Biiyaʼ guiraʼ ni nuu lu sitiu riʼ

Modo gaca reunión Xhiiñaʼ Dios ne modo nabáninu

Modo gaca reunión Xhiiñaʼ Dios ne modo nabáninu

Índice

 

Párrafo

Ca diidxaʼ guzuluné ni

 2

Ca tesoro zeeda lu Biblia

 3

Gusíʼdinu jma jneza

 4

Modo rúninu xhiiñaʼ Dios

 5

Ca diidxaʼ guiluxené ni

 6

Gusíʼdinu ne guidúʼndanu jma jneza

 7

Ora gudiʼnu conseju

 8

Tiempu

 9

Visita stiʼ superintendente de circuito

 10

Semana nuu asamblea

 11

Semana nuu Conmemoración

 12

Superintendente stiʼ reunión Xhiiñaʼ Dios ne modo nabáninu

 13

Presidente stiʼ reunión Xhiiñaʼ Dios ne modo nabáninu

 14

Coordinador stiʼ cuerpu de ancianu

 15

Consejeru auxiliar

 16

Clase auxiliar

 17

Videu

 18

1. Para gaca reunión Xhiiñaʼ Dios ne modo nabáninu zaquiiñeʼ Ni chigaca lu reunión Xhiiñaʼ Dios ne modo nabáninu ne ca instrucción zeeda raríʼ. Naquiiñeʼ gaca animar guiráʼ ca publicador para gutiidicaʼ asignación estudiantil lu reunión riʼ. Ca binni ni maʼ qué riaadxaʼ ca reunión stinu la? zanda guni participarcaʼ pa maʼ ricaacaʼ guiráʼ ni rusiidiʼ Biblia ne pa maʼ nabánicaʼ modo ná ca principiu ni naquiiñeʼ chinanda ca xpinni Cristu (be-S 282).

 2. Ca diidxaʼ guzuluné ni (2 o 3 minutu). Despué de guiuundaʼ canción ne gaca ti oración, presidente stiʼ reunión Xhiiñaʼ Dios ne modo nabáninu zuzeeteʼ chupa chonna puntu ni zeeda lu programa stini para gucuaaniʼ interés stiʼ auditorio, ne laaca zuzeetebe pregunta ni zeeda lu Respuesta stiʼ ca pregunta para reunión Xhiiñaʼ Dios ne modo nabáninu.

 3. Ca tesoro zeeda lu Biblia

  • Discursu (10 minutu). Lu Ni chigaca lu reunión zeeda título stini ne laaca zeeda chupa o chonna puntu principal. Ti ancianu o ti siervu ministerial capacitadu nga gudii discursu riʼ. Cada biaje guzulú guiuundaʼ ti libru stiʼ Biblia, zadiʼdiʼ ti videu ni gusiene de laani. Hermanu gudii discursu riʼ zanda guzeeteʼ xiixa ni bihuinni lu videu riʼ para gusiene tema stiʼ discursu ca, peru naquiiñeʼ gusiene ca puntu ni zeeda lu Ni chigaca lu reunión. Ne pa gudii tiempu la? zanda iquiiñebe ca dibuju ne xcaadxi puntu ni biree lu Biblia para gusaabe información ni chiguni presentarbe.

  • Guyúbinu ca perla ni gaʼchiʼ (8 minutu). Naquiiñeʼ tiidiʼ asignación riʼ pur pregunta ne respuesta. Ti ancianu o ti siervu ministerial capacitadu nga gutiidiʼ asignación riʼ.  Naquiiñeʼ guni hermanu riʼ guiráʼ pregunta stini, ne maʼ laa guʼyaʼ pabiáʼ tiempu iquiiñeʼ para cada tobi de laani según necesidad stiʼ congregación. Maʼ hermanu riʼ guʼyaʼ pa ziuundaʼ guiráʼ versículo stiʼ guiropaʼ pregunta zeeda ra ruzulú ni o pa coʼ. Naquiiñeʼ guindaa ca comentariu stiʼ ca hermanu 30 segundu o menu.

