Biiyaʼ guiraʼ ni nuu lu sitiu riʼ

guyé lu índice

Historia 41: Ti beendaʼ de guibayaa

Historia 41: Ti beendaʼ de guibayaa
Moisés ne ti beendaʼ de guibayaa

ÑEE RULUÍʼ dxandíʼ beendaʼ renda lu palu ca la? Coʼ, de guibayaa laame. Jiobá gúdxibe Moisés guindisaʼ laame lu palu ca ti ganda guuyaʼ binni laame ne guibani. Peru xcaadxi beendaʼ ni nuu layú ca dxandíʼ laacaʼ. Biquiichicame ca binni ca ne guca huaracaʼ. Nannuʼ xiñee la?

Purtiʼ ca israelita ca guníʼcabe mal de Dios ne de Moisés. Nácabe: Xiñee guleeluʼ laadu Egipto para gátisidu lu desiertu riʼ pue. Gastiʼ guendaró nin nisa raríʼ, ne maʼ qué racaláʼdxidu guidoʼdo maná riʼ.

Peru maná ca la? ti guendaró galán ni. Jiobá bidii ni laacabe pur ti milagru, ne pur ti milagru nga bidiibe laacaʼ nisa. Peru ca binni que, qué rudiicaʼ xquixe Dios pur guiráʼ ni maʼ bidiibe laacaʼ. Pur nga runi Jiobá biseenda ca beendaʼ malu ca para guiziidiʼ ca israelita ca. Ca beendaʼ ca ruquiichiʼ laacabe ne stale de laacabe rati.

Biquiichiʼ beendaʼ ca israelita ca

Oraqueruʼ reeda ca binni que ra nuu Moisés ne nacaʼ: Maʼ bicheedu purtiʼ maʼ gunidu mal de Jiobá ne de lii. Yanna guniʼné Jiobá ti cueebe ca beendaʼ diʼ raríʼ.

Ngue runi Moisés riníʼ pur laacabe. Ne Jiobá gúdxibe Moisés guni beendaʼ de guibayaa riʼ, ne gúdxibe laa guchenda laame lu ti yaga ne guiráʼ tu guquiichiʼ ca beenda malu ca la? napa xidé guuyadxí laame. Moisés runi cásipeʼ gudxi Dios laa, ne cani maʼ biquiichicame que la? ruuyadxicaʼ beendaʼ de guibayaa riʼ ne riándacaʼ.

De ndiʼ riziidinu, de que guiranu nácanu casi ca israelita ni biquiichiʼ ca beendaʼ que. Pa lii guʼyuʼ, guiráʼ binni rioʼxhoʼ, raca huará ne rati. Xiñee la? purtiʼ Adán ne Eva bixálecabe de Jiobá, ne guiranu xiiñicabe laanu. Peru Jiobá bixheleʼ ti neza para guibáninu sin qué guiuu dxi gátinu.

Jiobá biseendabe Xiiñibe Jesucristu lu Guidxilayú riʼ. Jesús gunda lu ti yaga purtiʼ stale tu guníʼ ique de que malu laabe, peru Jiobá bidii laabe para gulabe laanu. Pa guuyadxinu laabe ne chinándanu laabe la? zanda gápanu ti guendanabani ni qué ziuu dxi guiluxe. Peru despué zazíʼdirunu jma de ndiʼ.

Números 21:4-9; Juan 3:14, 15.



Guendarinabadiidxaʼ

  • Xi renda lu palu ni rihuinni lu dibuju riʼ, ne xiñee gudxi Jiobá Moisés guindisaʼ laame lu palu ca.
  • Ximodo rusihuinni ca binni riʼ de que qué rudiicaʼ xquixe Dios pur guiráʼ ni maʼ bidiibe laacaʼ.
  • Xi rinabaʼ ca binni que Moisés ora Jiobá ruseenda ca beendaʼ malu que para guquiichiʼ laacaʼ.
  • Xiñee gudxi Jiobá Moisés guni ti beendaʼ de guibayaa.
  • Xi rusiidiʼ relatu riʼ laanu.

Xcaadxi guendarinabadiidxaʼ

  • Biindaʼ Números 21:4-9.

    Xi rizíʼdinu de modo gudiche ruaa ca israelita que pur cani bidii Jiobá laacaʼ. (Núm. 21:5, 6; Rom. 2:4.)

    Gayuaa iza despué, ximodo biquiiñeʼ ca israelita que beendaʼ de guibayaa que ne xi biʼniʼ Ezequías. (Núm. 21:9; 2 Rey. 18:1-4.)

  • Biindaʼ Juan 3:14, 15.

    Ximodo biluíʼ náʼ beendaʼ de guibayaa gunda lu palu que guendaguti stiʼ Jesús. (Gál. 3:13; 1 Ped. 2:24.)