Biiyaʼ guiraʼ ni nuu lu sitiu riʼ

guyé lu índice

Ti cuachi ni gadxepeʼ laacaʼ

Ti cuachi ni gadxepeʼ laacaʼ

 Historia 17

Ti cuachi ni gadxepeʼ laacaʼ

GUIROPAʼ hombrehuiiniʼ ni ruuyuʼ ca la? gadxepeʼ laacabe, njaʼ. Nannuʼ tu lácabe la? Ni naazeʼ flecha ca nga Esaú, ne hombrehuiiniʼ cayapa dendxuʼ ca nga Jacob.

Esaú ne Jacob nga ca cuachi stiʼ Isaac ne Rebeca. Isaac bixhózecabe la? nabé gunaxhiibe Esaú purtiʼ rie guuzeʼ ne ruuti maniʼ guiʼxhiʼ para raca guendaró gó ca binnilídxibe. Peru Rebeca jma gunaxhiibe Jacob, purtiʼ nabé nadóʼ ne nachaʼhuiʼ.

Cumu bixhozebídacabe Abraham nabániruʼ la? zanda guiníʼ íquenu pabiáʼ riulaʼdxiʼ Jacob gucaadiaga laabe guiniʼbe de Jiobá. Bigaanda dxi guti Abraham dxi napa 175 iza ora ca cuachi que maʼ nápacaʼ 15 iza.

Ora gupa Esaú 40 iza la? bichaganabe chupa gunaa de guidxi Canaán. Ndiʼ la? bininani Isaac ne Rebeca, purtiʼ ca gunaa riʼ qué runi adorárdicaʼ Jiobá.

Ti dxi la? guca xiixa ni bicaa Esaú guidxiichi xhaataʼ ne biʼchiʼ Jacob. Bidxiña dxi uguu Isaac ndaayaʼ baʼduʼ primé stiʼ, cumu Esaú jma huaniisi que Jacob la? cabézabe guicaabe ndaayaʼ que. Peru Esaú maʼ bitoo derechu de guicaa ndaayaʼ que lu Jacob, ne ora gúlecabe la? Dios maca guníʼ de que Jacob nga chiguicaa ndaayaʼ que. Ne ndiʼ nga ni guca, Isaac guluu ndaayaʼ Jacob.

Despué, ora gunna Esaú de ni guca que la? bidxiichinebe Jacob, bidxiichi xhaatabe dede guniʼbe zuutibe laa. Ora gunna Rebeca ni la? bichíbini laabe stálepeʼ. Ngue runi, gúdxibe xheelabe Isaac: Pa Jacob laaca guichaganáʼ tobi de ca gunaa de Canaán la? nagana zaca para laanu guni huantarnu ni.

Ngue runi Isaac bicaabe ridxi xiiñibe Jacob ne gúdxibe laa: Cadi guichaganouʼ tobi de ca gunaa de Canaán. Jma galán cheluʼ Harán ralidxi bixhozebídaluʼ Betuel ne guichaganaluʼ tobi de ca xhiágabe, ti xiiñiʼ Labán.

Jacob bizuubaʼ stiidxaʼ bixhoze ne bireebe zebe Harán; guzabe zítupeʼ para guyuube ra nabeza ca binnilídxibe.

Génesis 25:5-11, 20-34; 26:34, 35; 27:1-46; 28:1-5; Hebreos 12:16, 17.