  • Ra guiuundaʼ Biblia (3 o 4 minutu). Asignación estudiantil riʼ naquiiñeʼ gutiidiʼ ti hermanu ni. Zuundabe ca versículo nexheʼ guiuundaʼ para semana ca, peru qué zaniʼbe gastiʼ ora guzulube nin ora guilúxebe. Jma naquiiñeʼ gucaa ique presidente stiʼ reunión riʼ gacané estudiante riʼ para ganda guiénecabe ni cayuundaʼ, guʼndaʼ jneza, cadi gucá ruaa ora maʼ cayuundaʼ, guni ni né naturalidad, ganna pora gudxiibaʼ lu ridxi stiʼ ne pora guindeteʼ ni, ganna paraa naquiiñeʼ guni pausa ne paraa nuu ca diidxaʼ ni naquiiñeʼ guʼndaʼ né énfasis.

  4. Gusíʼdinu jma jneza (15 minutu o menu). Guca sección riʼ para guni practicarnu ne para guni mejorarnu modo runi predicarnu ne modo rusíʼdinu. Asignación ni láʼ primé biaje guinínenu binni ne ca revisita ca naquiiñeʼ gaca basar ni lu sección ni láʼ «Modo guinínenu binni» ni zeeda lu primé yaza stiʼ Ni chigaca lu reunión. Ca publicador ca gúʼyacaʼ pa zuni presentarcaʼ ti publicación o guluiʼcaʼ ti videu ni zeeda lu caja ra dxaʼ herramienta ni riquiiñenu para gusíʼdinu binni (kit de enseñanza). Lu Ni chigaca lu reunión zeeda pabiáʼ naquiiñeʼ guindaa cada asignación estudiantil ne ziuu biaje zeeda xiixa instrucción adicional. Cadi caquiiñeʼ diʼ uguu ca estudiante jma información para si gusaacaʼ biaʼ tiempu naquiiñeʼ tiidicaʼ. Pa gaca preparar ti demostración jneza la? zanda guiluxe ni ti minutu o chupa minutu ante. Ne pa caquiiñeʼ la? laaca zanda guicaa ca ancianu ca xiixa asignación estudiantil.

  • Videu modelo para guinínenu binni. Zaca presentar ne zaca analizar né auditorio ca videu riʼ lu chonna semana seguidu. Guiráʼ beeu zadúʼyanu ti videu stiʼ primé biaje guinínenu binni, primé revisita ne guiropa revisita. Presidente stiʼ reunión Xhiiñaʼ Dios ne modo nabáninu nga naquiiñeʼ gutiidiʼ asignación riʼ.

  • Primé biaje guinínenu binni. Zanda gutiidiʼ ti hermanu o ti hermana asignación riʼ. Pa gudii ti hermana ni la? napa xidé tiidiné sti hermana o tobi de ca familia stiʼ. Zanda cuícabe o guzuhuaacabe. Ora guzulú estudiante riʼ, zugapadiuxi cásica runi ora maʼ ziguni predicar lu territorio stiʼ. Naquiiñeʼ gaca basar presentación riʼ lu sección ni láʼ «Modo guinínenu binni».

  • Primé revisita. Zanda gutiidiʼ ti hermanu o ti hermana asignación riʼ. Pa gutiidiʼ ti hermanu ni la? napa xidé tiidiné sti hermanu, qué zanda diʼ tiidiné ti gunaa (km-S 5/97 2). Zanda cuícabe o guzuhuaacabe. Napa xidé gusihuinni estudiante riʼ xi guininu ora chigánnanu tuuxa ni bisihuinni interés primé biaje gunínenu laa. Naquiiñeʼ gaca basar presentación riʼ lu sección ni láʼ «Modo guinínenu binni».

  • Guiropa revisita. Zanda gutiidiʼ ti hermanu o ti hermana ni. Pa gutiidiʼ ti hermanu ni la? napa xidé tiidiné sti hermanu, qué zanda diʼ tiidiné ti gunaa (km-S 5/97 2). Zanda cuícabe o guzuhuaacabe. Napa xidé gusihuinni estudiante riʼ xi guininu ora chigánnanu tuuxa ni bisihuinni interés lu primé revisita. Naquiiñeʼ gaca basar presentación riʼ lu sección ni láʼ «Modo guinínenu binni».

