Biiyaʼ guiraʼ ni nuu lu sitiu riʼ

guyé lu índice

Historia 9: Noé runi ti arca

Historia 9: Noé runi ti arca
Cuxidxi binni Noé

NOÉ gupa ti xheelaʼ ne chonna xiiñiʼ. Ca xiiñibe biree lacaʼ Sem, Cam, ne Jafet. Cada tobi de ca xiiñicabe gupa ti xheelaʼ. Biaʼsi xhono binnilidxi Noé.

Yanna Dios gudxi Noé guni xiixa ni qué huahuinni, gúdxibe laa guni ti arca ngola. Guizáʼ naroʼbaʼ arca que casi ti barcu, peru jma ruluíʼ ni ti caja ngola ne ziuulaʼ. Bíʼnini de chonna pisu, na Dios rabi laabe ne guluu cuartu ndaaniʼ ni. Ca cuartu que guca cani para Noé ne ca binnilidxi, ne ca maniʼ que, ne ca guendaró que para guirácabe.

Dios gúdxibe Noé guzáʼ chaahuiʼ arca que para cadi chuʼ nisa ndaaniʼ ni. Guniʼbe: Chiguseendaʼ ti nisaguié naroʼbaʼ para gunitilú guiráʼ binni riʼ. Tu cadi nuu ndaaniʼ arca ca la? zati.

Noé ne ca xiiñiʼ bizuubacabe stiidxaʼ Dios ne bizulú bíʼnicabe arca que. Peru guiráʼ binni que bixídxisicaʼ ne gúcarucaʼ malu. Guirutiʼ ñuni cré ora Noé gudxi laacabe ni na Dios chiguni.

Binnilidxi Noé caguu guendaró ne ca maniʼ ca ndaaniʼ arca

Yené dxi para guca arca que purtiʼ nabé naroʼbaʼ ni. Gudiʼdiʼ stale iza para biluxe arca que. Yanna Dios gúdxibe Noé uguu guiráʼ maniʼ que ndaaniʼ ni ne uguube chupa de cada maniʼ, ti machu ne xpareja. Peru de xcaadxi maniʼ la? Dios gudxi laabe uguube gadxe. Laaca gúdxibe Noé guedané guiráʼ tipu maniʼ ripapa. Noé bi’ni’ cásipeʼ gudxi Dios laa.

Despué la? Noé ne ca binnilidxi guyuucaʼ ndaaniʼ arca que. Óraque Dios biseeguʼ puertaʼ que, Noé ne ca binnilidxi biaanacaʼ cabézacaʼ ndaaniʼ ni. Guníʼ ique nuuluʼ raqué cabezuʼ. Nouʼ zeeda nisaguié naroʼbaʼ ni guníʼ Dios que°la?

Génesis 6:9-22; 7:1-9.



Guendarinabadiidxaʼ

  • Panda binnilidxi Noé ne tu láʼ guionnaʼ xiiñibe.
  • Xii nga xiixa ni qué huahuinni gudxi Dios Noé guni ne xiñee.
  • Ximodo guca guiráʼ binni que ora guniʼné Noé laacabe de arca que.
  • Xi gudxi Dios Noé guni ne ca maniʼ que.
  • Despué de biseeguʼ Dios puertaʼ stiʼ arca que, xi biʼniʼ Noé ne ca binnilidxi.

Xcaadxi guendarinabadiidxaʼ

  • Biindaʼ Génesis 6:9-22.

    Xi biʼniʼ de que gaca Noé ti hombre ni jma bihuinni de modo biʼniʼ adorar Dios ni dxandíʼ dxandipeʼ. (Gén. 6:9, 22.)

    Ximodo ruuyaʼ Jiobá guendaridinde ne ximodo zanda gacané ndiʼ laanu ora chigúninu o chigúʼyanu xiixa. (Gén. 6:11, 12; Sal. 11:5.)

    Ximodo zanda gúninu casi biʼniʼ Noé ora guicaanu guiráʼ guendarusiidiʼ ni zeeda de ca ni zaniruʼ ndaaniʼ xquidxi Dios. (Gén. 6:22; 1 Juan 5:3.)

  • Biindaʼ Génesis 7:1-9.

    Ximodo rusiecheʼ laanu gánnanu de que Jiobá biiyaʼ Noé casi ti hombre nachaʼhuiʼ nécaxa gulenebe donda°yaʼ. (Gén. 7:1; Pro. 10:16; Isa. 26:7.)