Biiyaʼ guiraʼ ni nuu lu sitiu riʼ

guyé lu índice

Job qué nucheené Dios

Job qué nucheené Dios

 Historia 26

Job qué nucheené Dios

ÑEE qué rialuʼ binni huará ca la? Labe Job, ne gunaa ca nga xheelabe. Nannuʼ xi cayábibe Job la? Guluu di Dios ne guti. Guidúʼyanu xiñee guiniʼbe zacá, ne xi pur gucaná Job stale.

Job guca tobi hombre ni qué nucheené Jiobá ne ni bizuubaʼ stiidxabe. Laabe gulézabe guidxi Uz gaxha de Canaán. Jiobá gunaxhiibe Job stálepeʼ, peru nuu tobi ni nanalaʼdxiʼ laabe. Ñee nannuʼ tuu ndiʼ la?

Nga nga Binidxabaʼ ni laaca láʼ Diablu. Bietenalaʼdxiʼ, laabe nga ángel malu ni nanalaʼdxiʼ Jiobá. Laabe gunda bíʼnibe de que Adán ne Eva gucheenecaʼ Jiobá, ne guníʼ íquebe laaca zanda gúnibe de que sti binni gucheené Dios. Peru, gunda bíʼnibe ni la? Coʼ. Guníʼ ique si guiráʼ hombre ne gunaa ni qué nucheené Dios de ni maʼ bizíʼdinu. Panda de laacabe zanda guietenaláʼdxiluʼ.

Guti si Jacob ne José Egipto la? Job guca ti hombre ni jma bizuubaʼ stiidxaʼ Jiobá lu guidubi Guidxilayú. Jiobá guyuu ñanna Binidxabaʼ de que laa qué zanda diʼ guni de que guiráʼ binni gaca malu, ngue runi gúdxibe laa: Biiyaʼ Job. Biiyaʼ qué liica rucheenebe naa.

Qué rucheenebe lii pue, na Binidxabaʼ, purtiʼ lii cuguuluʼ ndaayaʼ laabe ne cudiiluʼ laabe puru si ni galán xa. Peru pa gáxhaluʼ cani laabe la? zaguudibe lii.

Ngue runi Jiobá na: Guyé, guxha guiráʼ ni laabe. Biʼniʼ guiráʼ ni racaláʼdxiluʼ gúniluʼ laabe. Guidúʼyanu pa zaguudibe naa, peru biiyagá si cadi chiguutuʼ laabe.

Binidxabaʼ bicaabe tuudxi hombre chindanaʼ ca yuze ne camellu stiʼ Job, ne ca dendxuʼ stibe la? gúticaʼ. Ne biitibe ca chii xiiñiʼ Job ne ti bi roʼ. Despué la? bidiibe Job guendahuará feu riʼ. Job gucaná stálepeʼ, ngue runi xheelabe gudxi laabe: Guluu di Dios ne guti. Peru Job qué niná diʼ. Laaca guyé chonna ni na xhamígucaʼ laabe ne gúdxicaʼ laabe de que nabé malu gúcabe. Peru nin ne zaqué, Job qué nuchee diʼ.

Ndiʼ bisiecheʼ ni Jiobá stálepeʼ ne óraque guluube ndaayaʼ Job, casi ruuyuʼ lu dibuju riʼ. Bisiándabe guendahuará stiʼ. Job gupa xi chii xiiñiʼ guizáʼ galán, ne gúpabe doble de ca yuze, dendxuʼ ne camellu ni gúpabe dxiqué.

Ñee qué liica zucheeneluʼ Jiobá casi Job la? Pa zacá lii la? Dios laaca zuguu ndaayaʼ lii, ne zanda guibániluʼ sin gátiluʼ ndaaniʼ Guidxilayú riʼ ora laani gácani sicarú casi jardín de Edén que.

Job 1:1-22; 2:1-13; 42:10-17.