Biiyaʼ guiraʼ ni nuu lu sitiu riʼ

guyé lu índice

Mardoqueo ne Ester

Mardoqueo ne Ester

 Historia 82

Mardoqueo ne Ester

GUIBIGUÉTANU caadxi iza ante cheʼ Esdras Jerusalén. Mardoqueo ne Ester nga chupa israelita ni jma risaca nuu lu reinu stiʼ Persia. Ester naca reina ne xprímube Mardoqueo naca segundu stiʼ rey. Chiguidúʼyanu ximodo guca ndiʼ.

Jñaa ne bixhoze Ester gúticaʼ dxi nahuiinibe, ngue runi Mardoqueo bisiniisi laabe. Asuero, rey stiʼ guidxi Persia la? nápabe ti palaciu guidxi Susa, ne Mardoqueo nga tobi de ca hombre stibe. Ti dxi, Vasti, xheelaʼ rey que, nin qué rúnibe ni na rey que, nga runi, laa ribí sti gunaa para gaca reina. Nannuʼ tu ribibe la? Ya, ribibe Ester, ti gunaa guizáʼ sicarú.

Ñee ruuyuʼ ca binni cugaanda ique nezalú hombre ni rudxiibaʼ laa riʼ la? Laabe nga Hamán, ti hombre risaca ndaaniʼ guidxi Persia. Laabe racaláʼdxibe de que Mardoqueo, hombre zuba casi ruuyuʼ lu dibuju riʼ, laaca ugaanda ique nezalube. Peru Mardoqueo qué rúnidiʼ ni. Purtiʼ para laabe cadi jneza diʼ nga ugaanda íquebe nezalú ti hombre malu. Hamán guizáʼ ridxiichi. Biiyaʼ xi rúnibe yanna.

Hamán riniʼbe mal de ca israelita nezalú rey que. Guizáʼ malu laacabe ne qué ruzuubacabe diidxaʼ ca ley stiluʼ rábibe rey que. Naquiiñeʼ gáticabe. Asuero qué ganna diʼ pa israelita xheelaʼ. Ngue runi rucaadiágabe Hamán, ne rúnibe ti ley ni riníʼ xi dxi gati guiráʼ israelita.

Ora runadiaga Mardoqueo ndiʼ la? guizáʼ riuube xizaa. Ne ruseendabe ca diidxaʼ riʼ ra nuu Ester: Guniʼné rey ca ne gunabaʼ laabe gulabe laanu. Peru lu ley stiʼ Persia que na de que para guʼyaʼ binni rey que naquiiñeʼ gaca invitar. Peru Ester rie sin gaca invitar. Rey que bisugaa vara de oro stiʼ ora guyuube ra nuu, ngue riníʼ de que cadi naquiiñeʼ diʼ guuticabe laabe. Ester runi invitarbe rey que ne Hamán ti guendaró chigúnibe. Raqué la? rey que rinabadiidxaʼ laabe xi racaláʼdxibe de laa. Ester na de que zaníʼ xi racalaʼdxiʼ pa laabe ne Hamán chécabe sti guendaró ni chigúnibe sti dxi que.

Lu guendaró que la? Ester rábibe rey que: Chiguuticabe ca binni xquidxeʼ ne naa. Rey que guizáʼ ridxiichi. ¡Tu nuu guni nga! na rey que.

Ni nuu guni ndiʼ la? nga nga Hamán, hombre malu riʼ na Ester.

Yanna huaxa ridxiichi rey que. Ne runi mandarbe guuticabe Hamán. Despué, rey que rúnibe Mardoqueo segundu stibe. Mardoqueo ruyúbibe modo gaca sti ley ni gudii lugar ca israelita que tíndecaʼ para gulacaʼ xquendanabánicaʼ dxi nexhe gáticabe que. Cumu Mardoqueo maʼ risaca yanna la? stale binni racané ca israelita que, ne laacabe rilácabe lu naʼ xhenemígucabe.

Libru stiʼ Ester ni zeeda ndaaniʼ Biblia.