Biiyaʼ guiraʼ ni nuu lu sitiu riʼ

guyé lu índice

Historia 4: Ximodo biníticabe lídxicabe

Historia 4: Ximodo biníticabe lídxicabe

BIIYAʼ xi cayaca. Cabeecabe Adán ne Eva ndaaniʼ jardín de Edén ca. Nannuʼ xiñee la?

Cabeecabe Adán ne Eva de ndaaniʼ jardín de Edén

Purtiʼ bíʼnicabe xiixa guizáʼ malu. Nga runi Jiobá gulee laacabe ndaaniʼ jardín ca. Naanuʼ xi biʼniʼ Adán ne Eva la?

Bíʼnicabe xiixa ni gudxi Dios laacabe cadi gúnicabe. Dios gudxi laacabe zanda gócabe de ca cuananaxhi stiʼ ca yaga zuhuaa ndaaniʼ jardín que. Peru de cuananaxhi stiʼ ti yaga si cadi gódicabe; pa gócabeni la? záticabe, purtiʼ Dios cayápani para laa. Ne nánnanu de que cadi jneza diʼ nga guicaanu stiʼ stobi, o coʼ la? Yanna, xi guca yaʼ.

Ti dxi, ora Eva nuu stubi ndaaniʼ jardín que, ti beendaʼ guniʼné laabe. ¡Guníʼ ique si lii! Beendaʼ que gudxi Eva gó cuananaxhi stiʼ yaga ni Dios gudxi laa cadi gó. Peru ora Jiobá biʼniʼ ca beendaʼ ca la? cadi bíʼnidibe laacaʼ para guiniʼcaʼ. Ngue runi guyuu sti binni gadxé ni bisiníʼ beendaʼ que. Tu laabe yaʼ.

Cadi Adán diʼ ni. Zándaca tobi de ca binni ni bizáʼ Jiobá ante guzáʼ Guidxilayú. Ca binni riʼ la? nácacabe ángel ne qué zanda gúʼyanu laacabe. Ángel riʼ la? nabé gúcabe naroʼ. Laabe guníʼ íquebe gácabe xaíque casi Dios ne de que naquiiñeʼ guzuubacabe stiidxabe ne Jiobá coʼ. Laabe nga bisuniʼbe beendaʼ que.

Ángel riʼ gunda bisuguiibe Eva. Ora gúdxibe Eva de que zaca casi Dios pa laa gó de cuananaxhi que, Eva biʼniʼ cré laabe. Ngue runi gudóbeni ne Adán laaca zaqueca biʼniʼ. Adán ne Eva qué nuzuubacabe stiidxaʼ Dios pur nga biníticabe lídxicabe, jardín sicarú que.

Peru ziuu ti dxi la? Dios zuni guidubi naca Guidxilayú riʼ sicarú casi jardín de Edén que. Despué zúʼyanu ximodo lii zanda gacaneuʼ gácani. Yanna chiguidúʼyanu xi guca Adán ne Eva.

Génesis 2:16, 17; 3:1-13, 24; Apocalipsis 12:9.



Guendarinabadiidxaʼ

  • Biiyaʼ lu dibuju ca. Xi cayaca Adán ne Eva.
  • Xiñee biʼniʼ castigar Jiobá laacabe pue.
  • Xi gudxi ti beendaʼ Eva.
  • Tu biʼniʼ de que beendaʼ que guiniʼné Eva.
  • Xiñee biniti Adán ne Eva lidxi ndaaniʼ Paraísu que.

Xcaadxi guendarinabadiidxaʼ

  • Biindaʼ Génesis 2:16, 17 ne 3:1-13, 24.

    Guendarinabadiidxaʼ ni biʼniʼ beenda que Eva, xiñee biluíʼ ni casi ora bisuguii Jiobá pue. (Gén. 3:1-5; 1 Juan 5:3.)

    Xiñee riquiiñeʼ quixhená ejemplu stiʼ Eva laanu. (Fili. 4:8; Sant. 1:14, 15; 1 Juan 2:16.)

    Ximodo gucalaʼdxiʼ Adán ne Eva nireecueʼcaʼ de xtóndacaʼ. (Gén. 3:12, 13.)

    Ximodo bisihuinni ca querubín cayapa jardín de Edén que, de que Jiobá si nga napa derechu de guni mandar. (Gén. 3:24.)

  • Biindaʼ Apocalipsis 12:9.

    Pabiáʼ cayuni ganar Binidxabaʼ ra cayacaláʼdxibe chuʼ binni contra gobiernu stiʼ Dios. (1 Juan 5:19.)