Biiyaʼ guiraʼ ni nuu lu sitiu riʼ

guyé lu índice

Historia 43: Josué guca xaíque

Historia 43: Josué guca xaíque

MOISÉS racalaʼdxiʼ chuʼ Canaán ne ca israelita. Ngue runi nabe: Jiobá, bidii lugar tiideʼ guiiguʼ Jordán ca para guuyaʼ layú sicarú ca. Peru Jiobá na rabi laabe: ¡Maʼ! ¡Cadi guibiguetaʼ guiniʼluʼ zacá! Nannuʼ xi pur ndiʼ gudxi Jiobá laabe zacá la?

Pur ni guca ora Moisés bigaze xpara lu guié que. Bietenalaʼdxiʼ: laabe ne Aarón qué ñusisacadíʼcabe Jiobá. Qué ñabidíʼcabe ca binni guidxi que de que Jiobá nga gulee nisa lu guié que. Ngue runi Jiobá na qué zudii lugar chúʼcabe Canaán.

Ngue runi despué de guti Aarón la? Jiobá gúdxibe Moisés: Gucuaa Josué ne bizuhuaa laabe nezalú Eleazar ni ruzaaquiʼ guʼxhuʼ ne nezalú ca binni guidxi ca. Ne raqué, nezalú guirácabe la? guníʼ de que Josué nga ni chigaca xaíque. Moisés runi cásipeʼ guníʼ Jiobá, casi ruuyuʼ lu dibuju ca.

Moisés guníʼ maʼ Josué nga naca xaíque

Óraque na Jiobá rabi Josué: Guca naguidxi, ne cadi guidxibuʼ. Lii chineluʼ ca israelita ca ne uguuluʼ laacabe Canaán, guidxi ni maʼ bizaberuaa gudiéʼ laacabe, ne naa ziuaaniáʼ lii.

Despué la? Jiobá rabi Moisés quiʼbaʼ dede luguiáʼ dani láʼ Nebo ni nuu lu layú stiʼ Moab. Dede raqué Moisés zanda guuyaʼ jma chericaʼ de guiiguʼ Jordán que ne guuyabe layú sicarú stiʼ Canaán. Jiobá na: Ndiʼ nga layú ni bizaberuaa gudiéʼ ca xiiñiʼ Abraham, Isaac ne Jacob. Maʼ bidiéʼ lugar guuyuʼ ni, peru qué zudiéʼ lugar chuʼluʼ luni.

Lu dani láʼ Nebo que guti Moisés dxi napa 120 iza. Naguídxirube ne ruuyarube galán. Ca binni guidxi que nabé triste riuucaʼ ne guiracaʼ ruunacaʼ pur Moisés. Peru riéchecabe gápacabe Josué casi xaíque cubi stícabe.

Números 27:12-23; Deuteronomio 3:23-29; 31:1-8, 14-23; 32:45-52; 34:1-12.



Guendarinabadiidxaʼ

  • Tu guiropaʼ hombre zuhuaané Moisés lu dibuju riʼ.
  • Xi rabi Jiobá Josué.
  • Xiñee riguiʼbaʼ Moisés lu dani láʼ Nebo que, ne xi rabi Jiobá laabe. Panda iza napa Moisés ora guti.
  • Xiñee riuu ca binni guidxi que triste, peru xi pur riéchecabe.

Xcaadxi guendarinabadiidxaʼ

  • Biindaʼ Números 27:12-23.

    Xi dxiiñaʼ risaca bidii Jiobá Josué, ne ximodo rihuinni de que Jiobá rizaláʼdxibe Xquídxibe yanna. (Núm. 27:15-19; Hech. 20:28; Heb. 13:7.)

  • Biindaʼ Deuteronomio 3:23-29.

    Xiñee qué nudii Jiobá lugar ñuu Moisés ne Aarón lu layú ni bizabiruaabe que, ne xi rizíʼdinu de laani. (Deu. 3:25-27; Núm. 20:12, 13.)

  • Biindaʼ Deuteronomio 31:1-8, 14-23.

    Ca últimu diidxaʼ gudxi Moisés ca israelita que, ximodo bisihuinni cani de que bidiibe lugar guluu jneza Jiobá laabe. (Deu. 31:6-8, 23.)

  • Biindaʼ Deuteronomio 32:45-52.

    Ximodo zanda iquiiñeʼ Stiidxaʼ Dios laanu lu guendanabani stinu. (Deu. 32:47; Lev. 18:5; Heb. 4:12.)

  • Biindaʼ Deuteronomio 34:1-12.

    Neca Moisés qué ñuu dxi ñuuyabe Jiobá, xi caníʼ Deuteronomio 34:10 de modo bidxaagabe Jiobá yaʼ. (Éxo. 33:11, 20; Núm. 12:8.)