Mateo 28:1-20

  • Ra biasa Jesús de lade gueʼtuʼ (1-10)

  • Gudíxecabe ca soldadu que para gusiguiicaʼ (11-15)

  • «Laché ne lagacané binni de guiráʼ guidxi gaca discípulo» (16-20)

28  Gudiʼdiʼ si sábadu,* ra zirá gueelaʼ primé dxi stiʼ semana, guyé María Magdalena ne sti María que ra baʼ.  Ne maʼ guca ti xu roʼ raqué purtiʼ biete ángel stiʼ Jehová* de guibáʼ, bidxiña ra baʼ que ne gulee guié que; ne maʼ zuba luni.  Ruzaaniʼ ángel que casi xpiaaniʼ rayu ne blancu xhaba casi nieve.  Cumu guizáʼ bidxibi ca ni cayapa laabe que la? gucadíticaʼ ne biaanacaʼ casi gueʼtuʼ.  Gudxi ángel que ca gunaa que: «Cadi guidxíbitu; nannaʼ cuyúbitu Jesús, ni gutiʼ lu yaga.*  Qué guínnibe raríʼ, purtiʼ maʼ biásabe, casi guniʼbe. Latáʼ, laguuyaʼ ra gútabe.  Yanna, laché nagueendaca ne lagabi ca discípulo stibe: “Maʼ biásabe lade gueʼtuʼ, ne maʼ zanírube lutu Galilea; raqué zuuyatu laabe”. Ndiʼ nga ni bedatidxeʼ laatu».  Ngue runi, nagueendaca bireecaʼ de ra baʼ* que, zidxíbicaʼ peru guizáʼ ziyéchecaʼ, ne ziguxooñecaʼ zitídxicaʼ ni ca discípulo stibe.  Ngue cayaca, bidxaaga Jesús laacabe neza ne bigapadiuxi laacabe. Bidxiña ca gunaa que laabe, cusisácacaʼ laabe ne gudiidxicaʼ ñeebe. 10  Para ná Jesús rabi laacabe: «Cadi guidxíbitu. Laché, lagabi ca bicheʼ checaʼ Galilea; raqué zuuyacaʼ naa». 11  Laga zeʼ ca gunaa que, guyé chupa chonna de ca guardia que ndaaniʼ guidxi ne gúdxicaʼ ca sacerdote principal guiráʼ ni bizaaca. 12  Ne despué de guca reunircaʼ né ca ancianu para quíxhecaʼ xi gúnicaʼ, bidiicaʼ stale moneda de plata ca soldadu que 13  ne gúdxicaʼ laacabe: «Laatu laguiníʼ: “Beeda ca discípulo stibe huaxhinni ne guláʼnacaʼ cuerpu que laga nisiáʼsidu”. 14  Ne pa gueeda ganna gobernador ni la? laadu gusiénedu ni laa.* Cadi chuʼtu xizaa». 15  Ngue runi gucuaacaʼ guiráʼ moneda de plata que ne guniʼcaʼ ni gúdxicabe laacaʼ. Ne ndiʼ nga ni runi cré ca judíu hasta yannadxí. 16  Para biree 11 discípulo que zecaʼ Galilea, lu dani ra guníʼ Jesús guʼyaʼ laacaʼ. 17  Ne ora bíʼyacaʼ laabe, bizulú cusisácacaʼ laabe. Peru guyuu tu biʼniʼ dudar. 18  Para bidxiña Jesús laacabe ne ná: «Ma gucuaaʼ guiráʼ xixé autoridad guibáʼ ne lu guidxilayú. 19  Nga runi, laché ne lagacané binni de guiráʼ guidxi gaca discípulo stinneʼ. Lacuunisa laacaʼ lu lá* Bixhozeʼ, lu lá Xiiñiʼ ne lu lá espíritu santu. 20  Lagusiidiʼ laacaʼ gúnicaʼ guiráʼ ni maʼ bineʼ mandar laatu. Ne laguietenalaʼdxiʼ, qué ziuu dxi guixeleʼ de laatu dede ora guiluxe* guidxilayú riʼ».*

Nota

Biiyaʼ Glosario.
Biiyaʼ Glosario.
O «madero». Biiyaʼ Glosario.
O «tumba conmemorativa». Biiyaʼ Glosario.
O «laadu gucuudxidu laabe».
O «xlá».
Biiyaʼ Glosario, ra guiluxe sistema.
O «era riʼ», «sistema riʼ». Biiyaʼ Glosario, sistema.