Biiyaʼ guiraʼ ni nuu lu sitiu riʼ

guyé lu índice

Historia 34: Ti guendaró nacubi

Historia 34: Ti guendaró nacubi

NANNUʼ xi cutopa ca binni ca layú ca la? Riluíʼ ni hielu biuxehuiiniʼ, naquichiʼ ni ne nalaseʼ ni. Peru cadi hielu biuxe diʼ ni, sínuque xiixa ni zanda gócabe ni.

Cutopa ca israelita maná

Biaʼ chupa beeu ruʼ maʼ gudiʼdiʼ dede dxi biree ca israelita que Egipto. Nuucabe lu desiertu peru lu desiertu ca gástipeʼ guendaró, ngue runi laacabe nácabe: Jma galán ñuuti Jiobá laanu Egipto. Raqué gudoʼno intiica gucaláʼdxinu.

Ngue runi Jiobá na: Chigusabaʼ guendaró de guibáʼ. Ne nga nga ni rúnibe. Sti dxi que, ora ruuya ca israelita que naquichiʼ ni biaba que la? rinabadiidxacabe: Xi laani.

Moisés na: Ndiʼ nga guendaró ni bidii Jiobá goto. Ca binni que gulee lani MANÁ. Maná°riʼ nanixe ni casi pan ni gucané dxiña yaga.

Lagutopa biaʼ gó cada tobi tu, na Moisés rabi ca binni que. Nga runi guiráʼ siadóʼ rutópacabe ni, purtiʼ ora guiree Gubidxa la? maná ni riaana layú que ria cani.

Moisés laaca rabi laacabe: Guirutiʼ uguu chaahuiʼ maná ca dede sti dxi. Peru nuu tu runi ni. Nannuʼ xi raca la? ¡Sti siadóʼ que maná ni guluu chaahuicabe que dxaʼ ni de bicutiʼ ne bizulú gundáʼ dxabaʼ ni!

Peru Jiobá na de que ti dxi ndaaniʼ semana gutópacabe chupa de biaʼ rutópacabe ti siadóʼ que. Lu xhoopaʼ gubidxa que nga. Ne Jiobá na de que uguu chaahuicabe caadxi para sti dxi, purtiʼ maʼ qué zusábabe gastiʼ lu gadxe gubidxa que. ¡Ora ruguu chaahuicabe maná que dede lu gadxe gubidxa que la? qué ridxá diʼ ni bicutiʼ, nin rindáʼ dxabaʼ ni! ¡Nga sti milagru nga!

Ca iza guyuu ca israelita que lu desiertu la? gudócabe maná.

Éxodo 16:1-36; Números 11:7-9; Josué 5:10-12.



Guendarinabadiidxaʼ

  • Casi ruuyuʼ lu dibuju ca, xi cutopa ca binni ca layú, ne xi lani.
  • Xi gudxi Moisés ca binni que ora gutópacaʼ maná.
  • Lu xhoopaʼ gubidxa que, xi guníʼ Jiobá guni ca binni que, ne xiñee.
  • Xi milagru runi Jiobá ora ruguu chaahuicabe maná que lu gadxe gubidxa.
  • Pabiáʼ dxi ruyaanaʼ Jiobá ca binni que maná.

Xcaadxi guendarinabadiidxaʼ

  • Biindaʼ Éxodo 16:1-36 ne Números 11:7-9.

    Ximodo ruluíʼ Éxodo 16:8 de que naquiiñeʼ guni respetarnu cani zaniruʼ ndaaniʼ ca guendaridagulisaa ca. (Heb. 13:17.)

    Dxi guzácabe lu desiertu, ximodo bisietenaláʼdxicabe ca israelita que guiráʼ dxi de que riquiiñecabe Jiobá. (Éxo. 16:14-16, 35; Deu. 8:2, 3.)

    Xi riníʼ maná que casi na Jesús, ne xi ribeendunu de pan «de ibáʼ» riʼ. (Juan 6:31-35, 40.)

  • Biindaʼ Josué 5:10-12.

    Panda iza gudó ca israelita que maná. Ximodo guca ndiʼ ti prueba para laacabe ne xi zanda guizíʼdinu de relatu riʼ. (Éxo. 16:35; Núm. 11:4-6; 1 Cor. 10:10, 11.)