Biiyaʼ guiraʼ ni nuu lu sitiu riʼ

guyé lu índice

Ca binni Israel bireecaʼ de Babilonia

Ca binni Israel bireecaʼ de Babilonia

 Historia 80

Ca binni Israel bireecaʼ de Babilonia

MAʼ gudiʼdiʼ chupa iza dede dxi ca medo ne ca persa gucuaacaʼ guidxi Babilonia. ¡Yanna, biiyaʼ xi cayaca! Ya, ca israelita ca careecaʼ de Babilonia. Ximodo bireecabe ne tu bidii lugar guireecabe yaʼ.

Ciro nga gulee laacabe, ti rey stiʼ guidxi Persia. Dede ante gale Ciro la? Jiobá gúdxibe Isaías hombre riguixhená stibe, gucaa ca diidxaʼ riʼ: Zuʼnuʼ ni racalaʼdxeʼ guʼnuʼ. Ziaanaxaleʼ ca puertaʼ ca para guicaaluʼ guidxi ca. Ne dxandíʼ, Ciro nga guzaniruʼ para guicaa guidxi Babilonia. Ca medo ne ca persa ca guyuucabe lu gueelaʼ ndaaniʼ guidxi ca purtiʼ biaanaxaleʼ ca puertaʼ que.

Peru Isaías laaca guniʼbe de que Ciro zuni mandar gucuícabe guidxi Jerusalén ne yuʼduʼ que sti biaje. Dxandíʼ biʼniʼ mandar Ciro ndiʼ la? Ya, ndiʼ nga ni gúdxibe ca israelita que: Laché Jerusalén ne raqué lagucuí yuʼduʼ stiʼ Jiobá, Dios stitu. Ne ndiʼ nga ni riguni ca israelita que.

Peru cadi guiráʼ ca israelita ni nuu Babilonia que riécabe Jerusalén, purtiʼ guidxi ca guizáʼ zitu ni. Zítupeni biaʼ 800 kilómetru ne stale de ca israelita que maʼ bióʼxhocaʼ ne huaracaʼ para saacaʼ de raqué. Laaca nuuruʼ xi pur qué riécabe Jerusalén. Peru cani qué rie que la? Ciro rabi laacaʼ: Lagudii plata ne oro ne xcaadxi cosa cani guibiguetaʼ ca para gucuícabe guidxi Jerusalén ne yuʼduʼ stiʼ.

Nga runi, ca israelita ni ribiguetaʼ Jerusalén guizáʼ stale ni ráʼdecaʼ. Ciro laaca rudii laacabe ca tazón ne ca copa ni gulee rey Nabucodonosor ndaaniʼ yuʼduʼ stiʼ Jiobá ora binduuxebe guidxi que. Guizáʼ stale ni riné ca binni que.

Despué de tapa beeu de guzácabe que la? ca israelita que yendácabe Jerusalén biáʼsipeʼ ca dxi guníʼ Jiobá que. Maʼ gudiʼdiʼ setenta iza dede dxi binitilú guidxi que ne biaana ni sin binni. Peru neca maʼ bibiguetaʼ ca israelita ca xquidxi ca la? laacabe zadíʼdicabe dxi nagana, casi chiguidúʼyanu riʼ.

Isaías 44:28; 45:1-4; Esdras 1:1-11.