Biiyaʼ guiraʼ ni nuu lu sitiu riʼ

guyé lu índice

Nabani Jesús

Nabani Jesús

 Historia 102

Nabani Jesús

ÑEE nannuʼ tu gunaa riʼ ne guiropaʼ hombre riʼ la? Gunaa riʼ nga María Magdalena, xhamiga Jesús. Ne ca hombre nabaʼquiʼ lari naquichiʼ ca nga ca ángel stiʼ Dios. María cayuuyaʼ ndaaniʼ baʼ ra guluucabe xcuerpu Jesús, ¡peru cuerpu ca gastiʼ diʼ ni racá! Tu laa ziné ni yaʼ. Guidúʼyanu.

Guti si Jesús la? ca ni ruzaaquiʼ guʼxhuʼ que rábicabe Pilatu: Dxi nabani Jesús guníʼ de que ziasa despué de chonna gubidxa. Nga runi, biʼniʼ mandar tuuxa chigapa baʼ ca. Zacá maʼ qué zanda cuanaʼ ca discípulo stibe xcuérpube ne guiniʼcaʼ de que maʼ biásabe lade gueʼtuʼ. Pilatu rabi laacabe guseendacabe soldadu.

Siadoʼroʼ lu guionna gubidxa despué de guti Jesús que la? málasi rihuinni ti ángel stiʼ Jiobá. Ángel riʼ ribeebe guié ni nutaaguʼ ruaa baʼ que. Ca soldadu que guizáʼ ridxíbicaʼ dede qué randa riniibicaʼ. Biaʼsi ora ruuyadxícabe ndaaniʼ baʼ que la? ¡maʼ gastiʼ cuerpu que! Chupa chonna de ca soldadu que riécabe ndaaniʼ guidxi ne riniʼnécabe ca ni ruzaaquiʼ guʼxhuʼ que. Nannuʼ xi runi ca ni ruzaaquiʼ guʼxhuʼ qué iquiiñeʼ que la? Riguíxecabe ca soldadu que para gusiguiicaʼ. Rábicabe laacaʼ, laguiníʼ de que ca discípulo ca ziné laabe laga nisiaasitu.

Laga cayaca ca ngue la? caadxi xhamiga Jesús rigánnacaʼ ra baʼ que. ¡Ruuyacabe guirutiʼ nuu ndaaniʼ ni! Málasi bihuinni chupa ángel raqué cuzaaniʼ xhábacaʼ. Xiñee cuyúbitu Jesús raríʼ pue, na ca ángel que rabi ca gunaa que. Laabe maʼ biásabe. Laché nagueenda ne lagábini ca discípulo stibe. Oraqueca ruxooñecabe. Peru neza zeecabe que ti hombre rucueeza laacabe. ¡Nácasini Jesús! Jesús rabi laacabe: Laché ne lachitídxini ca discípulo stinneʼ.

Ora ca gunaa que rábicabe ca discípulo que de que Jesús nabani ne maʼ biiyacabe laa la? raca nagana laacabe guni crécabe ni. ¡Pedru ne Juan ruxooñecaʼ ne riecaʼ ra baʼ que, peru guirutiʼ nuu ndaaniʼ ni! Rireesicabe de raqué la? María Magdalena riaana atrá. Óraque ruuyabe ndaaniʼ baʼ que guiropaʼ ángel que.

Nannuʼ xi guca ne xcuerpu Jesús la? Dios biʼniʼ de que guinitilú ni. Dios qué nindisaʼ diʼ laabe ne cuerpu ni maca nápabe que sínuque bidii laabe ti cuerpu cubi de espíritu, cásica stiʼ ca ángel que. Peru para guluiʼbe ca discípulo que de que nabánibe la? Jesús rusihuinni laa ne ti cuerpu ni zanda gúʼyacabe.

Mateo 27:62-66; 28:1-15; Lucas 24:1-12; Juan 20:1-12.