  • Estudiu. Zanda gutiidiʼ ti hermanu o ti hermana ni. Pa gutiidiʼ ti hermanu ni la? napa xidé tiidiné sti hermanu, qué zanda diʼ tiidiné ti gunaa (km-S 5/97 2). Zanda cuícabe o guzuhuaacabe. Lu asignación riʼ zahuinni ti partehuiiniʼ stiʼ ti estudiu ni maʼ bizulú. Cadi caquiiñeʼ diʼ guiniʼbe xiixa para guzulube ne para guilúxebe, peru zúnibe ni pa  cayúnibe dxiiñaʼ lu xiixa aspectu de introducción o conclusión. Laaca cadi caquiiñepeʼ guiuundaʼ guiráʼ información stini en voz alta, peru zanda gaca ni. Naquiiñeʼ gusihuinni estudiante ca ximodo gusíʼdinu jma jneza.

  • Discursu. Ti hermanu nga naquiiñeʼ gutiidiʼ asignación riʼ ne naquiiñeʼ tiidiʼ ni casi ti discursu.

  5. Modo rúninu xhiiñaʼ Dios. Zuzulú sección riʼ né ti canción. Lu ca primé 15 minutu ca zándaca zadiʼdiʼ tobi o chupa sección ra zusiidicabe laanu ximodo gúninu ni ná Stiidxaʼ Dios lu xpídanu. Pa cadi zeeda xiixa instrucción gadxé la? siempre zutiidiʼ ti ancianu o ti siervu ministerial capacitadu ni. Ca ancianu si nga naquiiñeʼ gaca asignar para gutiidicaʼ ni caquiiñeʼ congregación.

  • Reunión ra riuundaʼ Biblia (30 minutu). Naquiiñeʼ gutiidiʼ ti ancianu capacitadu ni. (Pa huaxiéʼ ancianu nuu ndaaniʼ ti congregación la? zanda iquiiñeʼ ca siervu ministerial capacitadu). Cuerpu de ancianu nga guʼyaʼ tuu nga ca hermanu nuu capacitadu para gutiidiʼ asignación riʼ. Ca hermanu ni gaca aprobar, cadi naquiiñeʼ tiidicaʼ de tiempu, gusiénecaʼ ca textu clave ne gacanecaʼ ca ni cucaadiaga guidxélacaʼ modo gúnicaʼ ni biziidicaʼ. Zadxélatu conseju ni zanda iquiiñetu lu ca información ni cusiene ximodo gaca conducir Estudiu stiʼ Torre stiʼ ni rapa. Pa ganda la? cada semana naquiiñeʼ tiidiʼ gadxé gadxé hermanu para guni conducir ne para guʼndaʼ. Ora guinabaʼ presidente stiʼ reunión conductor riʼ cuee tiempu lu asignación riʼ la? maʼ conductor riʼ nga guʼyaʼ ximodo guni ni. Ti modo zanda gúnibe ni nga cadi guiuundaʼ chupa chonna párrafo.

  6. Ca diidxaʼ guiluxené ni (2 o 3 minutu). Zuni presidente stiʼ reunión riʼ ti repasu stiʼ ca idea jma risaca ni biete lu reunión ne laaca zuzeetebe pregunta ne respuesta ni zeeda lu Respuesta stiʼ ca pregunta para reunión Xhiiñaʼ Dios ne modo nabáninu ni bicabi semana ca. Laaca zucuaanibe interés stiʼ ca hermanu para reunión de sti semana ni zeeda ca, zándaca ra guzeetebe pregunta ni zacábinu para semana ni zeeda ca. Pa gudii tiempu la? zanda guzeetebe lá ca estudiante ni chigutiidiʼ discursu sti semana zeeda ca. Pa cadi zeeda xiixa instrucción gadxé la? zudii presidente riʼ xiixa anunciu o zuundaʼ xiixa carta lu repasu stiʼ reunión riʼ. Ca actividad stiʼ congregación, casi ca horariu de predicación ne ca grupu ni raca caber guni limpieza, maʼ qué zaníʼcabe ni dede lu plataforma, sínuque zacá ni lu tableru. Pa qué gudii tiempu para gaca anunciu ne para guiuundaʼ xiixa carta la? zanabaʼ presidente stiʼ reunión riʼ ca hermanu ni napa asignación lu sección «Modo rúninu xhiiñaʼ Dios» cueecaʼ tiempu lu discursu sticaʼ (biiyaʼ  párrafo 5 ne  9). Ziuundaʼ ti canción ne zaca ti oración para guiluxe reunión riʼ.

