Biiyaʼ guiraʼ ni nuu lu sitiu riʼ

guyé lu índice

Historia 10: Ti nisaguié guizáʼ naroʼbaʼ

Historia 10: Ti nisaguié guizáʼ naroʼbaʼ

FUERA de arca que la? ca binni que bíʼnirucaʼ ni malu. Caʼruʼ diʼ guni crécabe de que ziaba Nisaguié naroʼbaʼ que. Zándaca jmaruʼ si bixídxicabe xa. Peru qué nindaa diʼ bisaanacabe de guxídxicabe.

Ca binni ne ca maniʼ ni cadxibi ugaanda nisa laacaʼ

Málasi bizulú biaba nisa. Biábani de guibáʼ casi ora rilate ti cubeta nisa. ¡Dxandipeʼ nga ni guníʼ Noé! Peru maʼ guirútiruʼ ñanda ñuu ndaaniʼ arca que purtiʼ Jiobá maʼ biseeguʼ dxiichiʼ ni.

Qué nindaa diʼ guiráʼ layú ni cadi°nasoo que bilaahuacaʼ. Nisa que biluíʼ ni casi guiiguʼ, dede bicaanáʼ ni ca yaga que ne biniibi ni ca guié que ne biʼniʼ ni stale ruidu. Ca binni que bidxíbicaʼ ne gudxíʼbacaʼ lu layú ni jma nasoo. ¡Pabiáʼ gucaláʼdxicabe nucaadiágacabe Noé ne ñuucabe ndaaniʼ arca que ora zuxáleruʼ puertaʼ que yaʼ! Peru maʼ qué ñanda diʼ.

Nisa que gudxiʼbaʼ ni, ne gudxiʼbaʼ ni, ne pur cuarenta dxi ne cuarenta gueelaʼ biaba nisa de guibáʼ. Gudxiʼbaʼ ni ca dani que, ne qué nindaa diʼ dede ca dani jma nasoo que bidxii. Cásipeʼ modo guníʼ Dios, guiráʼ binni ne maniʼ ni nuu fuera la? guti. Peru guiráʼ cani nuu ndaaniʼ arca que bilacaʼ.

Noé ne ca xiiñiʼ bíʼnicaʼ ti dxiiñaʼ galán ra bíʼnicaʼ arca que. Nisa que gundíʼsani, ne laani bizaabi ni luguiáʼ. Ti dxi, guleza si nisaguié que biree Gubidxa. ¡Aque naróʼ xa! Nisi puru nisa rihuinni guiráʼ ladu ne nizi rihuinni raqué nga arca que zabiʼ lu nisa.

Arca ni zabiʼ lu nisa

Maʼ qué ñuu diʼ ca gigante que. Maʼ qué zabiguétadicaʼ para guninacaʼ binni. Guirácabe maʼ gúticabe, laacabe ne jñaacabe ne guiráʼ binni malu que. Peru, xi guca xa de bixhózecabe yaʼ.

Ca bixhoze ca gigante que cadi°dxandíʼ diʼ binni casi laanu laacabe. Laacabe nácacabe ángel ni biete lu Guidxilayú riʼ para guibánicabe casi binni. Ngue runi, ora biaba Nisaguié naroʼbaʼ que la? qué ñatidíʼcabe ne xcaadxi binni que sínuque bisaanacabe xcuérpucabe casi binni ne bibiguétacabe guibáʼ casi ángel. Peru maʼ qué ñuudíʼcabe lade ca ángel stiʼ Dios. Gúcacabe ángel stiʼ Binidxabaʼ. Biblia ribee lá ca ángel riʼ demonio.

Yanna Dios biʼniʼ de que gundubi ti bi, ne ca nisa stiʼ nisaguié naroʼbaʼ que la? bizulú biete cani. Gaayuʼ beeu despué arca que biaana ni lu ti dani. Gudiʼdiʼ si stale dxi, cani nuu ndaaniʼ arca que gunda biiyacaʼ fuera ne ique ca dani que. Ca nisa que ziguiétecaʼ ne ziguiétecaʼ.

Óraque Noé biseendabe ti biaʼquiʼ ti manihuiiniʼ casi bigose cheʼ fuera, peru manihuiiniʼ riʼ ripapa ne óraque ribiguétame stubi purtiʼ qué nidxélame paraa ñaaname. Guyérume, peru cada guibiguétame la? ruzuhuaame lu arca que.

Ti paloma

Noé gucalaʼdxiʼ ñuuyaʼ pa maʼ biete nisa que, ngue runi despué la? biseendabe ti paloma dede ndaaniʼ arca que. Peru paloma riʼ laaca bibiguetaʼ, purtiʼ qué nidxela paraa ñaana. Noé biseenda laame sti biaje ne ora bibiguétame la? maʼ neme ti bandagahuiiniʼ lu xpícume. Ca nisa que maʼ biétecaʼ. Ra bionna biaje biseenda Noé paloma que la? laame bidxélame ra nabidxi para guibánime.

Yanna Dios guniʼné Noé. Rábibe laa: Biree ndaaniʼ arca ca, ne yené ca binnilídxiluʼ ne ca maniʼ ca. Jma de ti iza guyuucabe ndaaniʼ arca que. ¡Guníʼ ique si lii pabiáʼ nayecheʼ guyuucabe pur nabánicabe ne nuucabe fuera sti biaje!

Génesis 7:10-24; 8:1-17; 1 Pedro 3:19, 20.



Guendarinabadiidxaʼ

  • Xiñee maʼ qué ñanda ñuu guirutiʼ ndaaniʼ arca que ora biaba nisaguié que.
  • Panda dxi ne panda gueelaʼ bisaba Jiobá nisaguié que ne dede paraa yendá nisa que.
  • Xi guca arca que ora bidxii Guidxilayú que de nisa.
  • Ñee bilá ca gigante que lu Nisaguié naroʼbaʼ que la? Xi guca xa de ca bixhózecabe yaʼ.
  • Xi guca arca que gaayuʼ beeu despué.
  • Xiñee biseenda Noé ti biaʼquiʼ guiree fuera de arca que.
  • Ximodo gunna Noé de que maʼ biete ca nisa que.
  • Despué de guyuu Noé ne ca binnilidxi jma de ti iza ndaaniʼ arca que, xi gudxi Jiobá laacabe.

Xcaadxi guendarinabadiidxaʼ

  • Biindaʼ Génesis 7:10-24.

    Tu guiráʼ bigaanda guendarinitilú que ndaaniʼ Guidxilayú riʼ. (Gén. 7:23.)

    Pabiáʼ bindaa para bibidxi ca nisa stiʼ Nisaguié naroʼbaʼ que. (Gén. 7:24.)

  • Biindaʼ Génesis 8:1-17.

    Ximodo culuíʼ Génesis 8:17 de que, qué nuchaadiʼ ni gudixhe ique Dios guni ne Guidxilayú riʼ. (Gén. 1:22.)

  • Biindaʼ 1 Pedro 3:19, 20.

    Xi castigu gucuaa ca ángel ni qué nuzuubaʼ diidxaʼ que ora bibiguétacabe guibáʼ. (Jud. 6.)

    Ora gúʼndanu relatu stiʼ Noé ne ca binnilidxi, ximodo riguidxi confianza ni nápanu Jiobá de que zanda gulá ca binni xquidxi. (2 Ped. 2:9.)