Biiyaʼ guiraʼ ni nuu lu sitiu riʼ

guyé lu índice

Gedeón ne ca 300 hombre stiʼ

Gedeón ne ca 300 hombre stiʼ

 Historia 52

Gedeón ne ca 300 hombre stiʼ

RUUYUʼ xi cayaca raríʼ la? Hombre ridinde stiʼ Israel laacabe. Cani ruuyuʼ caguude ca la? cayécabe nisa nga. Gedeón, juez riʼ zuhuaa gaxha de laacabe cayuuyaʼ ximodo réʼcabe nisa.

Biiyaʼ chaahuiʼ gadxé gadxé modo reʼ ca hombre ca nisa. Caadxi de laacaʼ rindeteʼ íquecaʼ dede ruaa nisa ca. Peru tobi de laacabe rigapi nisa ca ne náʼ ne rineni de ra ruaa, ti ganda gúʼyabe guiráʼ ladu. Nabé naquiiñeʼ ndiʼ, purtiʼ Jiobá gúdxibe Gedeón cuí cani ruuyadxí guiráʼ ladu laga cayecaʼ nisa. Xcaadxi ca la? naquiiñeʼ guibiguétacaʼ ralídxicaʼ. Guidúʼyanu xiñee.

Ca israelita ca maʼ nuucabe lu guendanagana sti biaje purtiʼ qué ruzuubacabe stiidxaʼ Jiobá. Ca madianita ca gúcacaʼ jma nadipaʼ que laacabe ne cayuninacaʼ laacabe. Ngue runi gunábacabe Jiobá gacané laacabe, ne Jiobá binadiaga stídxicabe.

Jiobá gúdxibe Gedeón guyubi tuudxi hombre ridinde, ne Gedeón rucasaa 32.000 hombre. Peru nuu 135.000 hombre cucaalú Israel. Neca zacá la? Jiobá na rabi Gedeón: Nápaluʼ stálepeʼ hombre. Xiñee riniʼbe zacá pue.

Purtiʼ pa ca israelita ca guni ganarcaʼ guendaridinde ca la? zándaca guiníʼ íquecaʼ de que cadi caquiiñedicabe gacané Jiobá laacabe para guni ganárcabe, sínuque laasicabe zanda. Nga runi Jiobá rábibe Gedeón: Gudxi guiráʼ tu cadxibi guibiguetaʼ ralidxi. Ora Gedeón runi ndiʼ la? 22.000 hombre ribiguetaʼ. Biaʼsi riaananebe 10.000 si hombre para gucaalúcabe ca 135.000 soldadu que.

Peru, ¡binadiaga! Xi na Jiobá rabi laabe: Stáleruʼ hombre nápaluʼ. Ngue runi rábibe Gedeón gucaa ca hombre ca guecaʼ de nisa cuxooñeʼ raqué, ne despué guseendabe chibíʼ guiráʼ tu gundeteʼ ique ruaa nisa que para gueʼ. Zacaniáʼ lii guni ganarluʼ ne ca 300 hombre ni ruuyadxicaʼ guiráʼ laadu laga cayecaʼ nisa ca, na Jiobá rabi laabe.

Ridxiña dxi para tíndecabe que. Gedeón gundaabe ca 300 hombre biaananebe que pur chonna grupuhuiiniʼ. Cada tobi de ca hombre que rudiibe laacaʼ ti cachu, ne ti guisu nuu ti antorcha ndaaniʼ. Biaʼ galaa gueelaʼ la? guirácabe ridxíñacabe gaxha de ra nabeza ca xhenemígucabe. Óraque guirácabe ruxhídxicabe cachu stícabe ne rindaacabe ca guisu que ne ribidxiaacabe: ¡Espada stiʼ Jiobá ne stiʼ Gedeón! Ora ca xhenemígucabe que ribánicaʼ la? ridxíbicaʼ ne qué ñánnacaʼ xi ñúnicaʼ. Guirácabe ruxooñecabe, ne ca israelita que runi ganarcaʼ.

Jueces, capítulo 6 hasta 8.