Biiyaʼ guiraʼ ni nuu lu sitiu riʼ

guyé lu índice

Rut ne Noemí

Rut ne Noemí

 Historia 51

Rut ne Noemí

NDAANIʼ Biblia zadxeʼluʼ ti libru láʼ Rut. Nácani ti historia stiʼ ti familia ni bibani ca dxi gupa guidxi Israel juez. Rut la? ti baʼdudxaapaʼ de guidxi Moab laabe, ne cadi de Israel diʼ, xquidxi Dios. Peru ora Rut riziidiʼ de Dios ni dxandíʼ dxandipeʼ Jiobá la? ranaxhiibe laa stale. Noemí nga ti binnigola ni gucané Rut gunibiáʼ Jiobá.

Noemí la? de Israel laabe. Laabe ne xheelabe ne guiropaʼ xiiñibe yendézacabe guidxi Moab ora bixiéʼ guendaró Israel. Ti dxi la? xheelaʼ Noemí guti, ne despué ca xiiñiʼ Noemí que bichaganácabe chupa moabita, tobi que láʼ Rut ne stobi que láʼ Orpá. chii iza despué guiropaʼ xiiñiʼ Noemí que gúticaʼ. ¡Guizáʼ triste! Xi guni Noemí yanna pue.

Ti dxi guníʼ ique Noemí guibiguetaʼ ra nuu ca binni xquidxi cani nabeza zitu de laabe. Rut ne Orpá racaláʼdxicaʼ chuʼnecaʼ laabe ngue runi laaca rinecaʼ laabe. Peru despué ora zeecabe neza la? Noemí rabi ca baʼdudxaapaʼ que: Laguibiguetaʼ xquídxitu ne laguiaanané jñaatu.

Noemí bidii ti bixiduʼ laacabe ne gudxi laacabe maʼ cheʼ. Laacabe bizulú biinacabe purtiʼ guizáʼ nadxiicabe Noemí. Nácabe: ¡Coʼ! Laadu zinedu lii ra nuu ca binni xquídxiluʼ. Peru Noemí ricabi laacabe: Xiiñehuiinecaʼ, laatu nápatu xidé guibiguétatu, purtiʼ jma galán zieni laatu laade ca binni xquídxitu. Óraque Orpá ribiguetaʼ xquidxi. Peru Rut qué rie diʼ.

Noemí ribiguetaʼ ra nuube ne na rabi laabe: Orpá maʼ zeʼ, yené laabe. Peru Rut ricabi: ¡Cadi gaʼbuʼ naa gusaana lii! Bidii lugar chiniáʼ lii. Ra cheuʼ ca naa ziaa, ne ra cuezuʼ ca zabezaʼ. Xquídxiluʼ zaca xquidxeʼ ne Dios stiluʼ zaca Dios stinneʼ. Ra gátiluʼ naa zateʼ ne racá zucaachicabe naa. Ora Rut riníʼ ca diidxaʼ riʼ la? Noemí rusaana de gudxiguetaʼ laabe.

Guiropaʼ gunaa que yendácabe guidxi Israel, ne riaanacabe raqué. Rut ruzuluca runi dxiiñaʼ lu layú, purtiʼ ca dxi que rutópacabe cebada. Ti hombre láʼ Booz rudii lugar gutópabe cebada lu laxhiú. Nannuʼ tuu nga guca jñaa Booz la? Jñaabe nga Rahab, de guidxi Jericó que.

Ti dxi la? Booz rábibe Rut: Maʼ huayuudiagaʼ stale de lii, ne de pabiáʼ nacháʼhuiluʼ ne Noemí. Maʼ nannaʼ de que bisaanaluʼ jñaaluʼ ne bixhózeluʼ ne xquídxiluʼ ne beedu ndaaniʼ ti guidxi ni qué runibiaʼluʼ. ¡Racalaʼdxeʼ gaca Jiobá nachaʼhuiʼ ne lii!

Rut ricabi laabe: Nabé nacháʼhuiluʼ ne naa, señor. Sicarupeʼ nuaʼ pur ca diidxaʼ guʼdxu naa ca. Booz guizáʼ riuláʼdxibe Rut ne qué nindaadiʼ bichaganácabe. ¡Guizáʼ nayecheʼ riuu Noemí xa! Peru jma nayecheʼ riuube ora Rut ne Booz rápacaʼ primé xiiñicaʼ, láʼ Obed. Despué la? Obed reeda gaca bixhozebida David, despué zazíʼdinu jma de laabe.

Libru stiʼ Rut ni zeeda ndaaniʼ Biblia.