 7. Gusíʼdinu ne guidúʼndanu jma jneza. Ra guiuʼnu semana 7 de enero de 2019, presidente stiʼ reunión Xhiiñaʼ Dios ne modo nabáninu zaquiiñeʼ folletu Gusíʼdinu ne guidúʼndanu para gudii conseju ne guni animar ca estudiante. Naquiiñeʼ chinanda cada estudiante lección ni zeeda ndaaniʼ paréntesis, ni cá cueʼ asignación sticaʼ ni zeeda lu Ni chigaca lu reunión. Lu primé semana stiʼ cada beeu, zuni analizar presidente stiʼ reunión né auditorio ti lección stiʼ folletu Gusíʼdinu ne guidúʼndanu. Napa folletu riʼ ti sección ni láʼ «Pabiáʼ ziyuneʼ progresar», guca ni para si ca estudiante. Cadi naquiiñeʼ diʼ gucaa presidente ca xiixa nota luni.

  8. Ora gudiʼnu conseju. Tiidiʼ si cada tobi de ca asignación estudiantil, zaquiiñeʼ presidente stiʼ reunión riʼ biaʼ ti minutu para guni felicitar cada estudiante ne zudii laabe conseju ni zeeda lu folletu Gusíʼdinu ne guidúʼndanu. Ora guiníʼ presidente riʼ maʼ chitiidiʼ ti asignación la? cadi naquiiñeʼ guiníʼ xi lección zinanda estudiante ca. Guiluxe si estudiante riʼ, zuni felicitar presidente ca laabe, de racá maʼ zanda guzeeteʼ xi lección yenándabe ne zaníʼ xiñee biaʼsi modo gudíʼdibe o zuyubi  modo gabi laabe para naquiiñeʼ guni mejorarbe. Laaca zanda guzeeteʼ presidente riʼ xiixa ni biʼyaʼ lu demostración ca, ni rabi zanda gacané estudiante ca o auditorio. Guiluxe si reunión o sti ora la? zanda gudii presidente riʼ xiixa conseju ni zanda gacané estudiante ca, ne gaca basar ni lu folletu Gusíʼdinu ne guidúʼndanu o lu libru Benefíciese. Zanda gudiibe conseju estudiante ca de lección ni yenanda o de sti lección, peru gaca ni privadu. (Biiyaʼ  párrafo 13 ne  16 para gánnaluʼ gunáʼ nga ca dxiiñaʼ napa superintendente stiʼ reunión Xhiiñaʼ Dios ne modo nabáninu ne xi dxiiñaʼ napa consejeru auxiliar).

    9. Tiempu. Nin ti asignación, (dede né ni guiníʼ presidente) cadi naquiiñeʼ tiidiʼ ni de tiempu maʼ nexheʼ para laani. Pa maʼ gudiʼdiʼ ca estudiante ca de tiempu la? zuyubi presidente ca modo gudiibe cuenta maʼ gudíʼdibe de tiempu, peru sin gudii guiráʼ cuenta. Pa tiidiʼ xcaadxi hermanu de tiempu lu asignación ni raca caber laacaʼ la? zaniʼné consejeru auxiliar laacaʼ, peru gaca ni privadu. Guidubi naca programa riʼ zandaa ni 1 hora ne 45 minutu, maca né canción ne oración.

