Biiyaʼ guiraʼ ni nuu lu sitiu riʼ

guyé lu índice

Historia 2: Ti jardín sicarú

Historia 2: Ti jardín sicarú

¡BIIYAʼ Guidxilayú riʼ! ¡Guizáʼ sicarú nuu guiráʼ ni! Biiyaʼ ca guixihuiiniʼ ca ne ca yaga naroʼbaʼ ca, ca guieʼ ca ne guiráʼ ca maniʼ ca. Ruuyuʼ paraa nuu ca elefante ne ca lión ca°la?

Ca maniʼ ni nuu ndaaniʼ jardín de Edén

Paraa biree jardín sicarú riʼ pue. Buenu, chiguidúʼyanu ximodo ndiʼ binichaahuiʼ Dios Guidxilayú riʼ para laanu.

Primé la? Dios bizáʼ guixi gaʼ para guchii Guidxilayú riʼ. Ne laaca bíʼnibe gadxé gadxé yagahuiiniʼ ne yaga naroʼbaʼ. Guiráʼ cani rindani ca la? runi cani jma sicarú Guidxilayú riʼ. Peru cadi nga si diʼ, sínuque stale de laacani rudii cani laanu ni guidoʼno.

De raqué la? Dios bizáʼ benda para chuʼ ndaaniʼ nisa ne manihuiiniʼ para guipapa guibáʼ. Bíʼnibe biʼcuʼ ne maniʼ ne mistuʼ; maniʼ naroʼbaʼ ne manihuiiniʼ. Ñee nuu manihuiiniʼ gaxha de raliʼdxuʼ la? ¡Guizáʼ nachaʼhuiʼ Dios pur guiráʼ ni bíʼnibe para laanu!

Últimu la? Dios binichaahuiʼ ti ndaa de Guidxilayú riʼ, ne gadxepeʼ modo bíʼnibe ni. Gulee labe ni jardín de Edén. Guiráʼ cani guca cani jneza. Guizáʼ sicarú guiráʼ ni guyuu raqué. Ne zacapeʼ nga gucalaʼdxiʼ Dios ñaca guidubi naca Guidxilayú, casi jardín sicarú ni bíʼnibe riʼ.

Peru biiyadxí lu dibuju ca sti tiru. Nannuʼ xi biiyaʼ Dios biaadxaʼ ndaaniʼ jardín riʼ°la? Chiguidúʼyanu.

Génesis 1:11-25; 2:8, 9.



Guendarinabadiidxaʼ

  • Ximodo biʼniʼ Dios Guidxilayú riʼ para laanu.
  • Dios biʼniʼ stale maniʼ. Ñee zanda guiniʼluʼ chupa chonna de laacame la? (Biiyaʼ lu dibuju ca.)
  • Xiñee gadxepeʼ modo guca jardín de Edén que.
  • Ximodo gucalaʼdxiʼ Dios ñaca guidubi naca Guidxilayú riʼ.

Xcaadxi guendarinabadiidxaʼ

  • Biindaʼ Génesis 1:11-25.

    Xi bizáʼ Dios lu guionna gubidxa que. (Gén. 1:12.)

    Xi bizaʼbe lu guidapa gubidxa que. (Gén. 1:16.)

    Xi maniʼ bizáʼ Jiobá lu gaayuʼ ne xhoopaʼ gubidxa que. (Gén. 1:20, 21, 25.)

  • Biindaʼ Génesis 2:8, 9.

    Xi chupa yaga gadxé de xcaadxi yaga guluu Dios ndaaniʼ jardín que ne xi riníʼ cani.