Biiyaʼ guiraʼ ni nuu lu sitiu riʼ

guyé lu índice

Historia 38: Ca doce ni yeundaachiʼ

Historia 38: Ca doce ni yeundaachiʼ
Ca israelita ni yegundaachiʼ que nuacaʼ cuananaxhi

BIIYAʼ ca cuananaxhi nuaʼ ca hombre ca. Biiyadxí pabiáʼ naroʼbaʼ beʼzaʼ uba ca. Chupa hombre napa xidé guani lu ti palu. Ne biiyaʼ ca duʼgaʼ ca ne ca granada ca. Padé beeda ca cuananaxhi sicarú riʼ pue. De guidxi Canaán. Bietenalaʼdxiʼ, Canaán nga ra guleza Abraham, Isaac ne Jacob. Peru pur guendarindaana guyuu raqué la? Jacob yendezané ca binnilidxi Egipto. Yanna, despué de chupa gayuaa dieciséis iza la? Moisés ribiguetanebe ca israelita que Canaán. Yanna nuucabe Qadés, lu desiertu.

Guidxi Canaán nabeza binni malu, ngue runi Moisés ruseenda doce hombre chigundaachiʼ ne rábibe laacaʼ: Laguuyaʼ panda binni nabeza raqué, ne pabiáʼ nadípacabe, ne laguuyaʼ pa galán layú ca para gaca dxiiñaʼ luni. Ne cadi guiaandaʼ laatu guedanetu caadxi cuananaxhi.

Ora cani yeundaachiʼ que ribiguétacabe Qadés la? rábicabe Moisés: Dxandipeʼ guizáʼ sicarú guidxi ca. Ne para gusihuínnicabe de que dxandíʼ ni la? ruluíʼcabe caadxi cuananaxhi. Peru chii de cani yeundaachiʼ que nacaʼ: Ca binni nabeza raqué nabé naróʼbacaʼ ne nadípacaʼ, ne pa gacaláʼdxinu gáxhanu laacaʼ xquídxicaʼ la? zuuticaʼ laanu.

Ca israelita ridxíbicaʼ stale ora runadiágacaʼ ca diidxaʼ riʼ. Jma galán ñátinu Egipto o lu desiertu riʼ, nácabe. Zátinu lu guendaridinde ca, ne xheelanu ne ca xiiñinu zagaacaʼ. ¡Cuinu sti xaíque para chuʼ xlugar Moisés, ne guibiguétanu Egipto!

Peru chupa de cani yeundaachiʼ que runi crecaʼ Jiobá, ne racaláʼdxicabe gucueezadxícabe ca binni guidxi que. Lácabe Josué ne Caleb. Nácabe: Cadi guidxíbitu, Jiobá nuuné laanu. Qué zácadiʼ nagana guicaanu layú ca. Peru ca binni ca qué rucaadiágacaʼ. Dede nuucaʼ guuticaʼ Josué ne Caleb.

Ni guca riʼ ruchiichi ni Jiobá, ne rábibe Moisés: Guirutiʼ de ca binni napa 20 iza o jma ziuu ndaaniʼ guidxi Canaán. Maʼ biiyacabe ca milagru bineʼ Egipto ne lu desiertu, peru caʼruʼ guni crécabe naa. Nga runi zazácabe lu desiertu cuarenta iza dede ora gati últimu de laacabe. Josué si ne Caleb ziuucaʼ ndaaniʼ guidxi Canaán.

Números 13:1-33; 14:1-38.



Guendarinabadiidxaʼ

  • Ximodo ruuyuʼ beʼzaʼ uva cá lu dibuju riʼ. De paraa bedanécabe ni.
  • Xiñee ruseenda Moisés dose hombre chigundaachiʼ Canaán.
  • Xi riníʼ chii de ca ni yeundaachiʼ que ora bibiguétacaʼ ra nuu Moisés.
  • Ximodo rusihuinni chupa de cani yeundaachiʼ que de que naguíxhecabe ladxidóʼcabe lu náʼ Jiobá, ne tu lácabe.
  • Xiñee ridxiichi Jiobá, ne xi rábibe Moisés.

Xcaadxi guendarinabadiidxaʼ

  • Biindaʼ Números 13:1-33.

    Tu bibí para chigundaachiʼ layú que, ne xi gunda bíʼnicabe. (Núm. 13:2, 3, 18-20.)

    Xiñee gadxé modo biiyaʼ Josué ne Caleb cani guca que de modo biiyaʼ xcaadxi ni yegundaachiʼ que ni, ne xi rusiidiʼ ndiʼ laanu. (Núm. 13:28-30; Mat. 17:20; 2 Cor. 5:7.)

  • Biindaʼ Números 14:1-38.

    Xi guendarulidxi naquiiñeʼ gulábinu para cadi quicheruaanu de ca ni zaniruʼ ndaaniʼ xquidxi Jiobá. (Núm. 14:2, 3, 27; Mat. 25:40, 45; 1 Cor. 10:10.)

    Ximodo ruluíʼ Números 14:24 de que Jiobá rizalaʼdxiʼ cada tobi de ca xpinni. (1 Rey. 19:18; Pro. 15:3.)