Biiyaʼ guiraʼ ni nuu lu sitiu riʼ

guyé lu índice

 MODO RÚNINU XHIIÑAʼ DIOS

Ximodo zanda guiroobaʼ guendarannaxhii ni nápanu Dios ne binni

Ximodo zanda guiroobaʼ guendarannaxhii ni nápanu Dios ne binni

Ca xpinni Cristu de yanna maʼ qué rinándanu Ley ni gucuaa Moisés, peru chupa de ca mandamientu jma risaca rinándanu dede nagasi nga gannaxhiinu Dios ne binni purtiʼ nga nga ni ribeza Jiobá guni ca xpinni (Mt 22:37-39). Peru qué zanda diʼ guiroobaʼ guendarannaxhii riʼ stubi si. Caquiiñeʼ gusiróʼbanu ni. ¿Ximodo yaʼ? Ti modo zanda gúninu ni nga gúʼndanu Biblia guiráʼ dxi. Ora guni meditarnu o guiníʼ ique chaahuinu ni cayúʼndanu zanda guidúʼyanu ca cualidad napa Jiobá, ximodo laabe ne pabiáʼ nacháʼhuibe (Sl 27:4). Pa gúninu zacá, zannaxhiinu Jiobá ne zazíʼdinu guiníʼ íquenu casi laabe. Ne zacané ni laanu gúninu ni ná ca mandamientu stibe, gusihuínninu dxandíʼ nadxiinu binni sin cuézanu gudiicaʼ laanu xiixa (Jn 13:34, 35; 1Jn 5:3). Guidúʼyanu chonna modo ni zanda gacané laanu para chuuláʼdxinu gúʼndanu Biblia.

  • Iquiiñenu imaginación ne gaayuʼ sentidu nápanu. Ora maʼ cayúʼndanu guni imaginarnu casi ñaca nuunu racá. Guxuíʼlunu guiráʼ ni cayaca, ni cayunadiáganu ne ni cayuuxiinu. Guiníʼ íquenu xi biʼniʼ sentir ca binni ni riete lu xiixa relatu.

  • Guchaʼnu modo rúninu ni. Zanda gúʼndanu ni o gucaʼdiáganu grabación stini laga cayúʼndanu ni. Sti modo nga gúʼndanu de tuuxa binni riete lu Biblia o de ti tema lugar de gúʼndanu guidubi naca Biblia. Guzéʼtenu ti ejemplu, ora gúʼndanu de Jesús zanda iquiiñenu ndaa 4 ne 16 stiʼ folletu Ni zacané lii guiéneluʼ Stiidxaʼ Dios. Sti modo zanda gúninu nga gúʼndanu guidubi capítulo ra biree textu ni biaba dxi ca o gúʼndanu ca libru ni zeeda lu Biblia modo gucuá cani.

  • Gúʼndanu para guiénenu. Jma galán nga gúʼndanu, guiénenu ne guni meditarnu neca lu ti capítulo ti dxi qué gúʼndanu stale capítulo para si guiuba guilúxenu Biblia. Guiníʼ íquenu lu contextu de ni cayúʼndanu, guʼyaʼ chaahuinu ca detalle stini, iquiiñenu ca mapa ne ca referencia marginal napa Biblia. Guyúbinu información de xiixa cosa ni cadi cayénenu. Pa ganda la? biaʼ tiempu gúʼndanu biáʼcaca naquiiñeʼ guiníʼ íquenu.