilayú riʼ casi biʼniʼ ca gabaonita, ne xiñee runi ndiʼ de que guuyadxí binni laasícabe. (Jos. 10:4; Zac. 8:23; Mat. 25:35-40; Apo. 12:17.)