Tito 3:1-15

  • Ca ni naquiiñeʼ guzuubaʼ binni stiidxaʼ (1-3)

  • Lachuu listu para gúnitu dxiiñaʼ jneza (4-8)

  • Guixélenu de ca ni ridinde diidxaʼ ne de ca ni rindisaʼ secta (9-11)

  • Ca instrucción bidii Pablo Tito ne ra guca despedir (12-15)

3  Bisietenalaʼdxiʼ laacabe chinándacabe ni ná* ca gobiernu ne ca xaíque guidxi ne guzuubacabe stiidxacaʼ, ne chúʼcabe listu para gúnicabe guiráʼ dxiiñaʼ ni jneza,  cadi guiníʼcabe mal de tuuxa, cadi tíndecabe, sínuque gácacabe binni riuu razón ne gácacabe nadóʼ né guiráʼ binni.  Purtiʼ laaca gúcanu binni nahuati dxiqué ne qué nuzúʼbanu stiidxaʼ Dios, qué nibáninu jneza, gúcanu esclavu stiʼ ca deseu stinu ne jma gucuá íquenu gúninu ni riuuláʼdxinu, bíninu cosa malu ne gúpanu envidia, bibixhilaʼdxiʼ binni laanu ne guca nanaláʼdxisaanu.  Peru Dios, ni bilá laanu,* bisihuinni guendanachaʼhuiʼ stiʼ ne pabiáʼ nadxii binni.  Bilá Dios laanu (cadi purtiʼ bíninu xiixa cosa jneza, sínuque purtiʼ biá* laanu) ora bisiá laanu, ne pur nga bidii laanu guendanabani, ne biquiiñeʼ espíritu santu stiʼ para guni laanu nacubi.  Bidii Dios stale espíritu santu laanu* pur ni biʼniʼ Jesucristu, ni bilá laanu,*  ti gúʼyabe laanu casi binni ni runi ni jneza* pur guendanachaʼhuiʼ stibe,* ne yanna maʼ cabézanu guicaanu guendanabani ni qué zaluxe.  Dxandíʼ guiráʼ ni cayabeʼ lii riʼ, ne racalaʼdxeʼ gusiidiluʼ ni laacabe guiráʼ ora, ti gucaa ique ca ni maʼ biʼniʼ cré Dios gúnicaʼ cosa galán. Jneza ca cosa riʼ ne racanécani binni.  Peru cadi chuʼluʼ ora maʼ cadíndecabe pur xiixa guendahuati, nin ora maʼ cadíndecabe pur historia stiʼ ca binni bibani dxiqué,* ne cadi chuʼluʼ ora maʼ cadíndecabe pur Ley, nin ora maʼ cadinde diidxacabe pur laani, purtiʼ guendahuati si ni ne qué racaneni. 10  Peru pa chuʼ ti hombre ni guindisaʼ ti secta,* bixeleʼ de laabe pa maʼ bidiiluʼ conseju laabe ti biaje o chupa biaje, 11  purtiʼ né ni cayúnibe ca la? nannuʼ maʼ bireechube de ni runi crebe ne maʼ cucheebe, ne laca laabe nga cudxiibabe donda íquebe. 12  Ne ora guseendaʼ Ártemas o Tíquico ra nuuluʼ, biʼniʼ stipa cheluʼ ra nuaaʼ ndaaniʼ guidxi Nicópolis, purtiʼ racá cá iqueʼ tideʼ tiempu nanda.* 13  Bidii guiráʼ ni iquiiñeʼ Zenas —ti hombre ni nanna stale de Ley— ne Apolos ti cadi guiaadxaʼ gastiʼ laacaʼ para viaje ni chigúnicaʼ. 14  Peru laaca naquiiñeʼ guiziidiʼ ca hermanu stinu napa xidé gacanecaʼ ora málasi iquiiñeʼ stobi xiixa, ti ganda iquiiñecaʼ xquendanabánicaʼ jneza. 15  Guiráʼ ca ni nuu ra nuaaʼ cuseendacaʼ diuxi stiluʼ. Bidii diuxi stinneʼ ca ni nadxii laanu, ca ni napa fe cásica nápanu. Gaca Dios nachaʼhuiʼ né guiráʼ xixetu.*

Nota

O «Gudxi laacabe gaca sujertárcabe».
O «Salvador stinu».
O «gupa misericordia».
Lit. «Bindaate Dios stale espíritu santu luguianu».
O «Salvador stinu».
O «ne zacá guiniʼbe nácanu binni justo».
O «bondad inmerecida stibe». Biiyaʼ Glosario, bondad inmerecida.
O «ca genealogía».
Biiyaʼ Glosario.
O «invierno».
O «Gapa Dios bondad inmerecida guiráʼ xixetu». Biiyaʼ Glosario, bondad inmerecida.