Biiyaʼ guiraʼ ni nuu lu sitiu riʼ

guyé lu índice

Historia 6: Tobi nachaʼhuiʼ ne tobi malu

Historia 6: Tobi nachaʼhuiʼ ne tobi malu

BIIYAʼ yanna Caín ne Abel. Guirópacabe maʼ biniisicabe. Caín maʼ runi dxiiñaʼ lu layú. Laabe rudxiibabe biidxiʼ, cuananaxhi ne verdura.

Caín ne Abel cuzaaquicaʼ xiixa para Dios

Abel rusiniisi dendxuʼ. Laabe riuláʼdxibe gápabe dendxuhuiiniʼ. Ca dendxuhuiiniʼ riʼ riniisicaʼ ne rácacaʼ dendxuʼ naroʼbaʼ, ne qué zandaa diʼ Abel zapa ti manada dendxuʼ para gapa.

Ti dxi Caín ne Abel yenécabe ni gusigáʼdecabe Dios. Caín yené cani bidii layú stiʼ. Ne Abel yené dendxuʼ ni jma sicarú ni napa. Jiobá guyuláʼdxibe Abel ne ni bisigaʼdeʼ. Peru qué ñuláʼdxibe Caín ne cani bisigaʼdeʼ. Nannuʼ xiñee°la?

Cadi purtiʼ diʼ ni bisigaʼdeʼ Abel que gúcani jma galán que stiʼ Caín. Coʼ, sínuque purtiʼ Abel nachaʼhuiʼ. Nadxiibe Jiobá ne bíʼchibe. Peru Caín malu laa; cadi nadxii diʼ biʼchiʼ.

Ngue runi Dios gudxi Caín de que napa xidé guchaa. Peru Caín qué nulabi diʼ laabe. Guizáʼ cadxiichibe purtiʼ Dios jma biuu pur Abel. Caín rábibe Abel: Chuu ra ñaa. Raqué, ora nuucabe stúbicabe°la? Caín gudíñebe bíʼchibe, gudíñebe laa nadipaʼ dede guti. Ñee cadi guizáʼ feu nga ni biʼniʼ Caín ca la?

Ziguxooñeʼ Caín biiti si Abel

Neca guti Abel°la? Dios rietenaláʼdxiruʼ de laabe. Abel guca nachaʼhuiʼ, ne Jiobá qué ziuu diʼ dxi gusiaandaʼ binni zacá. Nga runi Jiobá zudxiguetaʼ xquendanabani Abel. Dxi ca la? Abel maʼ qué ziuu dxi gati. Zanda guibánibe sin chuʼ dxi gátibe lu Guidxilayú riʼ. Ñee cadi galán gunibiaʼnu binni casi laabe°la?

Peru Dios qué riulaʼdxiʼ binni casi Caín. Ngue runi, despué de biitibe bíʼchibe la? Dios biseenda laabe zitu de ca binnilídxibe para quíxebe stóndabe. Ora Caín zindeza sti ladu la? zinebe tobi de ca bizáʼnabe, ne laa beeda gaca xheelabe.

Gupa dxi la? Caín ne xheelaʼ bizulú gúpacaʼ xiiñicaʼ. Xcaadxi xiiñiʼ Adán ne Eva bichaganacaʼ ne laaca gúpacaʼ xiiñicaʼ. Qué nindaa diʼ bidale binni lu Guidxilayú. Gunibiaʼnu caadxi de laacabe.

Génesis 4:2-26; 1 Juan 3:11, 12; Juan 11:25.



Guendarinabadiidxaʼ

  • Xi dxiiñaʼ bizulú biʼniʼ Caín ne Abel.
  • Xi rusigaʼdeʼ Caín ne Abel Jiobá.
  • Xiñee riulaʼdxiʼ Jiobá ni rusigaʼdeʼ Abel laabe, ne xiñee qué riuláʼdxibe stiʼ Caín.
  • Ximodo ladxidóʼ Caín ne ximodo gucalaʼdxiʼ Jiobá uguu jneza laabe.
  • Xi biʼniʼ Caín biʼchiʼ ora nuucabe stúbicabe ra ñaa que.
  • Bisiene xi guca Caín despué de biitibe bíʼchibe.

Xcaadxi guendarinabadiidxaʼ

  • Biindaʼ Génesis 4:2-26.

    Ximodo biluíʼ Jiobá pabiáʼ naxoo modo guyuu Caín que. (Gén. 4:7.)

    Ximodo bisihuinni Caín modo naca ladxidóʼ. (Gén. 4:9.)

    Ximodo ruuyaʼ Jiobá guixii rini stiʼ tuuxa ni qué gapa donda. (Gén. 4:10; Isa. 26:21.)

  • Biindaʼ 1 Juan 3:11, 12.

    Xiñee bidxiichi xiana Caín, ne ximodo riguixhená ndiʼ laanu ca dxi stinu riʼ°yaʼ. (Gén. 4:4, 5; Pro. 14:30; 28:22.)

    Ximodo rusihuinni Biblia, de que nécaxa ca binnilídxinu gucaalucaʼ Jiobá, laanu zanda gúninu ni nabe sin gucheenu°yaʼ. (Sal. 27:10; Mat. 10:21, 22.)

  • Biindaʼ Juan 11:25.

    Xi cayabi Jiobá laanu de cani huayati sin qué guzaabiʼ gastiʼ. (Juan 5:24.)