Romanos 15:1-33

  • Lachuu nayecheʼ ora guidxaagalutu stobi cásica bidxaagalú Cristu laatu (1-13)

  • Biʼniʼ Pablo xhiiñaʼ Cristu lade binni de xcaadxi nación (14-21)

  • Ra gudixhe Pablo guni viajar (22-33)

15  Peru laanu, ca ni nuu nadipaʼ, naquiiñeʼ guni huantarnu ca debilidad stiʼ ca ni cadi nuu nadipaʼ, ne cadi gúninu ni riuuláʼdxisinu.  Cada tobi de laanu naquiiñeʼ guni ni chuulaʼdxiʼ prójimo stiʼ ti gacanenu laa guzuhuaa dxiichiʼ.  Purtiʼ nin Cristu qué ñuni ni riuulaʼdxiʼ si, sínuque guca ni casi cá lu Stiidxaʼ Dios: «Luguiaʼyaʼ biaba ca diidxaʼ guníʼ ca ni guluu dí lii».*  Purtiʼ guiráʼ ni gucuá dxiqué, gucuá ni para gusiidiʼ ni laanu, ti ora guni huantarnu ne quixhedxí Stiidxaʼ Dios ladxidoʼno la? gápanu esperanza.  Dios ni racané laanu guni huantarnu ne ni riguixhedxí ladxidoʼno gacané guiratu guiníʼ íquetu casi guníʼ ique Cristu Jesús,*  ti gusisaca guiratu Dios, Bixhoze Jesucristu Señor stinu, ne gúnitu ni juntu casi ñaca tobi si tu caníʼ.*  Lachuu nayecheʼ ora guidxaagalutu stobi, cásica bidxaagalú Cristu laatu né guendanayecheʼ, ti guisaca Dios.  Racalaʼdxeʼ gánnatu beeda guni servir Cristu ca ni maʼ guca circuncidar ne bíʼnibe ndiʼ para gusihuínnibe riníʼ Dios ni dxandíʼ ne para gusihuínnibe dxandíʼ ca promesa ni biʼniʼ Dios ca bixhozebiidacabe,  ne para gusisaca ca nación Dios pur guendanachaʼhuiʼ* stiʼ. Casi cá lu Stiidxaʼ Dios: «Nga runi zanieeʼ runebiaʼyaʼ lii lade guiráʼ nación, ne zuundaʼ para gusisacaʼ laluʼ».* 10  Laaca guniʼbe: «Guiechené guiráʼ xixé nación xquídxibe». 11  Ne guniʼbe sti biaje: «Gusisaca guiráʼ xixé nación Jehová.* Gusisaca guiráʼ guidxi laabe». 12  Ne guníʼ Isaías sti biaje: «De xcu Jesé zaree ti binni ni guni mandar ca nación; zaguixhe ca nación esperanza stiʼ lu nabe». 13  Rinabaʼ Dios ni rudii esperanza binni gusiecheʼ laatu ne quixhedxí ladxidoʼto* purtiʼ nápatu confianza laa, ti gacané poder stiʼ espíritu santu laatu para gaca esperanza stitu jma naguidxi. 14  Hermanu stinneʼ caʼ, nannaʼ dxicheʼ nabé nacháʼhuitu, nánnatu stale ne zanda gudiisaatu conseju laatu. 15  Peru maʼ bisiayaʼ diidxaʼ ora bicaaʼ chupa chonna cosa ra nuutu para gusietenalaʼdxeʼ laatu ni maca nánnatu. Purtiʼ maʼ guca Dios nachaʼhuiʼ né naa* 16  para guneʼ xhiiñaʼ Cristu Jesús lade ca binni de xcaadxi nación, ne gusiideʼ binni ca noticia galán. Cayuneʼ xhiiñaʼ Dios* para guni santificar espíritu santu ca nación riʼ ne gaca guiráʼ ni casi ti ofrenda ni chuulaʼdxiʼ Dios guicaa. 