Biiyaʼ guiraʼ ni nuu lu sitiu riʼ

guyé lu índice

Historia 32: Chii plaga

Historia 32: Chii plaga

BIIYAʼ ca dibuju°riʼ. Cada tobi de laacani culuíʼ cani ti plaga ni biseenda Jiobá Egipto. Lu primé ca la? ruuyuʼ Aarón caguibi vara stiʼ lu guiiguʼ Nilo ca. Nisa que guca ni rini, ne ca benda ni nuu ndaaniʼ ni gúticaʼ, ne óraque bizulú bindáʼ yuudxuʼ guiiguʼ que.

Ca plaga ni biaba luguiáʼ ca egipciu

Despué, Jiobá gulee jma bidxiʼ ndaaniʼ guiiguʼ Nilo que. Ca bidxiʼ que guyuucaʼ ndaaniʼ horno, ndaaniʼ ca badiáʼ que, ne lu ca luunaʼ que, guiráʼ ladu. Ora guti ca bidxiʼ que la? ca egipciu que bicuí montoncaʼ laacame, ne guidubi guidxi que gundáʼ yuudxuʼ.

Ra bionna plaga que la? Aarón gudxibi vara stiʼ layú, ne yudé que guca biuxiʼ tuudxi manihuiiniʼ ni ripapa ne riguiru.

Stuudxi plaga que bininani ca egipciu que si, peru ca israelita que coʼ. Lu tapa plaga que beeda tuudxi bialazi roʼ ne guyuucaʼ ralidxi guiráʼ ca egipciu que. Gaayuʼ plaga que bininá ca maniʼ stícabe. Stale de ca vaca ne dendxuʼ ne chiva stiʼ ca egipciu que gúticaʼ.

Despué Moisés ne Aarón bilaacaʼ caadxi dé ludé lu bi, ne laacani guca cani tuudxi guiʼdxuʼ biree ladi binni ne maniʼ. Ndiʼ nga ni guca lu xhoopaʼ plaga que.

Gudiʼdiʼ si ngue la? Moisés gundisaʼ naʼ luguiáʼ, ne Jiobá biseenda rayu ne hielu. Qué huayuu dxi guiaba hielu casi ni guca que.

Lu xhono plaga que beeda ti manada gusú. Qué huayuuruʼ dxi chuʼ stálepeʼ gusú casi ngue dede dxi que. Ca gusú que gudocaʼ guiráʼ ni qué nunitilú ca bola hielu que.

Lu gaʼ plaga que la? beeda ti guelacahui. Chonna gubidxa guyuu guidxi que nacahuidóʼ, peru ralidxi ca israelita que guyuu biaaniʼ.

Guca si ca ngue la? Dios gudxi ca binni xquidxi gunéʼ rini stiʼ ti chiva o ti dendxuʼ ruaa puertaʼ sticaʼ. De raqué la? ángel stiʼ Dios gudiʼdiʼ ndaaniʼ guidxi Egipto, ne ora ruuyaʼ ángel que rini que la? qué ruutidibe guirutiʼ ndaaniʼ yoo que. Peru ora qué ruuyabe rini que la? ruutibe xiiñiʼ binni ni gule primé o xiiñiʼ ca maniʼ que. Ndiʼ nga chii plaga que.

Gudiʼdiʼ si plaga riʼ la? Faraón bidii lugar cheʼ ca israelita que, ne cumu laacabe maʼ nuucabe listu la? gueelaʼ queca bireecabe Egipto.

Éxodo, capítulo 7 hasta 12.



Guendarinabadiidxaʼ

  • Biiyaʼ ca dibuju riʼ ne guníʼ gunáʼ nga guionnaʼ primé plaga biseenda Dios Egipto.
  • Ximodo nga gadxé guionnaʼ primé plaga que de xcaadxi que.
  • Xi guca lu tapa, gaayuʼ ne xhoopaʼ plaga que.
  • Xi guca lu gadxe, xhono ne gaʼ plaga que.
  • Xi gudxi Jiobá ca israelita que guni, ante de chii plaga que.
  • Xi guca lu chii plaga que, ne xi guca despué.

Xcaadxi guendarinabadiidxaʼ

  • Biindaʼ Éxodo 7:19-8:23.

    Nécaxa ca ni ruzaaquiʼ guʼxhuʼ stiʼ Egipto que gunda bíʼnicabe ne magia guiropaʼ primé plaga stiʼ Jiobá, xi guníʼcabe despué de guionna plaga que neca qué nácabe. (Éxo. 8:18, 19; Mat. 12:24-28.)

    Ximodo bisihuinni Jiobá ra bidapa plaga que pabiáʼ zanda gápabe xquídxibe ne ximodo racané ndiʼ xquidxi Dios ora tiidicaʼ ra «jma nagana» o lu stale guendananá lu guidxilayú riʼ. (Éxo. 8:22, 23; Apo. 7:13, 14; 2 Cró. 16:9.)

  • Biindaʼ Éxodo 8:24; 9:3, 6, 10, 11, 14, 16, 23-25, ne 10:13-15, 21-23.

    Xi chupa neza binni bisihuinni ca chii plaga que, ne ximodo rúʼyanu guiropaʼ grupu ca yanna. (Éxo. 8:10, 18, 19; 9:14.)

    Ximodo racané Éxodo 9:16 laanu guiénenu xi pur nga cudii Jiobá lugar guibániruʼ Binidxabaʼ. (Rom. 9:21, 22.)

  • Biindaʼ Éxodo 12:21-32

    Ximodo gucané Pascua que guilá stale binni, ne xi bisihuinni ni. (Éxo. 12:21-23; Juan 1:29; Rom. 5:18, 19, 21; 1 Cor. 5:7.)