Biiyaʼ guiraʼ ni nuu lu sitiu riʼ

guyé lu índice

Historia 36: Ti yuzehuiiniʼ de oro

Historia 36: Ti yuzehuiiniʼ de oro

¡BIIYAʼ GUUYUʼ! Xi cayuni ca binni ca yanna pue. ¡Cayuni orárcabe ti yuzehuiiniʼ! Xiñee cayúnicabe ndiʼ yaʼ.

Ora rindaa Moisés lu dani que la? ca binni que riniʼcaʼ: Qué gánnanu xi guca Moisés. Gúninu ti dios ni cuee laanu de lu layú°riʼ.

Gundaa Moisés guiropaʼ guié que

Buenu, na Aarón biʼchiʼ Moisés. Lacuee ca oro ni nándatu ca, ne latané ni naa. Ora ca binni que runi ndiʼ la? Aarón rusiá ca oro que ne rúnibe ti yuzehuiiniʼ de oro. Ne ca binni que nacaʼ: ¡Ndiʼ nga Dios stidu, ni gulee laadu de Egipto! Óraque rúnicaʼ ti saa roʼ, ne runi adorarcaʼ yuzehuiiniʼ de oro que.

Ora Jiobá ruuyaʼ ni cayúnicabe que la? ridxiichibe stale ne rábibe Moisés: Gucapurá biete, purtiʼ ca binni ca maʼ cadi cayúnicaʼ ni xneza. Maʼ bisiaandacabe ca ley stinneʼ ne cuzuxíbicabe nezalú yuzehuiiniʼ de oro ca.

Ca binni ni cayuni adorar yuzehuiiniʼ de oro

Moisés riete guxooñeʼ de lu dani que. Ne ora ridxíñabe raqué la? ndiʼ nga ni ruuyabe. ¡Ca binni que cayuundacaʼ ne cuyaacaʼ ra nuu yuzehuiiniʼ que! Moisés ridxiichi stale dede rusáʼbibe guiropaʼ guié bata ra cá ca ley que, ne ca guié que rilaa cani. Óraque ricaabe yuzehuiiniʼ que rusiabe laa ne runidebe laa.

Ca binni guidxi que maʼ bíʼnicaʼ ni malu, ngue runi Moisés rábibe caadxi hombre cueecaʼ espada sticaʼ. Ca binni malu ni biʼniʼ adorar yuzehuiiniʼ ca napa xidé gati, na Moisés. ¡Ngue runi ca hombre que ruuticaʼ 3.000 binni! Ñee cadi ruluíʼ nga de que nápanu xi gápanu laanu para guni adorarnu Jiobá ne cadi xcaadxi dios ni cadi dxandíʼ la?

Éxodo 32:1-35.



Guendarinabadiidxaʼ

  • Xi cayuni ca binni cá lu dibuju riʼ ne xiñee.
  • Xiñee cadxiichi Jiobá ne xi runi Moisés ora ruuyabe ni cayuni ca binni que.
  • Xi runi mandar Moisés caadxi hombre guni.
  • Xi rusiidiʼ historia°riʼ laanu.

Xcaadxi guendarinabadiidxaʼ

  • Biindaʼ Éxodo 32:1-35.

    Ximodo ruluíʼ relatu riʼ de ni riníʼ ique Jiobá ora guiuʼchaʼ religión ni dxandíʼ ne ni cadi dxandíʼ. (Éxo. 32:4-6, 10; 1 Cor. 10:7, 11.)

    Ximodo naquiiñeʼ gapa ca xpinni Cristu laacaʼ ora cuicaʼ ni gucaadiágacaʼ ne ni guyaacaʼ. (Éxo. 32:18, 19; Efe. 5:15, 16; 1 Juan 2:15-17.)

    Ximodo guca tribu stiʼ Leví ti ejemplu sicarú para laanu ora chuʼnu pur ni jneza. (Éxo. 32:25-28; Sal. 18:25.)