Biiyaʼ guiraʼ ni nuu lu sitiu riʼ

guyé lu índice

Bireecabe de ndaaniʼ lidxi guiibaʼ

Bireecabe de ndaaniʼ lidxi guiibaʼ

 Historia 106

Bireecabe de ndaaniʼ lidxi guiibaʼ

BIIYAʼ ángel ni nuxhaleʼ puertaʼ stiʼ lidxi guiibaʼ ca. Cabeebe ca apóstol stiʼ Jesús. Guidúʼyanu xiñee nuucabe ndaaniʼ lidxi guiibaʼ riʼ.

Despué de biaba espíritu santu luguiáʼ ca discípulo stiʼ Jesús, ndiʼ nga ni raca: Ti huadxí, Pedru ne Juan riécabe ra yuʼduʼ stiʼ Jerusalén. Gaxha de ra puertaʼ yuʼduʼ que ribí tobi hombre ni qué rizá dede dxi gule. Ca binni que riné laabe ra yuʼduʼ que guiráʼ dxi para guinábabe guna cani ziyuu raqué. Ora ruuyabe Pedru ne Juan la? rinábabe laacaʼ guna. Xi gúnicabe yaʼ.

Laacabe ruzuhuaadxícabe ne ruuyadxícabe laabe. Qué gápadiaʼ bueltu, na Pedru rabi laabe, peru zudiéʼ lii ni napaʼ. ¡De lu lá Jesús cayabe lii, biasa ne guzá! Óraque gunaaze Pedru nabe ladu derechu ne gundisaʼ laabe, oraqueca riasa uxooñebe ne rizabe. Guizáʼ ridxagayaa ca binni que ne riéchecaʼ ora ruuyacaʼ milagru riʼ.

Ne poder stiʼ Dios, ni gundisaʼ Jesús lade ca gueʼtuʼ ca nga bíʼnidu milagru riʼ, na Pedru rabi laacabe. Laga caníʼ Pedru ne Juan la? caadxi xaíque stiʼ ca religión que zeedacaʼ. Cadxiichicaʼ purtiʼ cusiidíʼcabe binni de que Jesús biasa lade gueʼtuʼ. Nga runi, rinaazecaʼ laacabe ne ruseguyoocaʼ laacabe.

Sti dxi que la? ca xaíque stiʼ ca religión que bidagulisaacaʼ, ne bisendacaacaʼ Pedru ne Juan ne hombre ni bisiándacabe que. Óraque gunabadiidxacabe laacaʼ, tu stiʼ poder bíʼninetu ca milagru riʼ.

Pedru ricabi laacabe: Ne poder stiʼ Dios, ni gundisaʼ Jesús lade ca gueʼtuʼ que. Ca ni ruzaaquiʼ guʼxhuʼ que, qué gánnacaʼ xi gúnicaʼ purtiʼ qué zanda guiniʼcaʼ de que cadi dxandíʼ guca milagru riʼ. Nga runi, rábicabe ca apóstol que maʼ cadi gusiidicaʼ de Jesús, oraqueruʼ rundaacabe laacaʼ.

Ridiʼdiʼ dxi, ca apóstol que rusiidirucaʼ de Jesús ne rusiándarucaʼ ca binni huará que. Stale binni ranna de ca milagru rúnicabe riʼ, nga runi dede ca binni nabeza ca guidxihuiiniʼ nuu gaxha de Jerusalén que redanecaʼ jma binni huará para gusianda ca apóstol que. Ngue runi, ca xaíque stiʼ ca religión que ridxiichicaʼ ne rinaazecaʼ ca apóstol que. Peru despué raca xiixa.

Lu gueelaʼ beeda ti ángel stiʼ Dios bixheleʼ puertaʼ stiʼ lidxi guiibaʼ que, casi ruuyuʼ lu dibuju riʼ. Ángel que rabi laacabe: Laguiree, laché ndaaniʼ yuʼduʼ ca ne laguiniʼné binni. Sti siadóʼ que, biseendacabe tu chindee ca apóstol que ndaaniʼ lidxi guiibaʼ que, peru qué nidxeladíʼcabe guirutiʼ. Despué ridxélacabe laacaʼ ndaaniʼ yuʼduʼ que ne rinécabe laacaʼ ra Sanedrín.

Gúdxidu laatu cadi gusiidirutu de Jesús, na ca xaíque stiʼ ca religión que. Peru yanna maʼ bichatu Jerusalén de cani cusiiditu ca. Ca apóstol que ricabi laacabe: Jma naquiiñeʼ guzuubadu stiidxaʼ Dios que stiidxaʼ hombre. Ne laacabe rusiidirucabe. ¡Guizáʼ sicarú ejemplu riʼ njaʼ!

Hechos, capítulo 3 hasta 5.