 10. Visita stiʼ superintendente de circuito. Ora chuʼ visita stiʼ superintendente de circuito, zinándanu programa stiʼ Ni chigaca lu reunión, xi si la? zadxaa chupa chonna cosa. Maʼ qué zaca diʼ Reunión ra riuundaʼ Biblia, lugar stini zudii superintendente de circuito riʼ ti discursu de 30 minutu. Ante tiidiʼ discursu riʼ, zuni presidente stiʼ reunión riʼ ti repasu stiʼ programa riʼ, zuzeeteʼ xiixa puntu ni zadúʼyanu sti semana ca, zuzeetebe ca anunciu ni caquiiñeʼ ne zuundabe ca carta si ni jma caquiiñeʼ, de racá maʼ zuni presentarbe superintendente de circuito. Guiluxe si superintendente de circuito ca discursu stiʼ, zunduuxeʼ reunión riʼ né ti canción ni maca gulí. Qué ziuu diʼ clase auxiliar lu idioma stiʼ congregación ora chuʼ visita. Ca grupu ni riníʼ ti diidxaʼ extranjeru zanda gúnicaʼ reunión sticaʼ neca napa congregación anfitriona sticaʼ visita. Peru naquiiñeʼ gucaadiágacaʼ discursu de serviciu ni chigudii superintendente de circuito para congregación.

 11. Semana nuu asamblea. Qué zapa diʼ congregación nin ti reunión semana chigaca ti asamblea. Cada familia o cada hermanu nga guni estudiar información ni chiguiuunda semana ca.

 12. Semana nuu Conmemoración. Ora guiaba Conmemoración ndaaniʼ semana, qué zaca diʼ reunión Xhiiñaʼ Dios ne modo nabáninu. Peru ziuu predicación dxi chigaca Conmemoración.

  13. Superintendente stiʼ reunión Xhiiñaʼ Dios ne modo nabáninu. Cuerpu de ancianu nga cuiʼ ti ancianu para gaca superintendente. Dxiiñaʼ stibe nga gúʼyabe gaca reunión riʼ jneza ne gaca ni casi ná ca instrucción zeeda raríʼ. Gatigá naquiiñeʼ guiníʼnebe consejeru auxiliar. Cásipeʼ guʼyaʼ superintendente riʼ maʼ nuu ti Ni chigaca lu reunión la? naquiiñeʼ guni asignar ca estudiante ni chigudii ca presentación estudiantil para beeu ca (biiyaʼ  párrafo 4). Naquiiñeʼ gaca imprimir ca asignación estudiantil riʼ lu formulariu Asignación para reunión Xhiiñaʼ Dios ne modo nabáninu (S-89) ne naquiiñeʼ gaca entregar ni biaʼ chonna semana ante.

 14. Presidente stiʼ reunión Xhiiñaʼ Dios ne modo nabáninu. Cada semana ziuu ti ancianu ni gaca presidente stiʼ guidubi reunión Xhiiñaʼ Dios. (Ndaaniʼ ca congregación ra huaxiéʼ ancianu la? zanda iquiiñeʼ ca siervu ministerial capacitadu). Naquiiñeʼ quixheʼ chaahuiʼ presidente riʼ xi guiníʼ lu introducción ne conclusión stiʼ reunión riʼ, guni analizar ca videu modelo para guinínenu binni ne ca videu ra gaca analizar ti lección stiʼ folletu Gusíʼdinu ne guidúʼndanu. Naquiiñeʼ guni introducirbe guiráʼ asignación, ne pa huaxiéʼ ancianu la? naquiiñeʼ gaca encargarbe de xiixa asignación. Cadi naquiiñeʼ guiniʼbe stale diidxaʼ ora maʼ biluxe ti asignación ne ante guzulú  stobi. Cuerpu de ancianu nga guiníʼ tuu nga de ca ancianu nuu capacitadu para gaca asignar para dxiiñaʼ riʼ. Naquiiñeʼ gaca turnar ca hermanu ni gaca nombrar. Según modo nuu cada congregación la? stale biaje superintendente stiʼ reunión riʼ nga hermanu ni jma stale biaje guni presidir que xcaadxi ancianu. Stale biaje, pa runi calificar ti ancianu para gutiidiʼ Reunión ra riuundaʼ Biblia ndaaniʼ congregación, zándaca laaca runi calificarbe para gácabe presidente stiʼ reunión riʼ. Peru cadi guiaandaʼ laatu, hermanu guni presidir reunión riʼ naquiiñeʼ ganna guni felicitar cada estudiante ne gudii conseju né diidxaʼ nadóʼ. Laaca naquiiñeʼ gúʼyabe guiluxe reunión riʼ ora stini (laguuyaʼ  párrafo 6 ne  9). Pa nuu lugar lugar lu plataforma ne pa guinabaʼ presidente riʼ ni la? zanda guzuhuaa ti micrófono lu plataforma ni iquiiñebe para guni presentarbe ca estudiante laga cuzuhuaa chaahuicaʼ ra nuu atril. Laaca zanda gúnitu sti cosa para cadi guiniti stale tiempu, zanda cuíʼ presidente riʼ ruaa ti mexaʼ lu plataforma ora tiidiʼ asignación ra guiuundaʼ Biblia ne sección ni láʼ «Gusíʼdinu jma jneza».

