Romanos 2:1-29

  • Zuni juzgar Dios ca judíu ne ca griegu (1-16)

    • Modo runi conciencia dxiiñaʼ (14, 15)

  • Ca judíu ne Ley (17-24)

  • Marca de circuncisión lu corazón (25-29)

2  Yanna lii, ni runi juzgar, tutiica nácaluʼ, qué zanda diʼ gaca defenderluʼ. Purtiʼ ora guni juzgarluʼ stobi cayuni condenarluʼ laca lii purtiʼ runi juzgarluʼ laabe peru ngueca rúniluʼ.  Nánnanu runi juzgar Dios según ni dxandíʼ ne runi condenar ca ni runi ca cosa riʼ.  Yanna lii, ni runi juzgar ca binni ni cayuni ca cosa ni rúniluʼ, ¿raʼbuʼ zanda guilaluʼ de juiciu stiʼ Dios la?  Purtiʼ si ruuyaluʼ pabiáʼ nachaʼhuiʼ Dios, rucueeza laa ne napa paciencia, ¿ñee cadi cudiiluʼ cuenta pa tantu nachaʼhuiʼ Dios nga nuu gacané lii gaca arrepentirluʼ la?  Peru cumu nabé tercu lii ne naguidxi ladxidoʼloʼ la? cutáleluʼ stóndaluʼ para dxi guni juzgar Dios binni. Ne zusihuinni Dios xiana stiʼ dxi guni juzgar binni ne zuni ni jneza.  Ne zaguíxebe cada tobi pur ni guni:  zudiibe guendanabani ni qué zaluxe ca ni cuyubi gloria, ne guisaca ne cuyubi ti cuerpu ni qué zanitilú* pur cayuni huantar ra cayuni ni jneza;  peru ziaba xiana stiʼ Dios luguiáʼ ca ni riuulaʼdxiʼ gutinde* binni ne qué rinándacaʼ ni dxandíʼ, sínuque rinándacaʼ ni cadi jneza.  Ziuu guendanagana* ne yuubaʼ para cada binni* ni guni cosa malu, primé ziuu ni luguiáʼ ca judíu ne zaqueca luguiáʼ ca griegu. 10  Peru ca judíu ni guni ni jneza la? zacaacaʼ gloria, zasácacaʼ ne zatadxí ladxidoʼcaʼ,* ne ngaca guicaa ca griegu ni guni ni jneza. 11  Purtiʼ biaʼca risaca guiráʼ binni nezalú Dios. 12  Purtiʼ guiráʼ ca ni guni pecar sin ganna xi ná ley la? záticaʼ sin ley, peru guiráʼ ca ni guni pecar neca nanna xi ná ley la? zaca juzgarcaʼ pur ley. 13  Cadi purtiʼ si rucaadiaga tuuxa ni ná ley maʼ naca nachaʼhuiʼ* nezalú Dios, sínuque ca ni guni ni ná ley nga ca ni gunibiáʼcabe casi binni nachaʼhuiʼ. 14  Laguuyaʼ ca binni de xcaadxi guidxi.* Neca qué gápacaʼ ley, peru de laasicaʼ riale gúnicaʼ ni ná ley, laani nga zeeda gaca ni ley para laacaʼ, neca qué gápacaʼ ley. 15  Pur ni rúnicaʼ rusihuínnicaʼ maʼ nápacaʼ ley ndaaniʼ ladxidoʼcaʼ, ne rabi conciencia* sticaʼ laacaʼ pa jneza ni cayúnicaʼ o pa coʼ, zacá nga rucaa xquendabiaanicaʼ laacaʼ gudiicaʼ cuenta pa nápacaʼ donda o pa coʼ. 16  Zaca ndiʼ dxi iquiiñeʼ Dios Cristu Jesús para guni juzgar guiráʼ ca ni runi binni nagaʼchiʼ, zaca ni casi peʼ ná ca noticia galán ni runeʼ predicar. 17  Yanna, pa riniʼluʼ judíu lii ne rinándaluʼ ni ná ley ne runi sentirluʼ orgulloso de Dios; 18  pa nánnaluʼ xi racaláʼdxibe gúniluʼ ne nánnaluʼ xii nga ca cosa ni jma risaca purtiʼ maʼ biziidiluʼ ni ná Ley; 19  pa nuuluʼ seguru nácaluʼ ti guía para ca ciegu, ti biaaniʼ para ca ni nuu lu guelacahui, 20  tobi ni rusiene ca ni huaxiéʼ riene, ne ti maestru para ca xcuidihuiiniʼ, ne pa riéneluʼ ca cosa zeeda lu Ley ni riziidiʼ binni primé ne nánnaluʼ guiráʼ ni dxandíʼ de Dios...* 21  Yanna lii ni rusiidiʼ stobi, ¿xiñee qué gusiidiluʼ laca lii pue? Lii ni runi predicar «Cadi cuánaluʼ», ¿ribáʼnaluʼ la? 22  Yanna lii ni riníʼ «Cadi gápaluʼ jnadxiiluʼ»,* ¿nápaluʼ jnadxiiluʼ la? Lii ni riníʼ ribixhilaʼdxiʼ ca bidóʼ, ¿ribáʼnaluʼ ndaaniʼ ca templu la? 23  Yanna lii ni runi sentir orgulloso pur napa Ley, ¿runi despreciarluʼ Dios ra rucheeneluʼ Ley? 24  Casi ná lu Stiidxaʼ Dios: «Purtiʼ runi laatu riguudí* binni de guiráʼ guidxi lá* Dios». 25  Zanda gacané circuncisión* lii pa cayúniluʼ ni ná Ley. Peru pa cadi cayúniluʼ ni ná Ley qué zacané circuncisión lii. 26  Nga runi, pa guni ti hombre guiráʼ ni ná Ley, neca qué ñaca circuncidar zuuyaʼ Dios laa casi ti binni ni guca circuncidar, ¿cadi dxandíʼ la? 27  Ora guni binni ni ná Ley neca cadi cá marca stiʼ circuncisión lu cuerpu stiʼ, zuni juzgar binni ca lii, purtiʼ cadi zinándaluʼ Ley neca nápaluʼ libru ra cá ley ne neca maʼ guca circuncidarluʼ. 28  Purtiʼ ni riníʼ judíu laa la? cadi dxandíʼ ni, ne ni napa ti marca luguiáʼ si, lu beela ladi, cadi nga ndiʼ nga circuncisión. 29  Ndiʼ nga laani: ni dxandíʼ judíu laa la? dede ndaaniʼ ladxidóʼ naca ni. Ne ni dxandíʼ maʼ guca circuncidar la? napa ti marca lu corazón stiʼ, ne raca ni pur espíritu ne cadi pur zeeda ni lu libru ra cá ley. Ne cadi binni rusisaca laa, sínuque Dios.

Nota

O «ni qué riuʼdxuʼ».
O «guchelatinde».
O «tribulación».
O «alma stiʼ cada hombre». Biiyaʼ Glosario, alma.
O «zacaacaʼ paz».
O «justo».
O «nación».
Biiyaʼ Glosario.
Lit. «lu Ley ca napuʼ armazón stiʼ conocimientu ne ni dxandíʼ».
O «Cadi guni cometerluʼ adulterio». Biiyaʼ Glosario, adulterio.
O «runi blasfemar». Biiyaʼ Glosario, blasfemia.
O «xlá».
Biiyaʼ Glosario.