Biiyaʼ guiraʼ ni nuu lu sitiu riʼ

guyé lu índice

Historia 30: Ti yagahuiiniʼ naze bele

Historia 30: Ti yagahuiiniʼ naze bele

MOISÉS yendá dede lu dani láʼ Horeb, cuyúbibe guixi para ca xténdxube. Raríʼ biiyabe ti yagahuiiniʼ naze bele, ¡peru yagahuiiniʼ riʼ cadi cayaaquiʼ diʼ ni!

Nuu Moisés ra nuu yagahuiiniʼ ni naze bele

¡Nayaahui ndiʼ njaʼ! guníʼ ique Moisés. Jma galán chiguyachaahueʼ ni. Ora bidxíñabe la? de ra nuu yagahuiiniʼ que biree ti ridxi na: Cadi guidxíñaluʼ jma gaxha, gulee guelaguidi ca ñeeluʼ purtiʼ nuaa raríʼ. Dios ngue biquiiñeʼ ti ángel stiʼ para guníʼ, ngue runi Moisés bichii lú.

Óraque Dios gudxi laabe: Maʼ biiyaʼ xquidxeʼ nabé cayacaná Egipto, chigulaya laacabe ne cuseendaʼ lii para cueeluʼ laacabe de raqué. Jiobá chiné laacabe Canaán ti guidxi guizáʼ sicarú.

Peru Moisés na: Naa cadi nácadiaʼ guirutiʼ. Ximodo guneʼ ndiʼ yaʼ. Ne pa chaa zábicabe naa: Tu laa biseenda lii. Xi guiniéʼ óraque°yaʼ.

Ndiʼ nga ni gabuʼ laacabe, na Dios rabi laabe. JIOBÁ, Dios stiʼ Abraham, Dios stiʼ Isaac ne Dios stiʼ Jacob nga biseenda naa ra nuutu. Ne de raqué guniruʼ Jiobá: Ndiʼ nga laʼyaʼ ni qué ziuu dxi guidxaa.

Peru, pa qué guni crécabe naa ora gabe laacabe lii biseenduʼ naa pue, na Moisés rabi laabe.

Xi naazeluʼ, gunabadiidxaʼ Dios laabe.

Moisés bicabi: Ti vara.

Bilaani layú, na Dios rabi laabe. Ora biʼniʼ Moisés ni°la? vara que gúcani ti beendaʼ. Óraque Jiobá biluiʼbe Moisés sti milagru. Rábibe laa: Guluu naluʼ ndaaniʼ xhábaluʼ. Moisés biʼniʼ ni, ne ora guleebeni°la? ¡guizáʼ naquichibeni casi ñebe! Riluiʼpeʼ huarabe de lepra. Ra bionna milagru que°la? Jiobá bidiibe poder Moisés para guni ni. Maʼ para guilúxebe guniʼbe sicaríʼ: Ne ca milagru riʼ°la? ca israelita zuni crecaʼ de que naa biseendaʼ lii.

Despué bibiguetaʼ Moisés ralidxi, ne gúdxibe Jetró: Xiñee qué gudiiluʼ lugar guibiguetaʼ Egipto, ti guuyaʼ ximodo nuu ca binnilidxeʼ. Jetró bidii lugar guibiguetaʼ Moisés Egipto.

Éxodo 3:1-22; 4:1-20.



Guendarinabadiidxaʼ

  • Xi láʼ dani cá lu dibuju riʼ.
  • Xii ndiʼ xiixa nayaahui biiyaʼ Moisés ora yenebe ca xténdxube lu dani que.
  • Xi ná ridxi biree ra nuu yagahuiiniʼ que, ne tu stiʼ ridxi que.
  • Xi guníʼ Moisés ora gudxi Dios laabe chindeebe Xquidxi de Egipto.
  • Xi gudxi Dios Moisés guiníʼ pa guinabadiidxacabe tu biseenda laabe.
  • Ximodo zanda gusihuinni Moisés de que Dios biseenda laa.

Xcaadxi guendarinabadiidxaʼ

  • Biindaʼ Éxodo 3:1-22.

    Xiñee rudii ni bizaaca Moisés que confianza laanu de que ora gúninu xiixa dxiiñaʼ ni zeeda de Jiobá, laabe zacanebe laanu neca rábinu qué zanda gúninu ni. (Éxo. 3:11, 13; 2 Cor. 3:5, 6.)

  • Biindaʼ Éxodo 4:1-20.

    Ximodo bichaa Moisés modo naca lu cuarenta iza guyuube Madián que, ne xi zanda guiziidiʼ cani racalaʼdxiʼ ugaanda xiixa guenda ra guendaridagulisaa. (Éxo. 2:11, 12; 4:10, 13; Miq. 6:8; 1 Tim. 3:1, 6, 10.)

    Neca iquiiñeʼ Jiobá xquidxi para uguu jneza laanu, xi confianza zanda gudii ni bizaaca Moisés laanu yaʼ. (Éxo. 4:12-14; Sal. 103:14; Heb. 12:4-11.)