Biiyaʼ guiraʼ ni nuu lu sitiu riʼ

guyé lu índice

Salomón rucuí ti yuʼduʼ

Salomón rucuí ti yuʼduʼ

 Historia 64

Salomón rucuí ti yuʼduʼ

ANTE gati David la? gúdxibe Salomón ximodo guni yuʼduʼ stiʼ Jiobá. Lu guidapa iza de cayuni gobernar Salomón la? bizulube bicuibe yuʼduʼ que, biaʼsi gadxe iza arondaʼ biquiiñebe para bilúxebe ni. Gayuaa mil hombre runi dxiiñaʼ lu yuʼduʼ que, risácani stale stálepeʼ bidxichi pur guiráʼ oro ne plata ziné ni.

Yuʼduʼ riʼ napa chupa cuartu jma risaca casi gupa tabernáculo que. Peru laacani jma naroʼbaʼ cani. Salomón ruguube guiña stiʼ pactu que ndaaniʼ cuartu nuu galahui que; ne xcaadxi cosa ni gupa tabernáculo que ruguube cani ndaaniʼ sti cuartu.

Ora biluxe yuʼduʼ que la? rúnicabe ti saa naroʼbaʼ stiʼ ni. Salomón rusuxibi nezalú yuʼduʼ que ne runi orarbe, casi ruuyuʼ lu dibuju riʼ. Nin guibáʼ cadi naroʼbaʼ para lii, xapeʼ yuʼduʼ riʼ, na Salomón rabi Jiobá. Peru Dios stinneʼ, bicaadiaga laʼ xquídxiluʼ ora guni orárcabe ndaaniʼ ni.

Biluxe biʼniʼ si Salomón oración que la? biete gui de guibáʼ, ne ruzaaquiʼ ni ca maniʼ ni cudiicabe raqué para gati. Óraque ruzaaniʼ ti biaaniʼ ndaaniʼ yuʼduʼ que. Ni guca riʼ la? rusihuinni de que Jiobá cayunadiaga ne cayechené yuʼduʼ que ne oración stiʼ Salomón. Yanna maʼ yuʼduʼ ca reeda gaca ra guni adorar ca binni guidxi que ne maʼ cadi tabernáculo que diʼ.

Stálepeʼ dxi nga biʼniʼ gobernar Salomón ne stale guendabiaaniʼ, ne ca binni que guizáʼ biéchecaʼ. Peru Salomón richaganáʼ stale gunaa de sti guidxi ni qué runi ni na Jiobá. Zanda guʼyuʼ lu dibuju ca tobi de laacabe cayuni adorar bidóʼ ca. Ne despué rucaacabe Salomón guni adorar xcaadxi bidóʼ stícabe. Nannuʼ xi rizulú raca yanna la? Salomón nabé malu raca, ne ca binni guidxi que maʼ qué ganda chuʼcaʼ nayecheʼ.

Jiobá ridxiichiné Salomón, ne rábibe laa: Zaxhaʼ lii reinu ca ne zudiéʼ ni stobi. Qué zúnediaʼ ni ca dxi nabániluʼ sínuque ca dxi guni gobernar xiiñiluʼ. Peru qué záxhadiaʼ xiiñiluʼ guiráʼ binni riʼ. Chiguidúʼyanu ximodo raca ca ndiʼ.

1 Crónicas 28:9-21; 29:1-9; 1 Reyes 5:1-18; 2 Crónicas 6:12-42; 7:1-5; 1 Reyes 11:9-13.