Hechos 6:1-15

  • Gulícabe gadxe hombre para gudii guendaró guiráʼ dxi (1-7)

  • Nácabe cayuni blasfemar Esteban (8-15)

6  Yanna, ca dxi que, ra zidale ca discípulo, guluu ca judíu ni riníʼ griegu xqueja ca judíu ni riníʼ hebreu, purtiʼ qué ricaa diʼ ca viuda ni nuu ládecaʼ biaʼ guendaró ni caquiiñecaʼ ora riaaziʼ ni guiráʼ dxi.  Ngue runi biʼniʼ reunir ca Doce que guiráʼ ca discípulo ne gúdxicabe laacaʼ: «Cadi galán diʼ gusaanadu stiidxaʼ Dios para quíxhedu guendaró lu ca mexaʼ ca.  Nga runi, hermanu caʼ, lacuí gadxe hombre ládetu, hombre ni napa binni respetu laa, ni dxaʼ de espíritu ne ni nuu xpiaaniʼ, para gusaanadu dxiiñaʼ ni caquiiñeʼ gaca riʼ lu nacaʼ.  Peru laadu qué zusaanadu de guni orardu ne de gusíʼdidu stiidxaʼ Dios».  Guyuulaʼdxiʼ guiráʼ ca discípulo ni guníʼcabe. Ngue runi gulicaʼ Esteban —ti hombre ni dxaʼ de fe ne de espíritu santu—, ne Felipe, ne Prócoro, ne Nicanor, ne Timón, ne Parmenas ne Nicolás, ti prosélito* de Antioquía.  Bedanecaʼ laacabe ra nuu ca apóstol ne, despué de biʼniʼ orarcaʼ, gudixhenacaʼ luguiácabe.  Ngue runi, jmaruʼ si zireeche stiidxaʼ Dios, ne jmaruʼ si zidale discípulo ndaaniʼ guidxi Jerusalén. Ne laaca guyuu ti grupu naroʼbaʼ de sacerdote ni bizulú gupa fe.*  Guca Dios nachaʼhuiʼ né Esteban ne bidii laabe poder, cayúnibe stale milagru ne cosa ni cadxagayaa guidxi que.  Peru guyé caadxi hombre de Sinagoga stiʼ ca Liberto,* ne caadxi de Cirene ne de Alejandría, ne caadxi de Cilicia ne de Asia, para guni discutirnecaʼ Esteban. 10  Peru qué ganda gucaalucaʼ laabe, purtiʼ riniʼbe né guendabiaaniʼ ne racané espíritu santu laabe. 11  Peru nagaʼchiʼ bicaacabe caadxi hombre guiníʼ: «Maʼ binadiágadu caniʼbe mal* contra Moisés ne contra Dios». 12  Ngue runi guca ti bulla ndaaniʼ guidxi que, ra nuu ca ancianu ne ca escriba. Ne málasi bedandacaʼ ra nuu Esteban, gunaazecaʼ laabe ne yenecaʼ laabe ra nuu Sanedrín.* 13  Raqué guluucabe testigu falsu para guníʼ: «Cadi cayanadxí hombre riʼ de guiníʼ contra templu stiʼ Dios ne contra Ley. 14  Ma binadiágadu guniʼbe zuxhiá Jesús de Nazaret templu riʼ ne zuchaa ca costumbre ni bisaanané Moisés laanu». 15  Ne biiyadxí guiráʼ ca ni zuba lu Sanedrín que laabe ne biiyacaʼ rihuinni lube casi lu ti ángel.

Nota

Biiyaʼ Glosario.
O «biʼniʼ aceptar fe».
Ca diidxaʼ «Sinagoga stiʼ ca Liberto», zándaca caniʼni de ti grupu de judíu o prosélito ni raca reunir para guni orar ne para guʼndaʼ Stiidxaʼ Dios. Gúcacabe esclavu, peru despué maʼ gúcacabe binni libre.
O «cuyuni blasfemarbe». Biiyaʼ Glosario, blasfemia.
Biiyaʼ Glosario.