Biiyaʼ guiraʼ ni nuu lu sitiu riʼ

Carta stiʼ Grupu ni Zaniruʼ, 2017

Carta stiʼ Grupu ni Zaniruʼ, 2017

Para ca hermanu ni nadxiidu:

Raca biaʼ chupa mil xhoopaʼ gayuaa iza, gupa profeta Ezequiel ti visión ne guizáʼ bidxagayaabe ni bíʼyabe. Lu visión que biiyabe ti carru naroʼbaʼ ne Dios nga zigusá ni. Ni jma bidxagayaa Ezequiel de carru ni nuu guibáʼ riʼ nga pabiáʼ reciu zeʼ ni. Nagueenda zeʼ ni cásica nagueenda rié xpiaaniʼ rayu, ne randa ruchaa ni de dirección sin guieteʼ lu velocidad stini ora guicá bieque ni (Ezeq. 1: 4, 9, 12, 14, 16-27).

¿Xi rusietenalaʼdxiʼ visión riʼ laanu yaʼ? Rusietenalaʼdxiʼ ni laanu qué ribezadxí diʼ parte de organización stiʼ Jiobá ni nuu guibáʼ. Yanna, ¿ximodo nuu parte de organización ni nápabe lu Guidxilayú ri yaʼ? Dxiiñaʼ ni guca lu iza de sirviciu ni maʼ gudiʼdiʼ ca rusihuinni cayacané Jiobá guidxi stiʼ ni nuu lu Guidxilayú ti ganda guxooñeʼ ni reciu cásica cuxooñeʼ carru ni biʼyaʼ Ezequiel lu visión que.

Ndaaniʼ guidxi Estados Unidos, stale de ca hermanu ni nuu lu familia Betel nabé nuu xhiiñacaʼ purtiʼ careecaʼ de Brooklyn para chindézacaʼ ra nuu central mundial yanna riʼ, ndaaniʼ guidxi Warwick (Nueva York), ne nuu tu zindeza sti lugar napa Betel. Ne nuu xcaadxi hermanu maʼ gucuaa asignación fuera de Betel. Ndaaniʼ xcaadxi guidxi roʼ, nuu betelita cayuni dxiiñaʼ nadipaʼ ra cabí xcaadxi yoo Betel, nuu tu cayuni dxiiñaʼ para gaca chaahuiʼ cani ne nuu tu cayuni dxiiñaʼ para gaca fusionar caadxi sucursal, ne nuu betelita ni maʼ yebíʼ sti lugar. Neca qué huasaana stale de laatu lidxi para chindeza sti ladu, nuudu seguru cadi cusaana de gúnitu xhiiñaʼ Jiobá.

Riecheʼ Grupu ni Zaniruʼ ne ridxá tipa ladxidóʼ ora guʼyaʼ yanna nga jma cayuni ca hermanu ni nuu lu guidubi Guidxilayú stale dxiiñaʼ para chinándacaʼ biaʼ zeʼ organización stiʼ Jiobá. Nánnadu maʼ guyé stale hermanu para chigacané ra jma caquiiñeʼ publicador. Xcaadxi maʼ gudixhe ique chiguni predicar ra riníʼcabe sti idioma o iquiiñecaʼ xcaadxi método ni qué huaquiiñecaʼ lu predicación. Ne nuu stale ni cuyubi xcaadxi modo guni jma lu xhiiñaʼ Jiobá. Ne guiráʼ ca xpinni Cristu ni naca fiel, dede né cani maʼ nagola ne cani huará, cuxooñerucaʼ ne cayuni huantarcaʼ lu carrera riʼ ti guicaacaʼ guendanabani. Nin tobi de laacaʼ cadi cusaana de guni xhiiñaʼ Jiobá ne maʼ gudixhe íquecaʼ gusihuínnicaʼ guizáʼ rusiguii Binidxabaʼ (1 Cor. 9:24).

Cadi guiaandaʼ laatu ruuyaʼ Jiobá guiráʼ sacrificiu ni runi guiratu (Heb. 6:10). Cayúnitu cásica biʼniʼ Abrahán ne Sara. Dxi napa Abrahán jma de 70 iza, bizuubaʼ diidxaʼ ora gudxi Dios laa gusaana guidxi Ur ra nabeza ca caldeu para chindezané familia stiʼ Canaán, ti guidxi nuu zitu. Raqué gulézabe ndaaniʼ yoo de lari jma de ti gayuaa iza, dede dxi gútibe. ¡Rihuinni dxíchica nabé naroʼbaʼ sacrificiu biʼniʼ Abrahán ne Sara! (Gén. 11:31; Hech. 7: 2, 3).