 15. Coordinador stiʼ cuerpu de ancianu. Coordinador stiʼ cuerpu de ancianu riʼ nga guni asignar tu chigudii ca asignación stiʼ reunión riʼ, peru cadi laabe nga guni asignarbe ca discursu estudiantil. Laabe nga guni asignarbe ti ancianu, ni nuu nombradu pur cuerpu de ancianu, para guni presidir reunión. Zuni coordinador riʼ dxiiñaʼ tobi si né superintendente stiʼ reunión Xhiiñaʼ Dios ne modo nabáninu, ne zaca asegurar guicá guidubi programa stini lu tableru de anunciu.

  16. Consejeru auxiliar. Pa ganda la? galán iquiiñetu ti ancianu ni maʼ napa experiencia. Ora caquiiñeʼ gúnibe ni la? zudiibe conseju ca ancianu ne ca siervu ministerial ni ridiʼdiʼ lu reunión Xhiiñaʼ Dios ne modo nabáninu, ca ni rudii discursu públicu, ca ni runi dirigir Estudiu stiʼ revista Torre stiʼ ni rapa, o Reunión ra riuundaʼ Biblia, ca ni ruundaʼ (Biiyaʼ  párrafo 9). Pa nuu stale ancianu ni rudii discursu galán ne nanna gusiidiʼ la? zanda gaca nombrar ti consejeru auxiliar cada iza. Cadi naquiiñeʼ diʼ gudiibe conseju ca hermanu riʼ guiráʼ biaje gudiicaʼ ti discursu.

 17. Clase auxiliar. Zanda gapa ca congregación clase auxiliar pa nuu stale estudiante. Zapa cada clase ca ti consejeru capacitadu, pa ganda ti ancianu. Pa caquiiñepeʼ la? zanda gaca asignar ti siervu ministerial capacitadu. Cuerpu de ancianu nga guiníʼ tuu nga ca ni zanda guni dxiiñaʼ riʼ ne pa zaca turnarcaʼ. Naquiiñeʼ chinanda consejeru riʼ ca instrucción zeeda lu  párrafo 8. Zanábacabe ca estudiante riʼ checaʼ ndaaniʼ ca sala auxiliar ora maʼ biluxe asignación ni ni láʼ «Guyúbinu ca perla ni gaʼchiʼ», ni zeeda lu sección «Ca tesoro zeeda lu Biblia». Zabiguétacabe ndaaniʼ sala principal ora guiluxe sección «Gusíʼdinu jma jneza». Pa zanda la? ora gaca analizar ti videu, guiráʼ ca ni nuu ndaaniʼ sala auxiliar ca gúʼyacabe videu ca dede racá ne gucaadiágacabe ora gaca analizar ni. Peru pa gastiʼ modo gúʼyacabe ni ndaaniʼ sala ca la? zanda chiné consejeru ca ti dispositivu electrónicu para gutiidiʼ videu ca, ne laa guni analizarné ni laacabe.

 18. Videu. Zadiʼdiʼ caadxi videu lu reunión ni raca ndaaniʼ semana, zanda gúʼyatu ca videu riʼ lu aplicación JW Library ni guca para gadxé gadxé clase dispositivu electrónicu. Caadxi de ca videu riʼ, casi ca videu modelo para guinínenu binni, zanda iquiiñetu ni lu ca reunión ni raca ante chiguni predicarnu, despué de guidúʼyanu ni lu reunión Xhiiñaʼ Dios ne modo nabáninu.