Biiyaʼ guiraʼ ni nuu lu sitiu riʼ

guyé lu índice

Ca binnilidxi José rindézacaʼ Egipto

Ca binnilidxi José rindézacaʼ Egipto

 Historia 25

Ca binnilidxi José rindézacaʼ Egipto

JOSÉ maʼ qué ganda gucueeza laa. Rábibe guiráʼ mozo stibe guireecaʼ ndaaniʼ yoo ra nuucabe que. Ora biaananebe ca bíʼchisibe la? bizulú biinabe. Zanda guiníʼ íquenu pabiáʼ bidxagayaa ca bíʼchibe, purtiʼ qué gánnacabe xi pur cayuunabe. Oraqueruʼ rabi José laacabe: Naa nga José, ñee nabániruʼ bixhoze la?

Ca bíʼchibe guizáʼ bidxagayaacaʼ dede qué ganda guiniʼcaʼ, purtiʼ cadxíbicaʼ. Peru José rabi laacabe: Laguidxiña ra nuaa, naa nga José bíʼchitu, ni bitooto Egipto.

José guníʼneruʼ laacabe ne diidxaʼ nadóʼ: Cadi ugaanitu donda laatu purtiʼ bitooto naa raríʼ. Dxandipeʼ nga Dios biseenda naa Egipto para gulaya binni. Faraón maʼ biʼniʼ naa xaíque guidubi guidxi riʼ. Nga runi lagaca purá laguibiguetaʼ ra nuu bixhozeʼ, lagabi laabe cani maʼ biiyatu riʼ. Ne lagabi laabe gueedabe raríʼ.

Óraque gudiidxi José ca biʼchiʼ ne bidiibe ti bixiduʼ laacaʼ. Ora gunna Faraón beedandá ca biʼchiʼ José la? rábibe José: Bidii laacabe chinécabe carreta para chicaacabe bixhózetu ne ca binnilídxitu ne gueedacabe raríʼ. Zudiéʼ laacabe layú jma galán ni nuu Egipto.

Ne ngue bíʼnicabe. Raríʼ zanda gúʼyaluʼ José cadxagalú bixhoze ora yendá Egipto ne guiráʼ binnilidxi.

Binnilidxi Jacob la? guizáʼ bidálecaʼ. Biaʼsi 70 cabe ora yendézacabe Egipto, Jacob, ca xiiñiʼ ne ca xhiaga. Peru raqué laaca zeeda xheelacabe, ne zándaca stuudxi de ca mozo stícabe. Guirácabe gulézacabe Egipto ne biree lácabe israelita, purtiʼ Dios bichaa lá Jacob ne gulee labe laa Israel. Beeda gácacabe ti guidxi nabé risaca para Dios, casi zadúʼyanu despué.

Génesis 45:1-28; 46:1-27.