Biiyaʼ guiraʼ ni nuu lu sitiu riʼ

guyé lu índice

Historia 40: Moisés bigaze xpara lu guié

Historia 40: Moisés bigaze xpara lu guié

RIDIʼDIʼ stale iza… ¡chii, gande, treinta, treinta y nueve iza! Ne ca israelita ca nuurucabe lu desiertu, peru lu ca iza riʼ la? Jiobá rapa laacabe, ruyaanaʼ laacabe ne maná, ne ridxíʼ rudiibe ti za para chinebe laacaʼ ne huaxhinni rudiibe ti pilar de gui para guzaaniʼ laacaʼ. Ne qué riuxe xhábacaʼ ne qué ridxá gui ñeecaʼ.

Ndiʼ nga primé beeu stiʼ iza cuarenta dede dxi bireecabe Egipto. Ca israelita nuucabe Qadés sti tiru, raríʼ nuucabe ora guyé ca doce que yeundaachicaʼ guidxi Canaán raca cuarenta iza. Míriam bizaʼnaʼ Moisés rátibe Qadés, ne cásica dxiqué, raríʼ laaca nuu guendanagana.

Ca binni ca qué ganda guidxélacaʼ nisa, ngue runi rábicabe Moisés: Jma galán ñátidu. Xiñee guleeluʼ laadu de Egipto para guedaneluʼ laadu ra qué rindani gastiʼ pue. Raríʼ gastiʼ biidxiʼ, nin duʼgaʼ, nin uva, nin granada, ninla nisa para guendaréʼ gastiʼ raríʼ.

Bigaze Moisés xpara lu guié

Ora Moisés ne Aarón guyecaʼ ra nuu tabernáculo para guni orarcaʼ la? Jiobá rabi Moisés: Gulidxi ca binni guidxi ca, ne nezalú guirácabe guniné guié ni nuu racá, de laani zaree stale nisa para ca binni guidxi ca ne guiráʼ maniʼ sticaʼ.

Ngue runi Moisés ribidxi ca binni que, ne rábibe laacaʼ: ¡Lagunadiaga, binni qué runi cré Dios caʼ! Ñee nápadu xidé cueedu nisa lu guié riʼ naa ne Aarón la? Óraque Moisés rugázebe xpárabe lu guié que chupa tiru, ne luni riree stálepeʼ nisa. Nuu nisa para guiráʼ binni que ne guiráʼ maniʼ nuu raqué.

Peru Jiobá ridxiichiné Moisés ne Aarón. Nannuʼ xiñee la? Purtiʼ Moisés ne Aarón guníʼcabe de que laacabe nga chindeecabe nisa lu guié que. Peru ni dxandíʼ nga Jiobá biʼniʼ ni, ne pur qué niníʼ Moisés ne Aarón dxandíʼ de ni guca ca la? Jiobá na zuquíxeni laacabe. Qué zuguu tu ca binni xquidxeʼ guidxi Canaán, na Jiobá rabi laacabe.

Qué nindaadiʼ biree ca israelita que de guidxi Qadés, ne despué yendácabe ra nuu ti dani láʼ Hor. Lu dani que rati Aarón, nápabe 123 iza ora rátibe. Ca israelita que guizáʼ triste riuucaʼ ne pur treinta dxi ruunacabe pur Aarón. Eleazar xiiñiʼ Aarón reeda gaca xaíque stiʼ ca ni ruzaaquiʼ guʼxhuʼ stiʼ guidxi Israel.

Números 20:1-13, 22-29; Deuteronomio 29:5.



Guendarinabadiidxaʼ

  • Ximodo rapa Jiobá ca israelita que laga nuucaʼ lu desiertu.
  • Xiñee riguiche ruaa ca israelita que ora yendácabe Qadés.
  • Ximodo rudii Jiobá nisa guiráʼ binni ne guiráʼ maniʼ que.
  • Tu hombre cá lu dibuju riʼ ni culuíʼ náʼ laca laa ne xiñee cayúnibe ni.
  • Xiñee ridxiichiné Jiobá Moisés ne Aarón, ne xi castigu ricaacabe.
  • Xi raca lu dani láʼ Hor que, ne tu reeda gaca xaíque stiʼ ca ni ruzaaquiʼ guʼxhuʼ stiʼ guidxi Israel.

Xcaadxi guendarinabadiidxaʼ

  • Biindaʼ Números 20:1-13, 22-29 ne Deuteronomio 29:5.

    Xi rizíʼdinu de modo gupa Jiobá ca israelita que lu desiertu. (Deu. 29:5; Mat. 6:31; Heb. 13:5; Sant. 1:17.)

    Ximodo biiya’ Jiobá ora Moisés ne Aarón qué nusisácacabe laabe nezalú ca israelita que. (Núm. 20:12; 1 Cor. 10:12; Apo. 4:11.)

    Xi zanda guizíʼdinu de modo bicabi Moisés ora Jiobá guluu jneza laabe. (Núm. 12:3; 20:12, 27, 28; Deu. 32:4; Heb. 12:7-11.)