Biiyaʼ guiraʼ ni nuu lu sitiu riʼ

guyé lu índice

Historia 5: Ti guendanabani nagana

Historia 5: Ti guendanabani nagana

BIREESICABE ndaaniʼ jardín de Edén que la? Adán ne Eva gúpacaʼ stale guendanagana. Gúpacabe xidé bíʼnicabe dxiiñaʼ naná para gócabe. Biiyacabe maʼ qué nindani yaga cuananaxhi ra nuucabe, sínuque gundani yaga guichi ne yaga guiʼxhiʼ. Ndiʼ gúcani ora Adán ne Eva maʼ qué nuzuubacabe stiidxaʼ Dios ne bisaanacabe de gaca xhamígucabe Laabe.

Cayuni Adán dxiiñaʼ nadipaʼ ne xiiñiʼ

Peru ni jma feu nga Adán ne Eva bizulú gúticaʼ. Bietenalaʼdxiʼ: Dios gudxi laacabe de que záticabe pa laacabe gócabe cuananaxhi stiʼ ti yaga que. Buenu, dxi ca gudócabe cuananaxhi que la? bizulú gúticabe. ¡Aque nahuáticabe purtiʼ qué nucaadiágacabe Dios!

Guiráʼ ca xiiñiʼ Adán ne Eva gúlecaʼ despué de gulee Dios laacabe ndaaniʼ jardín de Edén que. Ndiʼ riníʼ de que ca xiiñicabe laaca napa xidé guióʼxhocaʼ ne gáticaʼ.

Pa Adán ne Eva nuzuubacabe stiidxaʼ Jiobá la? laacabe ne ca xiiñicabe ñuucabe nayecheʼ. Ñanda nibánicabe nayecheʼ sin ñuu dxi ñáticabe lu Guidxilayú riʼ. Maʼ guirutiʼ ñoʼxhoʼ nin ñaca huará ne ñati.

Dios racalaʼdxiʼ guibani binni nayecheʼ sin chuʼ dxi gati, ne laabe maʼ guniʼbe de que ziuu dxi zácani zacá. Cadi zaca si guidubi Guidxilayú riʼ sicarú, sínuque guiráʼ xixé binni ziuu nazaaca. Ne guirácabe zaca xhamígucabe, ne laaca zaca xhamígucabe Dios.

Eva ne ca xiiñiʼ

Peru Eva maʼ cadi xhamígudibe Dios. Ngue runi guca nagana para laabe gápabe xiiñibe, purtiʼ gúpabe stale yuubaʼ. Ya, dxandíʼ pur qué nuzuubabe stiidxaʼ Jiobá°la? bedané ni stale yuubaʼ laabe, cadi dxandíʼ°la?

Adán ne Eva gúpacabe stale xiiñicabe. Ora gule primé xiiñicabe la? gulee lácabe laa Caín. Ra biropa que°la? gulee lácabe laa Abel. Ñee nannuʼ xi gúcacabe la?

Génesis 3:16-23; 4:1, 2; Apocalipsis 21:3, 4.



Guendarinabadiidxaʼ

  • Ximodo guca xquendanabani Adán ne Eva despué de bireecabe ndaaniʼ jardín de Edén que.
  • Xi bizaaca Adán ne Eva, ne xiñee.
  • Xiñee zioʼxhoʼ ne zati ca xiiñiʼ Adán ne Eva.
  • Pa Adán ne Eva nuzuubacaʼ stiidxaʼ Jiobá, ximodo ñaca xquendanabánicabe ne ca xiiñicabe yaʼ.
  • Ximodo bininá guendaquéruzuubaʼ diidxaʼ stiʼ Eva que laa.
  • Tu láʼ primé ne guiropa xiiñiʼ Adán ne Eva.
  • Tu ca xcaadxi baʼduhuiiniʼ cá lu dibuju ca.

Xcaadxi guendarinabadiidxaʼ

  • Biindaʼ Génesis 3:16-23 ne 4:1, 2.

    Dede dxi guca maldecir guidxilayú que, ximodo bihuinni de que gucaná xquendanabani Adán. (Gén. 3:17-19; Rom. 8:20, 22.)

    Xiñee nga biáʼsipeʼ lá Eva, ni riníʼ «nabani». (Gén. 3:20.)

    Ximodo nga gupa Jiobá respetu Adán ne Eva despué de bicheecabe que. (Gén. 3:7, 21.)

  • Biindaʼ Apocalipsis 21:3, 4.

    Xi guiráʼ «ni guyuu dxiqué» racaláʼdxinuʼ guiree.