Biiyaʼ guiraʼ ni nuu lu sitiu riʼ

guyé lu índice

David ne Goliat

David ne Goliat

 Historia 58

David ne Goliat

CA filisteu zeeda tindenecaʼ guidxi Israel sti biaje. Guionnaʼ biʼchiʼ David ni jma huaniisi nuucaʼ lade ca xpinni Saúl para tíndecaʼ. Ngue runi, ti dxi la? Isaí gúdxibe David: Yené biidxiʼ ne pan ra nuu ca bíʼchiluʼ. Ne biiyaʼ ximodo nuucabe.

Ora yendabe raqué la? ruxooñebe riyúbibe ca bíʼchibe de ra chitíndecaʼ. Goliat gigante stiʼ ca filisteu que biree cuxidxi de ca israelita que. Sicaríʼ huayúnibe guiráʼ siadóʼ ne guiráʼ gueelaʼ pur cuarenta dxi. Rucaabe ridxi: Laguyubi tuuxa para tindené naa, pa laabe guni ganarbe ne guutibe naa la? laadu zácadu esclavu stitu. Peru pa naa guneʼ ganar ne guuteʼ laabe la? laatu zácatu esclavu stidu. Cucaaluaʼ laatu para guyúbitu tuuxa tindené naa.

David gunabadiidxaʼ caadxi soldadu: Xii nga guicaa ni guuti filisteu riʼ ne cuee guidxi Israel de stuí riʼ yaʼ.

Saúl zudii laabe stale bidxichi, ne laaca zudiibe laa xiiñibe para guichaganáʼ, na tobi de ca hombre que rabi laabe.

Peru guiráʼ ca israelita que ridxíbicaʼ Goliat purtiʼ nabé nangola. Laabe nasoobe biaʼ chonna metru, ne nápabe ti soldadu ni ruaʼ escudu stibe.

Tuudxi soldadu bireecaʼ zitídxicaʼ rey Saúl de que David nuu tindené Goliat. Peru Saúl rabi David: Qué zanda diʼ. Ti hombrehuiiniruʼ lii, ne laabe máʼcaruʼ huadíndebe. Para na David: Naa biiteʼ ti oso ne ti lión ni ziné ca dendxuʼ stiʼ bixhozeʼ. Yanna filisteu riʼ zaca casi tobi de laacame. Jiobá zacané naa. Nga runi, Saúl rabi laabe: Guyé, ne Jiobá chuʼné lii.

David riete ndaaniʼ ti guiiguʼ ne rutópabe gaayuʼ guié lisu ne ruguubeni ndaaniʼ murral stibe. Óraque riguíʼbabe ne guixhe bizeendaʼ stibe para tindenebe gigante que. Goliat qué guiráʼ guidxagayaa, ne qué iganna nga ruuyabe guutibe David.

Gudáʼ raríʼ, na Goliat, ne zudiéʼ beela ládiluʼ gó ca maniʼ ca. Peru David rabi laabe: Lii zeedaluʼ ra nuaa ne ti guiibaʼ duxhuʼ, ne ti lanza ne sti lanzahuiiniʼ, peru naa zendaʼ luguialuʼ ne lá Jiobá. Yannadxí Jiobá zudii lii lu nayaʼ ne naa zuuteʼ lii.

Óraque David ruxooñeʼ ra nuu Goliat. Guleebe ti guié ndaaniʼ murral stibe ne guluubeni ndaaniʼ guixhe bizeendaʼ stibe, ne bilaabeni ne guiráʼ stípabe ra nuu Goliat. ¡Guié que guyuuni ndaaniʼ ique Goliat, ne laa biaba ne guti! Biiyaʼ si ca filisteu que biaba ni rulá laacaʼ la? bixooñecaʼ. Ca israelita que rinándacaʼ laacabe ne runi ganarcaʼ guendaridinde que.

1 Samuel 17:1-54.