Biiyaʼ guiraʼ ni nuu lu sitiu riʼ

guyé lu índice

Gusi ti hombrehuiiniʼ

Gusi ti hombrehuiiniʼ

 Historia 111

Gusi ti hombrehuiiniʼ

¡BIIYAʼ! Xi cayaca raríʼ pue. Ñee gucanapeʼ hombrehuiiniʼ nexhe layú ca la? ¡Biiyaʼ, tobi de ca hombre ziree ndaaniʼ yoo ca nga Pablu! Ñee laaca ruuyuʼ Timoteu racá la? Nouʼ de ra ventana ca nga biaba hombrehuiiniʼ ca la?

Ya, ngapeʼ nga ni guca. Pablu cudiibe ti libana para ca discípulo stibe guidxi Troas. Laabe nánnabe de que zandaa para gúʼyabe laacaʼ sti biaje purtiʼ zareebe ziebe lu barcu sti dxi que. Nga runi, neca maʼ galaa gueelaʼ laabe caníʼrube.

Hombrehuiiniʼ riʼ láʼ Eutico. Laabe gúsibe zúbabe ra ventana ca. Biábabe de ruaa ventana ni nuu de lu guionna pisu ca. Nga runi ruuyuʼ ca binni ca nuucaʼ xizaa. Ora ca hombre ca rindísacaʼ hombrehuiiniʼ riʼ, ruuyacaʼ maʼ gútibe.

Ora biiyaʼ Pablu de que maʼ guti hombrehuiiniʼ riʼ la? ráʼtabe luguiáʼ ne riguiidxibe laa. Ne óraque riniʼbe: Cadi chuutu xizaa. ¡Laabe nuube galán! ¡Ne dxandíʼ! ¡Ti milagru ndiʼ! ¡Pablu maʼ bisibani laabe! Guizáʼ riecheʼ guiráʼ binni que.

Guirácabe riguíʼbacabe sti biaje ne roxhícabe. Pablu bizulú guníʼ sti tiru dede birá gueelaʼ. Peru Eutico maʼ qué ñásiruʼ. Óraque Pablu, Timoteu ne cani ziné laabe que riguíʼbacabe lu ti barcu. Ñee nannuʼ paraa riécabe la?

Pablu caluxe guionna viaje stiʼ de gucheechebe diidxaʼ ne laabe ribiguétabe ralídxibe. Bindaabe chonna iza ndaaniʼ guidxi Efeso lu viaje bíʼnibe riʼ. Nga runi lu guionna viaje riʼ bindaabe jma que lu guiropa que.

Bireesibe Troas la? barcu que gulezadxini caadxi dxi Mileto. Cumu Efeso nga nuu gaxha de guidxi riʼ la? Pablu bisendacaabe ca hombre jma huaniisi de cani ridagulisaa Efeso para guiníʼnebe laacaʼ. Despué la? ca binni que guizáʼ triste riuucaʼ ora ruuyacaʼ maʼ zeʼ Pablu lu barcu.

Barcu que ribiguetaʼ Cesarea. Laga riaana Pablu ralidxi discípulo Felipe la? ti hombre riguixhená láʼ Ágabo riníʼ de que ora chindá Pablu Jerusalén zuseguyoocabe laa. Ne ngapeʼ nga ni raca, cásipeʼ guníʼ Ágabo que. Chupa iza de nuseguyoocabe Pablu Cesarea ruseendacabe laabe guidxi Roma para guni juzgar César laabe, gobiernu stiʼ guidxi que. Guidúʼyanu xi raca lu viaje riʼ.

Hechos, capítulo 19 hasta 26.