 Galán guinabadiidxanu laca laanu pa riníʼ íquenu cásica laacabe. Cadi guiaandaʼ ndiʼ laanu: guiráʼ cani runi stipa pur guzuubaʼ diidxaʼ lu ca últimu dxi riʼ cayuni cumplircaʼ né ni gunabaʼ Jesús gúninu. Laabe biʼniʼ mandarbe laanu: «Laché ra nuu binni de guiráʼ guidxi, lagusiidiʼ laacaʼ gácacaʼ discípulo, lacuunisa laacaʼ lu lá Bixhozeʼ ne lu lá Xiiñiʼ ne lu lá espíritu santu» (Mat. 28:19TNM).

Ora guníʼ Jesús «laché», cayábibe laanu naquiiñeʼ gácanu binni runi dxiiñaʼ. ¡Riéchedu stale ora ridúʼyadu pabiáʼ galán modo biʼniʼ guiráʼ ca xpinni Cristu dxiiñaʼ iza gudiʼdiʼ ca! Rihuinni dxíchica caguu Jiobá ndaayaʼ dxiiñaʼ ni rúninu ora runi predicarnu ca noticia galán stiʼ Reinu lu guidubi Guidxilayú ne laaca pur poder stibe nga cayaca dxiiñaʼ riʼ (Mar. 13:10).

Stale binni maʼ cucaadiaga ne maʼ cayuni cré stiidxaʼ Reinu. Udubiza guyuu 8,340,847 publicador ne biʼniʼ estudiarnecaʼ biaʼ 10,115,264 binni cada beeu. Rihuinni dxíchica qué ribezadxí carru stiʼ Jiobá ni nuu guibáʼ, ¡laatu laaca cadi cabezadxitu! Nga runi, cadi gusaana de gúnitu dxiiñaʼ risaca riʼ laga caʼruʼ guseeguʼ Jiobá puertaʼ para guiuu binni ti ganda guilá.

¡Nabé galán ni rusietenalaʼdxiʼ textu stiʼ iza 2017 laanu! Sicaríʼ ná ni: «Gupa confianza Jiobá ne biʼniʼ ni jneza» (Sal. 37: 3). Pa gúninu ni ná ca diidxaʼ riʼ ne guni adorarnu Jiobá jneza la? zusihuínninu nápanu confianza laabe. Cadi guiaandaʼ laanu qué zusaana Jesús laanu. Laapebe bíʼnibe promesa riʼ: «Ganna ca tu qué ziuu dxi ixele de laatu dede dxi iluxe guidxilayú» (Mat. 28:20). Nánnanu zuni cumplirbe promesa stibe, ¿cadi dxandíʼ la?

Guietenaláʼdxinu qué zusaana de uguu Jiobá ndaayaʼ laanu, purtiʼ jneza modo runi adorarnu laa. Pa rúninu stale, o pa rúninu huaxiéʼ, ni jma risaca para Jiobá nga gúninu biaʼ gándatiʼ ne gúninu ni de guidubi ladxidoʼno. Pa gúninu zacá, ziuuláʼdxibe ni gúninu ne zusiéchenu ladxidoʼbe (2 Cor. 9: 6, 7). Nga runi, cadi gusaana de guni orarnu Bixhózenu, guni estudiarnu Stiidxabe ne guni predicarnu né stale guendanayecheʼ. Pa gúninu ca ndiʼ la? ziuʼnu gaxha de laabe ne jma zaca xhamígunu laabe.

Nanna Binidxabaʼ «ma huaxiéʼ dxi napa», nga runi guizáʼ racalaʼdxiʼ cuee gana laanu ti gusaana de guzúʼbanu stiidxaʼ Jiobá (Apoc. 12:12). Qué iquiiñeʼ Binidxabaʼ ne laga cayándaruʼ, zuni guiráʼ ni nuu lu náʼ para cueechú laanu de lu neza ra racalaʼdxiʼ Jiobá chuunu. Peru pa nuunu gaxha de Jiobá la? qué zanda cueechú Binidxabaʼ laanu (Sal. 16: 8). Cadi guiaandaʼ laatu nabé nadxiidu laatu, ne rudiʼdu xquíxepeʼ laatu pur guiráʼ ni cayúnitu para gacanetu laadu guidale ca cosa risaca napa Reinu lu ca últimu dxi riʼ.

Ca hermanu stitu,

Grupu ni Zaniruʼ stiʼ ca Testigu stiʼ Jiobá