Hechos 12:1-25

  • Biiticabe Santiago; biseguyoocabe Pedro (1-5)

  • Guca ti milagru para biaana Pedro libre (6-19)

  • Biʼniʼ huará ti ángel Herodes (20-25)

12  Ca dxi que, laaca bizulú cayuniná rey Herodes chupa chonna xpinni Cristu nuu ndaaniʼ congregación.  Biitibe Santiago, biʼchiʼ Juan, né espada,  ne ora bíʼyabe cayuulaʼdxiʼ ca judíu ni bíʼnibe riʼ, laaca gunaazebe Pedro. (Bizaaca ndiʼ ca dxi cayaca Saa stiʼ Pan Sin Levadura).*  Gunaazebe Pedro, biseguyoobe laa ne guluube tapa turnu de tapa soldadu cada tobi para gápacaʼ Pedro, purtiʼ cá íquebe cueebe laa nezalú guiráʼ binni que para gaca juzgar tidiʼ si Pascua.*  Ngue runi bisaanacabe Pedro ndaaniʼ cárcel. Laga nuube raqué, cadi cusaana congregación de guni orar Dios de guidubi ladxidóʼ pur laabe.  Gueelaʼ ante cuee Herodes Pedro nezalú guidxi que, nisiaasiʼ ne liibi cadena lade chupa soldadu, ne laaca nuu guardia ni cayapa ra puertaʼ cárcel que.  Peru málasi bihuinni ti ángel stiʼ Jehová* raqué, ne bizaaniʼ ti biaaniʼ ra nuube ndaaniʼ cárcel que. Óraque bicuaaniʼ ángel que Pedro ora gudiñenáʼ cueʼ tíʼxhibe ne gudxi laabe: «¡Biasa! ¡Nagueenda!». Ne biaba ca cadena nuu nabe.  Óraque gudxi ángel que laabe: «Gucu xhábaluʼ* ne bicaa elaguidi ñeeluʼ». Bizuubabe diidxaʼ. Ne últimu gudxi laabe: «Gucu xhábaluʼ ne dananda naa».  Biree Pedro ne zinanda ángel que, peru cadi cudii cuenta pa dxandíʼ ngue ni cayuni ángel que. Dede guníʼ íquebe cayuuyabe ti visión. 10  Gudiʼdisícabe ra nuu primé ne guiropa grupu de guardia que, yendácabe ra nuu puertaʼ de guiibaʼ ni riree ndaaniʼ guidxi ne stubi puertaʼ que bixeleʼ. Para bireecabe ne zécabe ndaaniʼ ti calle. Málasi bisaana ángel que laabe. 11  Oraqueruʼ bidii Pedro cuenta xii ngue guca ne guníʼ: «Yanna huaxa maʼ nannaʼ dxiicheʼ biseendaʼ Jehová* ti ángel stiʼ beeda gulá naa de lu náʼ Herodes ne bilabe naa de guiráʼ ni cabeza ca judíu gacaʼ». 12  Bidii si Pedro cuenta de ni guca que, guyé ra lidxi María jñaa Juan, ni rábicabe Marcos, raqué maʼ guca reunir stale discípulo ni cayuni orar. 13  Ora bixhidxinabe ra puertaʼ stiʼ entrada que, biree ti criada láʼ Rode ziguuya tu binni que. 14  Ora binibiaʼbe stidxi Pedro, guizáʼ biéchebe, ne lugar de nuxhélebe puertaʼ que, laga bibiguétabe ne yetídxibe laacaʼ zuhuaa Pedro ra puertaʼ. 15  Peru laaca gúdxicaʼ laabe: «Cayaca íqueluʼ». Peru, cumu cayuni insistirbe dxandíʼ ni la? gúdxicaʼ laabe: «Ángel stibe nga». 16  Laga nuucabe zaqué, cuxhidxinaruʼ Pedro ra puertaʼ que. Ora bixhélecabe puertaʼ que ne bíʼyacabe laabe, guizáʼ bidxagayaacabe. 17  Peru bíʼnibe seña lucaʼ cadi guiniʼcaʼ ne bisiene chaahuibe laacaʼ ximodo gulee Jehová* laabe ndaaniʼ cárcel. Ne gúdxibe laacaʼ: «Lagabi guiráʼ ndiʼ Santiago ne ca hermanu». Guníʼsibe ndiʼ, bireebe ne zebe stiʼ lugar. 18  Ora birá gueelaʼ, guca ti bulla lade ca soldadu purtiʼ qué gánnacaʼ paraa zeʼ Pedro. 19  Biʼniʼ mandar Herodes guyubi chaahuicabe laabe guiráʼ ladu, peru, cumu qué nidxélacabe laabe la? gunabadiidxabe ca guardia ne biʼniʼ mandarbe gaca castigarcaʼ. Despué biree* Herodes de Judea zeʼ Cesarea ne biaana raqué ti tiempu. 20  Cadxiichiné Herodes* ca binni de Tiro ne de Sidón. Ngue runi bíʼnicaʼ ti acuerdu para gueedacaʼ ra nuube ne despué de bicuudxicaʼ Blasto —hombre ni nuu encargadu ra lidxi rey—,* gunábacaʼ chuʼ paz, purtiʼ nabani xquídxicaʼ de ca guendaró ni reeda de xquidxi Herodes. 21  Ora bedandá dxi que, bizuchaahuiʼ Herodes ne gucu ca lari de rey stiʼ, gurí lu tribunal ne bizulú cudii ti discursu ca binni que. 22  Óraque bicaa ca binni que ridxi: «¡Caníʼ ti dios, ne cadi ti hombre!». 23  Oraqueca biʼniʼ huará ti ángel stiʼ Jehová* laabe, purtiʼ qué nusisácabe Dios. Ne bidxabe bicutiʼ ne gútibe. 24  Peru zireeche stiidxaʼ Jehová* ne zidale ca binni ni runi cré. 25  Bidii si Bernabé ne Saulo guiráʼ ni zinecaʼ para ca hermanu de Jerusalén,* bibiguétacaʼ Antioquía ne yenecaʼ Juan, ni rábicabe Marcos.

Nota

Biiyaʼ Glosario.
Biiyaʼ Glosario.
Biiyaʼ Glosario.
O «Bixhii ndaaniluʼ».
Biiyaʼ Glosario.
Biiyaʼ Glosario.
Lit. «biete».
O «Racalaʼdxiʼ Herodes tindené».
Lit. «ni nuu encargadu de ra rasi rey».
Biiyaʼ Glosario.
Biiyaʼ Glosario.
O «Biluxe si Bernabé ne Saulo ministeriu de socorro sticaʼ Jerusalén».