17  Nga runi napaʼ razón para chuaaʼ nayecheʼ purtiʼ nacaʼ discípulo stiʼ Cristu Jesús ne cayuneʼ xhiiñaʼ Dios. 18  Purtiʼ maʼ qué zanieeʼ gastiʼ de ni cayuneʼ, ni zanieesiaʼ nga ni maʼ biʼniʼ Cristu ra biquiiñeʼ naa ti guzuubaʼ ca binni de xcaadxi nación diidxaʼ pur ni rinieeʼ ne pur ni runeʼ. 19  Gucané espíritu stiʼ Dios naa para gunda bidieeʼ señal, bineʼ milagru ne bineʼ predicar ca noticia galán ni caníʼ de Cristu ra nuu guiráʼ binni, bireeʼ de Jerusalén ne bidieeʼ vuelta dede yendayaʼ Ilírico. 20  Nga runi rabeʼ maʼ qué zuneʼ predicar ca noticia galán ra maca bisiidicabe binni de Cristu,* ti cadi gucueeʼ yoo lu base ni gudixhe stobi. 21  Casi cá lu Stiidxaʼ Dios: «Ca ni qué huayunadiaga de laabe, zánnacaʼ, ne ca ni huayunadiaga, ziénecaʼ». 22  Pur nga stale biaje qué ñanda ñaaʼ ra nuutu. 23  Maʼ guiráʼ ladu bineʼ predicar lu ca región riʼ, ne maʼ raca stale iza racalaʼdxeʼ chaaʼ ra nuutu. 24  Nga runi ora maʼ ziaaʼ España racalaʼdxeʼ guuyaʼ laatu ne guni acompañartu naa parte de neza, peru primeru la? guiaanaʼ ra nuutu ti tiempu ne guiecheʼ ladxiduáʼ. 25  Peru yanna riʼ maʼ chaaʼ Jerusalén para chigacaniaʼ ca hermanu.* 26  Purtiʼ de guidubi ladxidóʼ ca hermanu de Macedonia ne de Acaya cudiicaʼ ti contribución para gacanecaʼ ca pobre nuu lade ca hermanu* de Jerusalén. 27  Dxandíʼ, bidiicaʼ ni de guidubi ladxidoʼcaʼ, peru ni dxandíʼ la? biʼniʼ sentircaʼ nuzaabicaʼ ca judíu, purtiʼ pa bidii ca judíu cosa stiʼ Dios* binni de xcaadxi nación, laaca naquiiñeʼ gacané ca binni de xcaadxi nación laacabe né ca cosa sticaʼ. 28  Nga runi ora maʼ biluxeʼ dxiiñaʼ riʼ ne maʼ biiyaʼ gucuaacabe contribución riʼ, zadideʼ ra nuutu ora maʼ ziaaʼ España. 29  Ne nannaʼ ora maʼ chaaʼ ra nuutu ziniaʼ stale ndaayaʼ stiʼ Cristu para laatu. 30  Hermanu caʼ, canabaʼ laatu pur Jesucristu Señor stinu ne pur amor rudii espíritu santu, guni orartu Dios de guidubi ladxidoʼto pur naa casi runeʼ ni, 31  ti guilaʼyaʼ de lu náʼ ca ni qué runi cré* ni nuu Judea, ne para chuulaʼdxiʼ ca hermanu* de Jerusalén dxiiñaʼ* ni cayuneʼ pur laacaʼ. 32  Nga runi, pa naʼ Dios, zigannaʼ laatu né guendanayecheʼ ti cúʼsaanu gana laanu. 33  Dios ni riguixhedxí ladxidóʼ binni* chuʼné guiratu. Amén.

Nota

O «ca ni biʼniʼ insultar lii».
O «gápatu actitud mental ni gupa Cristu Jesús».
Lit. «né ti ruaa si».
O «misericordia».
O «xlaloʼ».
Biiyaʼ Glosario.
O «gudii laatu paz».
O «maʼ bisihuinni Dios bondad inmerecida stiʼ luguiaʼyaʼ». Biiyaʼ Glosario, bondad inmerecida.
Lit. «dxiiñaʼ santo».
O «de xlá Cristu».
Lit. «ca santo».
Lit. «ca santo».
O «ca cosa espiritual».
O «ca ni cadi creyente».
Lit. «ca santo».
O «ministeriu».
O «ni rudii paz».